މުއިއްޒު ސަރުކާރުން މީސްމީހުންގެ ކުންފުނިވެސް ވަގަށްނަގާ!؟

މުއިއްޒު ސަރުކާރުން ވައްކަން ނުކުރާ ވަކިކަމެއް ނޯވެއެވެ. ދައުލަތުގެ މުދަލާފައިސާއާއި ބިމުން ވައްކަންކޮށްފާ ނިންމާލަނީއެއް ނޫނެވެ. ވަކިވަކި ފަރުދުންގެ ޒާތީ މައުލޫމާތުން ވައްކަންކޮށްގެން މީސްމީހުން ޕާޓީތަކުން ވަގަށް ނަގައިގެން ނިންމާލަނީއެއް ނޫނެވެ. ސަރުކާރުގައި ރަޖިސްޓްރީ ކޮށްގެން ހިންގާ އަމިއްލަ މީސްމީހުންގެ ކުންފުނިތައް ވެސް ވަގަށް ނަގަނީއެވެ.

2019 ވަނަ އަހަރުއްސުރެ އިކޮނޮމިކް މިނިސްޓްރީގައި ރަޖިސްޓްރީ ކޮށްގެން ހިންގަމުން އަންނަ ކުންފުންޏެއް ޑިރކެކްޓަރުންގެ ބޯޑަށް ނޭގި އެ ކުންފުނީގެ ހިއްސާދާރުން ބަދަލުކުރުމުގެ ނުރައްކާތެރި ޖަރީމާއެއް އިގްތިސޯދީ ވުޒާރާގެ ތެރޭގައި މިދިޔަ އަހަރު ވަނީ ހިންގާލާފައެވެ. އެކަމާ ގުޅުންހުރި ކިތާބީ ހެއްކާއި ގަރީނާ ހީރަސްނިއުސް ޓީމަށް ލިބިފައިވެއެވެ. މި ދަަންނަވާ ކުންފުނި ވަގަށް ނަގާދިނުމުގައި އިސްކޮށް ހުރީ އެ ވުޒާރާގެ ސްޓޭޓް މިނިސްޓަރ ޝިޔާޒް ކަމަށް އެ ކުންފުނިން ތުހުމަތު ކުރެއެވެ. މައްސަލައަކީ އިކޮނޮމިކް މިނިސްޓްރީއާއި ޕޮލިހާއި ރައީސުލްޖުމްހޫރިއްގެ ސަމާލުކަމަށް ރަސްމީކޮށް ގެނެވިފައިވާ ކަމެކެވެ. އެކަމަކު އެތިބެނީ އަޅާކަހާވެސް ނުލައެވެ. 

ކުންފުނީގެ މިލްކުވެރިކަން އެހެން ފަރާތަކުން ފޭކް އެޕްލިކޭޝަނެއް ހުށަހަޅުވާ ބަލައިގަނެ ކުންފުނި ވަގަށް ނެގުމުގެ މަސައްކަތް ކުރަމުންދާކަން އެކުންފުނީގެ ހިއްސާދާރުންނަށް އެނގުނީ ޕްރޮސެސްކުރުމުގެ މަރުހަލާ ހިނގަނިކޮށެވެ. ހިއްސާދަރުންނަށް އެކަން އެނގިގެން ބެލިބެލުމުން ހިއްސާ ބަދަލުކުރުމުގެ ކަންތައް އިކޮނޮމިކް މިނިސްޓްރީގެ ވެރިންތަކެއް އިސްވެ ތިބެ ހިންގާފައިވަނީ ގާނޫނާއި ގަވާދާއި ހިލާފަށްކަމެވެ. 

ހިއްސާ ބަދަލުކުރުމުގެ އެޕްލިކޭޝަން މިނިސްޓްރީއަށް ހުށަހަޅާފައިވަނީ އެކުންފުނީގެ ބިޒްނަލް ޕޯޓަލަކުން ނޫނެވެ. އެކުންފުނީގެ ރަޖިސްޓަރޑް އީމޭލް އެކައުންޓަކުންވެސް ނޫނެވެ. އެޕްލިކޭޝަންގައިވަނީ ކުންފުނީގެ ލެޓަރހެޑާއި ސީލްއާއި މެނޭޖިން ޑިރެކްޓަރގެ ސޮއިވަނީ ފޯޖުކޮށްފައެވެ. އަނެއްކޮޅުން އެޕްލިކޭޝަނަށް ފައިސާ ދައްކާ ޕްރޮސެސްވާ ހިސާބަށް ދިޔައިރުވެސް ކުންފުނީގެ ރަސްމީ މޭލަކަށް ނުވަތަ ފޯނަކަށް ނޮޓިފިކޭޝަނެއްހާ ހިސާބު ވެސް ނާދެއެވެ. 

ކުންފުނީގެ ޑިރެކްޓަރުންނަށް މިކަން އެނގުމުން އެކަން ހުއްޓުވާ ކަންހިނގާފައިވާ ގޮތުގެ މައުލޫމާތު އެކުންފުންނާ ހިއްސާ ކޮށްދިނުމަށާއި އެކަމުގައި ބައިވެރި މީހުން ހޯދާ ފިޔަވަޅު އެޅުމަށް އިކޮނޮމިކް މިނިސްޓްރީއަށް އެކުންފުނިން ހުށަހެޅުމުން ހިއްސާ ބަދަލުކުރުމުގެ ޕްރޮސަސް ހުއްޓާލުން ފިޔާވާ އެކަމާއި ގުޅިގެން އެއްވެސް ފިޔަވަޅެއް ނާޅައެވެ. އެކަން ހިނގާފައިވާ ގޮތުގެ މައުލޫމާތު ދޭންވެސް ވަނީ ދެކޮޅު ހަދާފައެވެ. 

އެ ކުންފުނިން އެ މައްސަލަ ފުލުސް އޮފީހަށް ހުށަހެޅުމުން ވެސް ކުރިއަަކަށް ނުކަނޑައެވެ. ފުލުހުން ވެސް އެކަމަކީ ނުހިނގާ ކަމަކަށްހަދާ ހިންދާލަން އުޅޭކަމަށް ބެލެވޭތީ ރައީސް މުއިއްޒަށްވެސް ސިޓީއަކުން ވަނީ ދަންނަވާފައެވެ. ރައީސަށް ލިޔުމުންވެސް އެކަމުން ނިކުތް ނަތީޖާއެއްނެތެވެ. އެކޮންމިކް މިނިސްޓްރީގެ ސްޓޭޓް މިނިސްޓަރ ޝިޔާޒްގެ އަމަލާއި ބަސްމަގު ހުންނަ ގޮތުން ހިއްސާ ބަދަލުކުރުމުގެ ޖަރީމާ ހިންގުމުގެ ފަހަތުގައި ހުރީ އޭނާ ކަމަށް ވަރަށް ބޮޑަށް ތުހުމަތު ކުރެއެވެ.