ޓެކްސީތައް ޓޯކޮށްގެން ބަސްނޭހުމެއް ނުހުއްޓުވޭނެ!

ސަރުކާރުން ޓެކްސީ ކުރުމުގެ ވިޔަފާރި ކުރަން އުޅޭތީ އެކަމާ ދެކޮޅަށް ޓެކްސީ ކުރާމީހުން އަޑުއުފުލުމަކީ އެމީހުނަށް ގާނޫނު އަސާސީ ލިބިދޭ އަސާސީ ހައްގެކެވެ. ޓެކްސީތައް ހުއްޓާލައިގެން ވަކިތާކު ޓެކްސީ މަޑުކޮށްގެން އޮތުމަކީ ގާނޫނާ ހިލާފް ކަމެއް ނޫނެވެ. އެޒާތުގެ މަދަނީ ބަސްނޭހުމަކީ ދުނިޔޭގެ ހުރިހާތަނެއްގައި ބާއްވާ ސުލްހަވެރި ހަރަކާތެކެވެ. 

ދުނިޔޭގެ އެހެންތަންތާވެސް ތެޔޮ އަގުބޮޑުވުން ފަދަ ކަންކަމާ ގުޅިގެން ވެހިކަލްތައް ދަތުރުތައް ހުއްޓާލާ ކާރޫބާރު ބޮޑެތި މަގުތަކުގައި ފައްޗަކަށް މަޑުކޮށްލައިގެން ތިބެއެވެ. މަސައްކަތްތެރިން އެމީހުންގެ ކަންބޮޑުވުން ހިއްސާ ކުރަނީ ސުލްހަވެރި މަދަނީ ބަސްނޭހުންތަކުންނެވެ. އެހެނެކޭ ކިޔާ އެމީހުންގެ ވެހިކަލްތަކަށް ފުލުހުން އަރައިގަނެ ޓޯކޮށެއް ގެއްލުން ދިއެއް ނޫޅެއެވެ. 

ރާއްޖޭގެ ގާނޫނުތައް ބުނާގޮތުން އުޅަދުތައް ޓޯކުރެވޭނީ ޕާކްކުރުމުގެ އާއްމު އުސޫލާ ހިލާފުވެގެންނެވެ. ކާރޫ ބާރު ބޮޑުމަގެއްގައި އުޅަދުތައް ފަތިފައްޗަށް ހުއްޓާފާ އޮތުމަކީ ގަވައިދާ ހިލާފަށް ޕާކްކޮށްފައި އޮތުމެއް ނޫނެވެ. ޓްރެފިކް ބާރު ބޮޑުވެގެން މަޖިޑީ މަގުގައި އުޅަދުތައް ހުއްޓޭ ކޮންމެ ހުއްޓުމަކީވެސް ޕާކްކުރުމުގެ ގައިވާދާ ހިލާފުވުން ކަމަށް ބަލައިގެން ޓޯކުރަން ޖެހޭނެތާއެވެ. 

އެހެން ނޫނަސް ސަރުކާރުން ގެންގުޅޭ ސިޔާސަތަކާ ގުޅިގެން ވަކި ކޮމިއުނިޓީއަކަށް ފޫނުބެއްދޭވަރުގެ ބޮޑެތި ގެއްލުން ވާނެ ކަމަށް އެމީހުނަށް ގަބޫލުކުރެވުނީމާ އެމީހުން ނިކުމެ ސުލްހަވެރި މުޒާހަރާ ކުރެވޭނެއެވެ. ހިދުމަތް ދިނުން ހުއްޓާލާ މަދަނީ ބަސްނޭހުމަށް ދާނެއެވެ. އެހެނެކޭ ކިޔާ ގާނޫނު އަސާސީން ލިބިދޭ އަސާސީ ހައްގެއްގެ ބޭނުން ހިފުމަކީ ފުލުހުންނިކުމެ އެ މީހުންގެ މުދަލަށް ގެއްލުންދޭން ޖެހޭ ސަބަބެއް ނޫނެވެ.

މޫނަކަށް ކަނދުރާއަކަށް ބެލުމެއްނެތި މީހުންގެ އަގުބޮޑު ވެހިކަލްތައް ޓޯކޮށްގެން ގެން ދިއުމަކީ ފުލުހުން ކޮށްގެން ވާނެ ކަމެއް ނޫނެވެ. 30 ޓެކްސީ 30 ދުވަހަށް ޓޯކޮށް 30 ޢައިލާ ބަޑަށް ޖެއްސުމަކީ ކަނޑައެޅިގެން ދިން އަނިޔާއެކެވެ. ކުށެކެވެ. ޝަރީއަތް ހިންގޭނެ ޖިނާއީ ކުށެކެވެ. އެކަން ކުރި ފުހުންނާ ދެކޮޅަން އިންސާފު ހޯދަން ދައުވަ ކުރެވޭނެ ކަމެކެވެ. 

ފުލުހުންނަށް ވުމަކީ ޓޯކުރުމުގައި ވެހިކަލަކަށް ލިބޭ ގެއްލުމަކަށް ޒިންމާ ނުވާނެ ކަމަށް ބުނެ ހިތުހުރި ގޮތަކަށް މީހުންގެ މުދަލަށް ގެއްލުން ދިނުމަށް ދީފައި އޮތް ލައިސަންސެއް ނޫނެވެ. ވެހިކަލް ސަލާމަތުން ބާއްވަން ބޭނުމިއްޔާ ހެދިހާ އެއްޗެއް ހެދިގެން ގޭގައި ތިބޭށޭ ބުނެ ހައްގުބަސް ބުނުމާއި އިހުތިޖާޖް ހުއްޓުވަން މަސައްކަތްތެރިން ބްލެކްމޭލް ކުރުމުގެ ހައްގެއް ފުލުހުންނަކަށް ނުއޮންނާނެއެވެ.   

އިހުތިޖާޖު ކުރުމުގެ ގޮތުން ބަޔަކު ކުރާ ކަމެއްގައި މީހެއްގެ ފުރާނައަށް ޖާނަށް މުދަލަށް ގެއްލުމެއް ނުވާހާ ހިދަކު ފުލުހުންގެ ޒިންމާއަކީ "ޕްރޮޓެކްޓް އެންޑް ސާވް"އެވެ. ޑެމޭޖް އެންޑް ޑިސްޓްރޯއި އެއް ނޫނެވެ. ޗޭން އޮފް ކޮމާންޑަށް ބޯލެބުމުގެ ނަމުގައި ގައިރު ގާނޫނީ އަމުރަށް ކިޔަމަންވުމަކީ ފުލުހުންނަށް އޮތް ހައްގެއް ނޫނެވެ.