ނިކަމެތިންނަށް ހިޔާވަކަން ނުދޭން ނިންމި ނިންމުމެއް.
ރަށްރަށުން މާލެއައިސް މާލޭގައި އެތައް ބަޔަކު އެބަ ދިރިއުޅެއެވެ. މާލޭގައި ދިރިއުޅޭ ރަށްރަށު އެންމެން އުޅެނީ ސަރުކާރުގެ އެއްވެސް އިދާރާއެއްގައި ރަޖިސްޓްރީ ވެގެނެއް ނޫނެވެ. ހާލަކުން މީހަކުވެސް ރަށުން އައިގޮތަށް މާލޭގެ އެއް ގެއެއްގައި އުމުރު ހުސްވަންދެންު އުޅެވިފައެއްވެސް ނެތެވެ.
އެންމެނަކު މާލޭގައި ދިރިއުޅެނީ މަދަރުސާތަކަށް ދަރިން ވައްދައިގެނެއް ވެސް ނޫނެވެ. އެންމެނަކު އާމްދަނީ ހޯދަނީ ތަނެއްގައި ވަޒީފާ އަދާކޮށްގެނެއް ވެސް ނޫނެވެ. މަޖޫރީންގެ ގޮތުގައި އުޅޭ މީހުނާއި ގޭގޭގައި މަސައްކަތް ކޮށްދީގެން ކައިބޮއި ހަދާ މީހުން މަދެއްނޫނެވެ. ވަޒީފާ އަދާކުރި ކުންފުނި ވުޖޫދުގައި ނެތް ކިތަންމެ ބަޔަކުވެސް މާލޭގައި އެބަ އުޅެއެވެ.
ދެ އަހަރުން އަހަރަކުން ކުއްޔަށް ހިފައިގެން އުޅޭ ތަން ބަދަލުވާން ޖެހިގެން ބަދަލުވަމުން މާލޭގެ އެތަން މިތާ ދިރިއުޅޭ މީހުން ނުލާހިކު ގިނައެވެ. ހުދު ހައުސިންގ މިނިސްޓަރ ކަމުގައިހުރި މުއްތޮލިބު މާލޭގައި ކިތައްތާ އުޅުނު ހެއްޔެވެ.
މާލޭގައި މީހަކު ދިރިއުޅުނުކަން ކަށަވަރުކުރަން އުޅުނު ގޭގެ ވެރިފަރާތުން ލިޔުން ހޯދަން ދޭވަރަށްވުރެ ގިނަ މީހުން ގޭގެއިން ނިކުންނަން ޖެހިފައި ހުންނަނީ ހުތުރުކޮށެވެ. މީހަކު ލިޔުމެއް ދިނަސް ނުދިނަސް މާލޭގައި ދިރިއުޅުނު ބަޔަކު ދިރިނޫޅޭ ކަމަކަށް ނުހެދޭނެއެވެ.
ރަށެއްގެ މީހަކު މާލޭގައި ދިރިއުޅުނުކަން ކަށަވަރުކުރަން ލިޔުމެއް ދެންޏާ އެންމެ ސައްހަ ލިޔުމެއް ދެވޭނީ އެރަށެއްގެ ކައުންސިލަށެވެ. ކޮންމެ މީހަކާ ގުޅޭ އެންމެ ގިނަ މުއާމަލާތު ކުރެވިފައި ހުންނާނީ އެމީހަކު ނިސްބަތްވާ ރަށު ކައުންސިލަށެވެ.
ރަށުގެ ރަށްވެހިންގެ ދަފްތަރު ބަލަހައްޓާ ބަޔަކަށް އެމީހަކު އާއްމުކޮށް ދިރިއުޅޭ ތަނެއްގެ މައުލޫމާތު އެނގޭނެއެވެ. ހޯދޭނެއެވެ. އަމްދުން ގިނަ ރަށްރަށަކީ އެކެއް އަނެކެއްގެ ހަރަކާތްތައް އެގޭވަރުގެ ކުދިކުދި އާބާދީތަކެއް ކަމުން މީހަކު ދިރިއުޅޭ ރަށެއްގެ މައުލޫމާތު ހޯދޭނީވެސް ރަށު ކައުންސިލަށެވެ.
ދިރިއުޅޭ ތަނުގެ މައުލުމާތު ދިނުމަށް ކައުންސިލްތަކުން ދޭލިޔުންތައް ބަލައި ނުގަތުމަށާއި ކައުންސިލްތަކުން ލިޔުންނުދޭން އެންގީ މާލޭގައި އެތައް ޒަމާނެއް ވަންދެން އުޅޭ ރަށްރަށުގެ ނިކަމެތިންނަށް ހިޔާވަހިކަން ލިބުނަ ނުދޭށެވެ.
