މޭކަރައިގެން އުނބުޓާން ނެގިޔަސް ތިިބީ ދޫކުރާ ގޮތަކަށް ނޫން

މިހާރު ވެރިކަމުގައި ތިބީ ބަގާވާތަކުން ވެރިކަމެއް ވައްޓާލީ ބާގީންގެ ބައިގަނޑެކެވެ. މިއަދު ސަރުކާރުގެ މައުތުޕީސް ހެދިގެން ސަރުކާރު ދިފާއު ކުރަން ޓްވީޓްކޮށް މަގުމަތީ ހަޅޭފަޅޭ ޖަހަނީ ދައުލަތުގެ ވެރިޔާގެ ގޮތުގައި ހުންނެވި ރައީސެއްގެ ކަރުބުރި ކުރަން ގޮވި މީހުންނެވެ. މަރާމާރީ ހިންގައިގެންވެސް ވެރިކަން ބަދަލުކުރަން ޖެހިއްޖެކަމަށް ގޮވި މީހުންނެވެ. 

މިނިވަން ކަމުގެ ދިފާއުގައޭ ކިޔައިގެން މޭމަތީގައި ގޮށްމުށް ޖަހައިގެން މުޒާހަރާ ކުރަމުން ދުވީވެސް އެ ބައިގަނޑެވެ. މެދު އުމުރުގެ މަދު އަންހެނުން ކޮޅެއް ނެރެގެން ސޯސަންމަގު ހަތަރު އަނގޮޅިއާއި ދެދޮރު ދޭތެރޭގައި ހަރާން ހުކުމޭ ކިޔައިގެން ގަންހިންގުވާ މާލެތެރެ ހަލަބޮލިކުރީވެސް އެ ބައިގަނޑެވެ. 

ވެރިކަން ލިބުމުން ހިތުހުރި އެއްޗެއް ހަދަމުން ރައްޔިތުންނަށް ދުއްޕާން ކުރަން ފެށީމާ ރައްޔިތުން ކެކިގަތީމާ ކަކުލުހުޅުން ދޫވެގެން އުޅޭނެ ކަމެއްނެތެވެ. ފުރިފައި ހުރި ނަމަ ގުޑުގުޑެއް ނާޅާނެއެވެ. ރައްޔިތުންނަށް ބަލާ މުސީބާތް ހައްދެއް ނެތްވަރަށް ޖެއްސިކަން ގަބޫލުކުރެވުނީމާ އަމިއްލައަށްވެސް ބިރު ނަގާނެއެވެ. 

ގާނޫނު އަސާސީ ދިފާއުގައި ބަޔަކު ތެދުވީމާ އެކަމާ ބައިވެރިވެގެން ރައްޔިތުން ނިކުންނަނީ ކަމެއް ނުވެއެއް ނޫނެވެ. ކަރަންޓް ބިލާ ފެން ބިލަށް އަތްނުފޯރީމާ މީހުން އެކަމާ ދެކޮޅަށް ނިކުންނާނެއެވެ. މުދަލުގެ އަގުބޮޑުވެ އަނގަޔާ އަތާދިމާނުވާ ހިސާބަށް ދަންދެން ނުތިބެ ހަމަމަގަށް އަޅުވަން މީހުން ނިކުންނާނެއެވެ. މުސްކުޅިންގެ އިނާޔަތާ ކުޅެ އާސަންދަ ކާސަންދައަށް ބަދަލުކުރީމާ ރުޅި ގަދަވެގެން ނިކުންނާނެއެވެ. 

ފަހުރުވެރި ކަމާއެކު ރީތިގޮތުގައި ސިނގިރެޓް ބޮމުން ދިޔަ މީހުނަށް ބިޑިއޮޅަން ޖެހުނީމާ ހިމޭނަކުން ނުތިބެވޭނެއެވެ. މަސް ގަންނަ އަގުދަށްކޮށް މުޒާހަރާ ނުކޮށް ލާރި ނުދިނީމާ މަސްވެރިން ރުހިގެން ނުތިބޭނެއެވެ. ސަރުކާރުން ޓެކްސީކޮށް ކިއްލި ވިއްކާ ހިސާބަށް އާއްމުންގެ ވިޔަފާރިތައް ފުޑާލަން ފެށީމާ ލޯމަރައިގެން ނުތިބޭނެއެވެ. 

ބޭރުގައި ކިޔަވަން ތިބޭ ކުދިންނަށް ދެމުންއައި ކޯސްފީއާއި އެނޫން އިނާޔަތްތައް ތާށިވެ ގޮތް ހުސްވިމާ ނުނިކުމެ ނުތިބޭނެއެވެ. ރަށްރަށުގެ ޕްރޮޖެކްޓްތައް ހުއްޓާލާ މުއައްޒަފުން މަގުމަތިކުރަން ފެށީމާ ނިކުންނާނެއެވެ. ރައްޔިތަކަށް ލުޔެއް ފަސޭހައެއް ނުލިބި 49.3 ބިލިޔަންގެ ބަޖެޓެއް ދިރުވާލީމާ ހަޖަމެއް ނުވާނެއެވެ. 22 ވުޒާރާ ހަދައިގެން ދެތިންހާސް ސިޔާސީމީހުން އަތްގުޅި ނުކާ މުސާރާގައި ބައިތިއްބައިގެން ހަޒާނާ ބަހާލާކަށް ދީގެން ނުތިބޭނެއެވެ.

މަހުޖަނުންގެ ޖީބަށް އަތްބާނައިގެން ޑޮލަރު ފޭރިގެން ދުނިޔެތެރޭގައި އަޗާތަޅަން ދުއްވާ ޑޮލަރުކޮޅު ހުސްކޮށް އައުވާނުން އެންބަސީތަކުގައި ބައިތިއްބައިގެން ޑޮލަރު ހަރަދުކޮށް ބޮޑުނުކުރާން ބުނި ޑޮލަރުގެ އަގު ބޮޑުވީމާ ހިމޭނަކުން ނުތިބެވޭނެއެވެ. ޓޫރިޒަމާއި މަސްވެރިކަމާއި ދަނޑުވެރިކަމާއި އިމާރާތްކުރުމުގެ ސިނާއަތު ފުޑުފުޑު ވާތަން ބަލަހައްޓައިގެން މީހުނެއް ނުތިބޭނެއެވެ. އަނެއްކޮޅުން ދީފައިވާ ގޯތިތަކާއި ފްލެޓްތައް ހަވާލުނުކޮށް ހިލާލާތީ އެއްވާނެއެވެ.

ޖެނުއަރީން ފެށިގެން ނަގަން ހުރި ރާޅުގެ ބޮޑުކަންފެނި ކަންބޮޑުވެ މަގަށް ނުނިކުމެ މީހުން ނުތިބޭނެއެވެ. މޭކަރައިގެން އުނބުޓާން ނެގިޔަސް ރައްޔިތުން ތިިބީ ދޫކުރާ ގޮތަކަށް ނޫނެވެ. ގާނޫނު އަސާސީ ދިފާއުގައި އެންމެން އެއްވަނީ އެމީހަކަށް ބޮޑުވާ ކަމެއް ހައްލުކުރަން ގާނޫނު އަސާސީގެ ދިފާއުގައެވެ.