ހޮޅި ސަރުކާރުގެ ގަޅި 3 އަހަރު | މުއިއްޒުގެ އުނބަށް ޖެހުން
ގަދަފައި ވިއްދާފައި ނިންމި އެތައް ނިންމުމެއް އަލުން ޖެހުނީ ބަދަލުކުރަން
އުނބަށް ޖެހުމުގައި މުއިއްޒަކީ މިސާލެކެވެ. ގަދަ ބަސްބުނެ ގަދަކަން ދައްކާފައި ކުރިން އޮތް ގޮތް ބަދަލުކޮށްލުމަކީ މުއިއްޒު ކަށީގައި ހިފާފައި ހުންނަ ކަމެކެވެ. އެތައް ދުވަހަކުއްސުރެ ވަކި ގޮތަކަށް ކަމެއް ހިނގަ ހިނގާ އޮންނަނީ ވަރަށް ގިނަ ތަޖުރިބާތަކެއްގެ އަލީގައިކަމެއް މުއިއްޒަކަށް ގަބޫލެއް ނުކުރެވެއެވެ.
އެހެން މީހުން ކަމެއް އޮންނަ ގޮތް ނޫން އެހެން ގޮތަކަށް ކަމެއް ބަދަލުކުރަނީ އެކަމެއްގެ އެކޮޅު މިކޮޅު ބެލުމަށްފަހު ގިނަ ބައެއްގެ ހިޔާލާއި މަޝްވަރާއާއި އެކުގައެވެ. މުއިއްޒު އެހެނެއް ނޫނެވެ. އޮންނަނީ ހިތަށް އެރުމެވެ. ފަހުން ވެދާނެ ގޮތަކަށް ބެލުމެއް ނޯވެއެވެ. އެހެން ކަމުން އެގޮތަށް ކުރި ކަންކަމުން އުނބަށް ޖަހަން ޖެހިފައި ވަނީ އެތައް ކަމެކެވެ.
މުއިއްޒު ވެރިކަމަށް އެރިގޮތަށް އަރާ ތެޅެ ފޮޅެގަތީ ލޭނު މަސްވެރިކަމަށް ހުއްދަ ދޭށެވެ. ލޭނު މަސްވެރިކަމަށް ހުއްދަ ދިނުމަށް މަސައްކަތް ފެށުމުން އެތައް ބަޔަކު ކަން ބޮޑުވުންތައް ފާޅުކުރިއެވެ. އެއިން އެއްވެސް އަޑެއް ނާހާ ލޭނު މަސްވެރިކަމަށް ހުއްދަދޭން ކުރަންޖެހޭ ކަންކަން ކުރުމަށް ވަގުތާއި ފައިސާ ހޭދަކުރިއެވެ. ފިޝަރީޒް މިނިސްޓަކު އެއްރޮއްޖަށް ފޫގަޅައިގެން ކުރީ އެ މަސައްކަތެވެ. ހުރިހާ ތައްޔާރީތައްވެ ހުއްދަދޭ ދުވަސް ކަނޑައެޅިއްޖެއެވެ. ހުއްދަ ދޭން ކަނޑައެޅި ދުވަހަށް އަލިވިލެން އޮތްރޭ ކުއްލިއަކަށް ފެނުނީ ލޭނު އަޅަން ހުއްދަ ނުދޭން ނިންމިތަނެވެ. އުނބަށް ޖެހިތަނެވެ،
އައި ހިކި ހިއްވަރެއްގައި ހުޅުމާލޭ ފޭސް ދޭއްގައި ރައްޔިތުންނާ ބައްދަލުކޮށް ވާހަކަ ދައްކަމުން ހަލި މަގުގައި ހުރި ސޯލާ ހަރުތައް ނަގާ ދަތުރުކޮށްފާ ދާއިރު ރީތިކޮށް ކަނޑު ފެންނަގޮތަށް ހަދާނެކަމަށް ބުންޏެވެ. މުއިއްޒު އެހެން ބުނި އިރު އެކަމަށް ހިނގާނެ ބޮޑު ހަރަދާއި ކަމުގެ ހައްސާސްކަމަކަށް ވިސްނައެއް ނުލައެވެ. އާހިރުގައި އެ ނިންމުން ވެސް ބަދަލުކުރީއެވެ. އުނބަށް ޖެހީއެވެ.
