ސިޓީ ކައުންސިލަށް ދޭންޖެހޭ ފައިސާއެއް ނޯންނާނެ: ސްޓެލްކޯ އެމްޑީ

މާލެ ސިޓީ ކައުންސިލަށް ސްޓެލްކޯއިން ދައްކަންޖެހޭ 68 މިލިއަނަށްވުރެ ގިނަ ފައިސާ އޮތް ކަމަށް ބުނެ ސިޓީ ކައުންސިލުން ހަދަނީ ބޮޑު ދޮގެކެވެ. ސިޓީ ކައުންސިލުން ސްޓެލްކޯއަށް ދައްކަން ޖެހޭ ކަރަންޓް ބިލްތަކަށް ފައިސާ ނުދައްކައިގެން ފައިސާ ނުދައްކާ ތަންތަނުން ކަރަންޓް ކަނޑާލެވޭނެ ކަމުގެ ނޯޓިސް ފޮނުވުމުން މިސްކިތް ތަކުން ކަރަންޓް ކަނޑަން އުޅޭ ކަމަށް ބުނެ ދޮގު ހަބަރު ސިޓީ ކައުންސިލުން ފަތުރަނީ ސިޔާސީ ބޭނުމެއްގައެވެ.

މުންދުއާއި ބޯފަން އަބްދުﷲ ކަހަލަ ސިޔާސީ މީހުން މާލޭ ސިޓީ ކައުންސިލަށް ވައްދައިގެން އެ މީހުނަށް ބޮޑު މުސާރައާއި އިނާޔަތް ދޭނެ ފައިސާ ސިޓީ ކައުންސިލްގައި ބޯކޮށް އޮވެއެވެ. ނެތީ މިސްކިތް ތަކުގެ ކަރަންޓް ބިލަށް ދައްކާނެ ފައިސާއެވެ. ސިޔާސީ ގޭސް ގަނޑަކަށް ހަދައިގެން މިސްކިތް ތަކުން ކަރަންޓް ކަނޑާލަން އުޅޭކަމަށް ފިތުނަވެރި ވާހަކަ ދައްކަން ކެރޭކަމެވެ.

ސްޓެލްކޯއަށް ކަރަންޓް ބިލްތަކަށް ދައްކަން ޖެހޭ ފައިސާ ދައްކާ ހަލާސް ކުރަން ސިޓީ ކައުންސިލުން އެއްބަސްވެ ސޮއިކޮށް މިވީހާތަނަށް އެއްވެސް ފައިސާއެއް ނުދައްކިޔަސް ސިޓީކައުންސިލުން ފައިސާ ހަރަދުކޮށްގެން ހިންގަނީ އިދިކޮޅު ސިޔާސީ ހަރަކާތެވެ. ދީނާ ގައުމައްޓަކާ ހިފި ނުހުރެގެން އުޅޭ އިރު މިސްކިތެއްގެ ކަރަންޓް ބިލް ދައްކާ ނުލައެވެ.

ކަރަންޓް ބިލަށް ފައިސާ ނުދައްކާތީ އެކަން ސިޓީ ކައުންސިލްގެ ސަމާލުކަމަށް ގެނައުމުން ދެން ދައްކަން ފެށީ ސްޓެލްކޯއިން ދައްކަންޖެހޭ ފައިސާ ތަކެއް އޮތް ވާހަކައެވެ. ސްޓެލްކޯއިން މާލެސިޓީ ކައުންސިލަށް ދައްކަން ޖެހޭ ފައިސާއެއް އޮތްނަމަ ނުދައްކާ ނުބާއްވާނެ ކަމުގެ ޔަގީންކަން މާލެ ސިޓީ ކައުންސިލަށް ސްޓެލްކޯއިން އޮތީ ދީފައެވެ. ސްޓެލްކޯއިން ދައްކަންޖެހޭ ކަމަށް ބުނާ 68 މިލިޔަނަށް ވުރެ ގިނަ ފައިސާ ނުދައްކާ އޮތީ ސްޓެލްކޯއިން ދައްކަން ޖެހޭ އެއްޗަކަށް ނުވާތީއެވެ.

އަޖައިބެކެވެ. ސްޓެލްކޯއަކީ މާލެ ސިޓީ ކައުންސިލަށް ވުރެ މާދޮށީ ކުންފުންޏެކެވެ. މާލޭގެ ބިމުން ސްޓެލްކޯއަށް ދައުލަތުން ދޫކޮށްފައި ހުރި ބިން ތަކަކީ މާލޭގެ ކަރަންޓް ހިދުމަތް ގާއިމު ކުރުމަށް ދައުލަތް ޖާމިނު ވެގެން ސްޓެލްކޯއަށް ދޫކޮށްފައި ހުރި ބިންބިމެވެ.

ސްޓެލްކޯގެ މެނޭޖިންގ ޑިރެކްޓަރ އަހުމަދު ޝަރީފް ވިދާޅުވި ގޮތުގައި މާލެ ސިޓީ ކައުންސިލަށް ސްޓެލްކޯ އިން ދައްކަން ޖެހޭ އެއްވެސް ފައިސާއެއް ނުއޮންނާނެއެވެ. ސިޓީ ކައުންސިލަށް އެ އުޅެނީ އޮޅިގެންނެވެ.