ޓޫރިޒަމަށް އެންމެބޮޑު ގެއްލުމެއްދިނީ މުއިއްޒު: މެންބަރ އައްބާސް

ރާއްޖޭގައި ފަތުރުވެރިކަން ސިނާއަތެއްހެ ގޮތުގައިކާމިޔާބު ކަމާއެކު އޮންނަތާ 52 އަހަރުވެއްޖެއެވެ. އެއްދުވަހުން އަނެއް ދުވަހަށް އައީ ބާރަށް ކުރިއަރަމުންނެވެ. ވަން އައިލެންޑް ވަން ރިސޯޓް ގޮތުގައި މަޝްހޫރުވެފައިވާ ރާއްޖޭގެ ޓޫރިޒަމް ދެމިއޮތީ އެތައް ބައެއްގެ ހިއްވަރާ މަސައްކަތުންނެވެ. މުއިއްޒާ މުއިއްޒު ސަރުކާރުން ކުރި ކަމަކުން ނޫނެވެ.

ވަރުވާއަށް ލިޔެދީފައިވާ ފަޅުރަށްތަކުގައި ކުރެވެމުން އައި ފަތުރުވެރިކަން ދައުލަތަށް އާމްދަނީ އިންޑަސްޓްރީއަކަށް ބަދަލުވީވެސް މިއަދަކުނޫނެވެ. ކުރީގެ ސަރުކާރުތަކާއި ވިޔަފާރިވެރިން ގުޅިގެން ކުރި ކާމިޔާބު މަސައްކަތުން ދުނިޔޭގެ އެއްވަނަ ފަތުރުވެރި މަންޒިލަށް ރާއްޖެ ބަދަލުކޮށްލީ 2024 ވަނަ އަހަރަކު ނޫނެވެ.

ކްރޫޒް ލައިނާއި ޔޮޓް ފަހަރުގައި ފަތުރުވެރިން ރާއްޖެ އައީކީ މުއިއްޒު ވެރިކަމަށް އެރުމަކުން ނޫނެވެ. ސަފާރީ ޓޫރިޒަމާއި ސިޓީ ހޮޓަލާއި ގެސްޓް ހައުސް ޓޫރިޒަމާއި ހޯމްސްޓޭ ޓޫރިޒަމް ރާއްޖެއަށް ތައާރަފްވެ ނަފާ ލިބެން ފެށީ މުއިއްޒު ކުރިކަމަކުން ނޫނެވެ. 

2 މިލިޔަން ފަތުރުވެރިން މި އަހަރު ރާއްޖެ އައިސްގެން ދަތްމައްޗަށްތުން ނާރައިގެން އުޅޭނެކަމެއް ނެތެވެ. 2 މިލިޔަންގެ ލަނޑުދަނޑި ހާސިލްވީ މުޅި ޓޫރިޒަމް އިންޑަސްޓްރީއާއި ކުރީގެ ސަރުކާރުތަކުން ހިފި އަމާޒުންނެވެ. އިތުރުވެގެން ދިޔަ ޓޫރިސްޓް ބެޑްތަކާއި ފެސިލިޓީތާކާއި ހިދުމަތްތަކުގެ ސަބަބުންނެވެ. ރާއްޖެއަކީ ހުރިހާ ފެންވަރެއްގެ ޓޫރިސްޓުންނަށް ވެސް ފަހި މަންޒިލަކަށް ހެދުމުގެ ނަތީޖާއިންނެވެ. 

ވެލިދޫ ދާއިރާގެ މެންބަރ މުހައްމަދު އައްބާސް ވިދާޅުވާހެން 2 މިލިއަން ފަތުފުވެރިން މިގައުމަށް އައީ މި ސަރުކާރުން ކުރިކަމަކުން ނޫނެވެ. މެޑަލް ޖައްސަވަން އިތުރުފުޅު ނުހައްދަވާށެވެ.

މެންބަރ މުހައްމަދު އައްބާސް ވިދާޅުވަނީ ފާއިތުވީ 52 އަހަރު ތެރޭގައި ޓޫރިޒަމް އިންޑަސްޓްރީއަށް މިއަށްވުރެ ބޮޑު ގެއްލުމެއްދިން ސަރުކާރެއް ނާންނަކަމަށެވެ. އެއީ ޓޫރިޒަމް އިންޑަސްޓްރީގައި މަސައްކަތް ކުރަމުންދާ އެންމެން ގަބޫލުކުރާ ހަގީގަތެއް ކަމަށް މުހައްމަދު އައްބާސް ވިދާޅުވެއެވެ.