ޖަޕާނުގައި ހިންދީ ފިލްމު ޕުޝްޕާ2 އަށް ބޮޑު ކާމިޔާބެއް

ޖަޕާނުގައި އެންމެ ބޮޑު އާމްދަނީއެއް ހޯދި އިންޑިއާގެ 10 ފިލްމުގެ ތެރޭގައި "ޕުޝްޕާ 2" ހިމެނިއްޖެއެވެ.

އައްލޫ އަރުޖުންގެ މަގުބޫލު ފިލްމު "ޕުޝްޕާ 2: ދަ ރޫލް" ވަނީ ޖަޕާނުގެ ބޮކްސް އޮފީހުގައި އެންމެ ބޮޑު އާމްދަނީއެއް ހޯދި އިންޑިއާގެ 10 ފިލްމުގެ ތެރެއިން ޖާގައެއް ކަށަވަރުކޮށްފައެވެ.

ޖެނުއަރީ މަހުގެ 16 ވަނަ ދުވަހު "ޕުޝްޕާ ކުންރިން" ގެ ނަމުގައި ޖަޕާނުގައި ރިލީޒްކުރި މި ފިލްމަށް، ފުރަތަމަ 14 ދުވަހުގެ ތެރޭގައި 105 މިލިއަން ޔެން (6.06 ކްރޯޑް ރުޕީސް) ލިބިފައިވާ ކަމަށް ވިޔަފާރީގެ ތަފާސް ހިސާބުތައް ހާމަކުރާ "ސެކްނިލްކް" ވެބްސައިޓުން ރިޕޯޓްކުރެއެވެ.

މި ކާމިޔާބީއާއެކު "ޕުޝްޕާ 2" ވަނީ އާމިރުހާންގެ "ދޫމް 3" އަށް ލިބުނު 104.5 މިލިއަން ޔެން (6.03 ކްރޯޑް ރުޕީސް) ފަހަތަށް ޖައްސާލުމަށް ފަހު، މި ލިސްޓުގެ 10 ވަނަ މަގާމު ހޯދާފައެވެ.

ފިލްމު ދައްކަން ފެށިއިރު އާމްދަނީ އެހާ ރަނގަޅު ނޫނަސް، ބެލުންތެރިންގެ މެދުގައި ފިލްމަށް އޮތް ތަރުހީބު އިތުރުވެ، ހާއްސަކޮށް ޓޯކިޔޯ އަދި އޮސާކާ ފަދަ ބޮޑެތި ސިޓީ ތަކުގައި ފިލްމުގެ ވިޔަފާރި ވަނީ ބާރުމިނެއްގައި ކުރިއަށް ގޮސްފައެވެ.

ދުނިޔޭގެ ފެންވަރުގައި "ޕުޝްޕާ 2" އަކީ އިންޑިއާގެ އެންމެ ކާމިޔާބު އެއް ފިލްމު ކަމުގައި ވިޔަސް، ޖަޕާނުގައި އެ ފިލްމަށް މިހާތަނަށް ލިބުނު އާމްދަނީ އަދިވެސް އުޅެނީ އެސް.އެސް ރާޖަ މޯލީގެ "އާރް.އާރް.އާރް" އާއި ރަޖްނީކާންތުގެ މަޝްހޫރު ފިލްމު "މުއްތޫ" އާ އަޅާބަލާއިރު ވަރަށް ފަހަތުގައެވެ.

ވިޔަފާރި ދިރާސާކުރާ ފަރާތްތަކުން ލަފާކުރާ ގޮތުގައި، މިވަގުތު މި ލިސްޓުގެ އެންމެ ކުރީގައި އުޅޭ ފިލްމުތަކާ އަރާ ހަމަކުރުމުގެ ފުރުސަތު "ޕުޝްޕާ 2" އަށް ވަރަށް ކުޑައެވެ.