ކާޑެއްދޫ އެއަރޕޯޓާ ހަތް މިނިޓްގެ ރާސްތާއެއްގައި އެއަރޕޯޓެއް އޮއްވާ ތިނަދޫ ފަޅުގައި އެއަރޕޯޓެއް އެޅުމަކީ އިސްރާފެއްކަމަށާއި ކާޑެއްދޫ އެއަރޕޯޓް އިންޓަނޭޝަނަލް ކޮށްފައި ތިނަދުޢާ ގުޅުވާލަން އެދި އެދި ތިއްބާ ގަދަކަން ދައްކަން މުއިއްޒު ދިމާކުރީ ތިނަދޫ ފަޅުގައި އައު އެއަރޕޯޓެއް އެޅުމަށެވެ. ރައްޔިތުންގެ މަޖިލީހުގެ އިންތިހާބާ ދިމާކޮށް ތިނަދޫ ފަޅުގައި އެއާރޕޯޓަކާއި ފްލޯޓިންގ ޓާމިނަލެއް އަޅަން އެއްބަސްވުމެއްގައި ސޮއިކޮށް ހަވާއަރުވާ ހެދިއެވެ، ކަރުދާސް ކުންފުންޏަކަށް 12 ފަޅުރަށް ދީގެން އަޅަން އުޅުނު ތިނަދޫ އިންޓަނޭޝަނަލް އެއަރޕޯޓް ވެސް އެންމެ ފަހުން ނާޅާގޮތަށް ނިންމީއެވެ. އުނބަށް ޖެހީއެވެ.
ހޯހޯ ގޮވަގޮވާ ތިއްބާ ދުންފަތުގެ ބާވަތްތަކުގެ ޑިއުޓީ ބޮޑުކޮށް ދުންފަތަށް ދަތިކޮށް ބިޑިއަނބުރަން ޖައްސާ ސިގިރެޓް ސްމަގުލް ތައާރަފްކޮށް ހެދީ އާނދޮގޭއޭ ބުނަމުންނެވެ. ކަމަކު ދާކަށް ނެތެވެ. މާގިނަ ދުވަހެއްނުވެ ޑަބްލިޔުއެޗްއޯ ބޮލުގައި އަޅުވައިގެން ދުންފަތުގެ ބާވަތްތަކުގެ ޓެކްސް ކުޑަކޮށް ޖެހުނީ ގޮތްދޫކޮށް ތިރިވާށެވެ. ދުންފަތް ޓެކުހުގައިވެސް ޖެހުނީ އުނބަށް ޖަހާށެވެ.
އެހެން ނުހެދުމަށް އެތައް ބަޔަކު އާދޭސް ކޮށްކޮށް ތިއްބާ ޓޫރިޒަމް ޓެކްސް ގާނޫނަށް ބަދަލުގެނެސް ބޭރުގެ ޓުއަރ އޮޕަރޭޓަރުން އަތުން ޓެކްސް ނެގުމަށް ނިންމާ ގާނޫނު ތަސްދީގު ކުރިއެވެ. ޓޫރިޒަމަށް ލިބިދާނެ ގެއްލުމަކަށް އެއްވެސް ބެލުމެއްނެތި ބޭނުންވީ އަތުލެވުނު ގޮތަކުން ފައިސާ ހޯދުމަށެވެ. އެހެންނަމަވެސް ނިންމި ގޮތަކު ނުހުރެވުނެވެ. ގާނޫނު ތަސްދީގު ކުރިތާ ރަނގަޅަށް މަހެއްވެސް ނުވެ އުޅެނިކޮށް ޖެހުނީ ބޭރުގެ ޓުއަރ އޮޕަރޭޓަރުންގެ އަތުން ނަގަން ނިންމި ޓެކްސް ނުނަގާ ގޮތަށް ހަމަޖައްސާ ގާނޫނު އިސްލާހުކޮށް އުނބަށް ޖަހާށެވެ.




