ނިޒާމުން ބޭރުން ފުލުހުން އިންސާފު ގާއިމުކުރުން | ގޮނަކަށް ގޮނެއް

އަންދްރަޕްރަދޭޝްގެ ސްކޫލެއްގައި މިދިޔަ ހަފުތާގައި ޗެއިންކީހަކުން ހަމަލާދިން މައްސަލައެއްގައި ތުހުމަތުކުރެވޭ 21 އަހަރުގެ މީހެއްގެ ގަޔަށް ފުލުހުން ބަޑިޖެހި ހާދިސާއާއެކު، އަންދްރަޕްރަދޭޝް އަދި ތެލަންގާނާގައި އަންހެނުންނަށް ކުރާ އަނިޔާތަކާ ގުޅިގެން ޝަރުޢީ ނިޒާމުން ބޭރުން އިންސާފު ހޯދައިދިނުމުގެ ބަހުސް އަނެއްކާވެސް ވަނީ ފެންމަތިވެފައެވެ.

2008 ވަނަ އަހަރު ވަރަންގަލްގައި ދިން އެސިޑް ހަމަލާއިން ފެށިގެން 2019 ވަނަ އަހަރު ހައިދަރުއާބާދުގައި ހިނގި ރޭޕް އަދި މަރުގެ މައްސަލައާ ހަމައަށް، އަންދްރަޕްރަދޭޝް އާއި ތެލަންގާނާގެ ފުލުހުން ހިންގާފައިވާ މިފަދަ ކުރިމަތިލުންތަކަށް އާންމުންގެ ބޮޑު ތަރުހީބެއް ލިބެމުންދާއިރު، ގާނޫނީ އިޖުރާއަތްތަކާ މެދު ވަނީ ސުވާލު އުފެދިފައެވެ.

އަންދްރަޕްރަދޭޝްގެ އަނަންތަޕޫރުގެ ސްކޫލަކަށް ވަދެ، ދަރިވަރަކަށް ޗޭނުކީހަކުން ހަމަލާދިން މައްސަލާގައި ހައްޔަރުކުރި 21 އަހަރުގެ ޒުވާނާގެ ފައިގައި ގޭންގްރީން އުފެދުމުގެ ސަބަބުން، ހޮސްޕިޓަލުގައި ފައި ބުރިކޮށްލަން ޖެހުނީ މިދިޔަ އަންގާރަ ދުވަހުއެވެ.

އެތަނުގައި މިއްޔަކީ ޝަރުޢީ ނިޒާމުން ބޭރުން ފުލުހުން "އިންސާފު" ގާއިމުކުރި ފުރަތަމަ ފަހަރެއް ނޫނެވެ. ވޭތުވެދިޔަ 18 އަހަރު ދުވަހުގެ ތެރޭގައި އަންދްރަޕްރަދޭޝްއިން މިފަދަ އެތައް ހާދިސާއެއް ވަނީ ފެނިފައެވެ. އޭގެތެރެއިން ދެ ހާދިސާއެއް ވަރަށް ބޮޑަށް ފާހަގަ ކުރެވެއެވެ.

ޑިސެމްބަރު 6، 2019 ގެ ދަމިވަރު، ސައިބަރއާބާދު ފުލުހުން ވެޓެރިނަރީ ޑޮކްޓަރަކު ރޭޕްކޮށް މަރާލި މައްސަލާގައި ހަތަރު މީހަކު ހައްޔަރުކުރިތާ އަށް ދުވަސް ފަހުން، ފުލުހުންނާ ދެމެދު ހިނގި ކުރިމަތިލުމެއްގައި އެ އެންމެން ވަނީ މަރާލާފައެވެ. ފުލުހުން ބުނި ގޮތުގައި، މުހައްމަދު އާރިފް، ޖޭ. ނަވީން، ޖޭ. ޝިވާ އަދި ސީ. ޗެންނަކޭޝަވުލޫ ނަމަކަށް ކިޔާ މި ހަތަރު މީހުން ހައިދަރުއާބާދުގެ ބޭރުގައި އޮންނަ ޗައްތަޕައްލީގެ ބްރިޖެއްގެ ދަށަށް ގެންދެވުނީ ކުށް ކުރި ގޮތް އަލުން ކުޅެ ދެއްކުމަށެވެ. އެ ވަގުތު އެމީހުން ފުލުހުންގެ ޓީމަށް ހަމަލާދިނުމުން، އަމިއްލަ ދިފާޢުގައި ބަޑިޖަހާ އެމީހުން މަރާލީ ކަމަށް ފުލުހުން ބުނެފައިވެއެވެ.

މި ކުރިމަތިލުމުގެ ހަބަރު ފެތުރުމާއެކު، ހައިދަރުއާބާދު-ބެންގަލޫރު ހައިވޭ މަތީގައި ހާހުން މީހުން އެއްވެ، ފުލުހުންނަށް މަރުޙަބާ ކިޔުމުގެ ގޮތުން މާބުރުވައި އުފާފާޅުކުރިއެވެ. ނަމަވެސް، މި ހާދިސާއާ ގުޅިގެން ފާޑުކިޔުންތައް އަމާޒުވެ، ސުޕްރީމް ކޯޓުން މިނިވަން ތަހުގީގަކަށް އަމުރުކުރިއެވެ. މެއި 2022 ގައި ސުޕްރީމް ކޯޓަށް ހުށަހެޅި ޖަސްޓިސް ވީ.އެސް. ސިރްޕުރްކަރު ކޮމިޝަނުގެ ރިޕޯޓުގައި ބުނެފައިވަނީ، އެ މީހުން މަރާލުމުގެ ނިޔަތުގައި ގަސްތުގައި ބަޑިޖަހާފައިވާކަން ހާމަވާ ކަމަށާއި، އެ ތަނަށް ދިޔަ ފުލުހުންގެ 10 އޮފިސަރަކާ މެދު ފިޔަވަޅު އެޅުމަށް ލަފާދޭކަމަށެވެ. އަދި ފުލުހުންނަށް ހަމަލާދިން ކަމަށް ބުނާ ވާހަކަ ކޮމިޝަނުން ވަނީ ދޮގުކޮށްފައެވެ.

