ހަވާއަރުވާ ތަކެތި އުފައްދާ ކާރުހާނާއެއް ގޮވައި 25 މީހުން މަރުވެއްޖެ

އިންޑިއާގެ ޓެމިލްނާޑޫގައި ހުންނަ ހަވާ އަރުވާ ތަކެތި އުފައްދާ ކާރުހާނާއެއްގައި ހިނގި ނުރައްކާތެރި ގޮވުމެއްގައި މަދުވެގެން 25 މީހުން މަރުވެ، ގިނަ ބަޔަކަށް އެކިވަރުގެ އަނިޔާތައް ލިބިއްޖެއެވެ. ވިރޫދުނަގަރު ޑިސްޓްރިކްޓްގައި ހުންނަ "ވަނަޖާ ފަޔަރވޯކްސް އިންޑަސްޓްރީ" ގައި މި ހާދިސާ ހިނގިއިރު، އޭރު 50 އެއްހާ މުވައްޒަފުން އެ ތަނުގައި މަސައްކަތް ކުރަމުން ދިޔަ ކަމަށް ރިޕޯޓުތައް ބުނެއެވެ.

ކަމާބެހޭ އިދާރާތަކުން މައުލޫމާތު ދޭ ގޮތުގައި، މި ގޮވުން ފުރަތަމަ އުފެދުނީ ހަވާ އުފެއްދުމަށް ބޭނުންކުރާ ރޯ މެޓީރިއަލް ނުވަތަ ބޭސްތައް ގެންގުޅޭ ސަރަހައްދެއްގައެވެ. މި ގޮވުމުގެ ބާރުގަދަކަމުން ކާރުހާނާގެ ބައެއް ބައިތައް ބިމާ ހަމަވެ، ކައިރީގައި ހުރި އިމާރާތްތަކަށް ވެސް ބޮޑެތި ގެއްލުންތަކެއް ލިބިފައިވެއެވެ. އަދި މީހުން ސަލާމަތް ކުރުމުގެ މަސައްކަތް ކުރިއަށް ދަނިކޮށް ދެވަނަ ފަހަރަށް އެއްޗެއް ގޮވުމުގެ ސަބަބުން، އިތުރު މީހުންނަށް އަނިޔާވެ، އެ ސަރަހައްދުގައި ބޮޑު ބިރުވެރިކަމެއް އުފެދުނެވެ.

ހާދިސާއާ ގުޅިގެން ފުލުހުން މިހާރު ތަހުގީގު ފަށާފައިވާއިރު، ކާރުހާނާގެ ވެރިޔާއާއި ފޯމަނުގެ މައްޗަށް ތުހުމަތު ކުރެވޭތީ އެމީހުން ހޯދުމުގެ މަސައްކަތް ދަނީ ކުރަމުންނެވެ. މި ދެ މީހުން ވެސް މިހާރު ވަނީ ފިލާފައެވެ.

އިންޑިއާގެ ބޮޑުވަޒީރު ނަރެންދުރަ މޯދީ ހިމެނިވަޑައިގަންނަވާހެން އެ ގައުމުގެ އިސް ލީޑަރުން ވަނީ މި ހާދިސާގައި މަރުވި މީހުންގެ އާއިލާތަކަށް ތައުޒިޔާ ފޮނުއްވާފައެވެ. އަދި ހާދިސާގައި ގެއްލުން ލިބުނު އާއިލާތަކަށް އެހީތެރިކަން ފޯރުކޮށްދޭނެ ކަމަށް ސަރުކާރުގެ އިދާރާތަކުން ވަނީ ބުނެފައެވެ.

މި ހާދިސާއާ ގުޅިގެން، އިންޑިއާގެ ހަވާ އުފައްދާ ސިނާއަތުގައި ހުންނަ ސަލާމަތީ މިންގަނޑުތަކާ މެދު އާންމުންގެ މެދުގައި ވަނީ އަނެއްކާވެސް ބޮޑު ކަންބޮޑުވުމެއް އުފެދިފައެވެ. އިންޑިއާގެ މިފަދަ ކާރުޚާނާތަކުގައި ރައްކާތެރިކަމުގެ ފިޔަވަޅުތައް ކުޑަވުމުގެ ސަބަބުން ނުރައްކާތެރި ހާދިސާތައް ހިނގުމަކީ އާންމުކޮށް ދިމާވާ ކަމެކެވެ.

ހާދިސާ ހިނގާފައިވަނީ މިދިޔަ އާދީއްތަ ދުވަހުއެވެ.