މީގެ އިތުރުން، ޑިސެމްބަރު 13، 2008 ގައި އޭރުގެ އެކުވެފައިވާ އަންދްރަޕްރަދޭޝްގެ ވަރަންގަލްގައި، އިންޖިނިއަރިންގ ކޮލެޖެއްގެ ދެ ދަރިވަރަކަށް އެސިޑް ޖެހި މައްސަލާގައި ތުހުމަތުކުރެވުނު ތިން މީހަކު ފުލުހުން މަރާލުމުން ވެސް އާންމުންގެ ފަރާތުން މިފަދަ އިހުސާސްތަކެއް ފެނިފައިވެއެވެ. އެސް. ސްރީނިވާސް އާއި އޭނާގެ ދެ އެކުވެރިން ކަމަށްވާ ބީ. ސަންޖޭ އަދި ޕީ. ހަރީ ކްރިޝްނާ ހައްޔަރުކުރީ ސްރީނިވާސް ފަހަތުން އުޅުނު އަންހެން ކުއްޖަކަށް އެސިޑް ހަމަލާދިން މައްސަލާގައެވެ. މި ހަމަލާގައި އެ ކުއްޖާގެ އިތުރުން އޭނާގެ އެކުވެރިޔާ ވެސް ފަހުން ވަނީ މަރުވެފައެވެ.

މި ހާދިސާއާ ގުޅިގެން އާންމުންގެ ބޮޑު ނުރުހުމެއް އަމާޒުވެ، އަންހެނުންގެ ރައްކާތެރިކަމާ މެދު ސުވާލު އުފެދުނެވެ. ވަރަންގަލް ފުލުހުން ދައުވާކުރި ގޮތުގައި، ހަމަލާ ދިނުމަށް ބޭނުންކުރި ސައިކަލު ފޮރުވާފައިވާ ވަލު ތެރެއަށް އެ މީހުން ގެންދިޔުމުން، ފިސްތޯލައަކާއި ވަޅިން ފުލުހުންނަށް ހަމަލާދީ ފިލަން އުޅުމުގެ ތެރޭގައި އެމީހުން މަރާލެވުނީއެވެ.

އެ ތިން މީހުން މަރުވުމާ ގުޅިގެން ސިޔާސީ ލީޑަރުންނާއި އާންމުން އެއީ "އަވަސް އިންސާފު" ކަމަށް ބުނެ އުފާފާޅުކުރިއެވެ. ނަމަވެސް، މި ހަރަކާތްތަކުގެ ތެރޭގައި، އެއީ ފުލުހުން ރާވައިގެން ހިންގި އަމަލެއް ކަމުގެ ތުހުމަތުތައް ވެސް ކުރެވުނެވެ. އޭރުގެ ޗީފް މިނިސްޓަރު ވައި.އެސް. ރާޖަސޭކަރަ ރެއްޑީ ވަނީ އެ ތުހުމަތުތައް ދޮގުކުރައްވައި ފުލުހުންގެ އަމަލު ދިފާޢުކުރައްވާފައެވެ.

މިދިޔަ ހޮނިހިރު ދުވަހު ސްކޫލުގައި ދިން ހަމަލާއަށް ފަހު ވެސް ފެނިގެންދިޔައީ މިފަދަ އިހުސާސްތަކެކެވެ. އެ ހާދިސާ ހަރުކަށި އިބާރާތުން ކުށްވެރިކޮށް، އަވަސް އިންސާފަށް ގޮވާލާފައިވެއެވެ. ޗީފް މިނިސްޓަރު އެން. ޗަންދްރަބާބޫ ނައިޑޫ ވެސް ވަނީ މި ހާދިސާ ކުށްވެރިކުރައްވާފައެވެ.

"ސްކޫލް ކްލާސްރޫމް ތެރޭގައި 10 ވަނަ ކްލާހުގެ ދަރިވަރަކަށް ދިން ރަހުމުކުޑަ ހަމަލާގެ ސަބަބުން އަޅުގަނޑުގެ ހިތަށް ވަރަށް ބޮޑު ސިހުމަކާއި ނުރުހުމެއް ލިބިއްޖެ. ސްކޫލްތަކުގެ ތެރޭގައި ކުޑަކުދިންނަށް އަމާޒުކޮށް ހަމަލާދޭ މީހުންނަށް މި މުޖުތަމަޢަކުން ޖާގައެއް ނެތް. އެ ކުއްޖާގެ ޙާލަތު އަޅުގަނޑު އަމިއްލައަށް ބަލަމުންދާނަން، އަދި އެންމެ ފުރިހަމަ ފަރުވާ ދިނުމަށް މެޑިކަލް ޓީމަށް ވަނީ އިރުޝާދު ދެވިފައި. މި ޖަރީމާ ހިންގި މީހާ ހޯދައި، ޤާނޫނީ ގޮތުން ދެވޭނެ އެންމެ ހަރުކަށި އަދަބު އަވަހަށް ދިނުމަށް ފުލުހުންނަށް ވަނީ އަމުރުކޮށްފައި،" އެމަނިކުފާނުގެ ބަޔާނުގައި ވިދާޅުވެފައިވެއެވެ.