ތަކެތީގެ އަގު އަތްނުފޯރައިގެން ދިޔުން ހުއްޓުވުމުގައި ސަރުކާރު ފޭލިވެއްޖެ: ފައިސަލް ނަސީމް
ސަޕްލައި ދަށްވެ، ތަކެތީގެ އަގު އިންތިހާއަށް މައްޗަށް ދިޔުން
ބާޒާރުގައި ތަކެތީގެ އަގު އަތް ނުފޯރާ ފަށަށް އުފުލިގެން ދިޔަ ނުދިނުމަށް އަޅަންޖެހޭ ފިޔަވަޅުތައް އެޅުމުގައި ސަރުކާރު ދަނީ ފެއިލްވަމުން ކަމަށް ކުރީގެ ރައީސުލްޖުމްހޫރިއްޔާގެ ނައިބު ފައިސަލް ނަސީމް ވިދާޅުވެއްޖެއެވެ.
ފައިސަލް ވިދާޅުވީ އަސާސީ ކާބޯތަކެތީގެ ލިސްޓު ދިގުކުރެވިދާނެ ކަމަށާއި އެ ތަކެތީގެ އަގުތައް އުފުލިގެން ދިޔުން ހުއްޓުވުމުގައި ސަރުކާރު ފޭލިވަމުން ދާކަމަށެވެ.
ފައިސަލް ނަސީމް މިއަދު އެކްސްގައި ކުރެއްވި ޕޯސްޓެއްގައި ވިދާޅުވީ ޑޮލަރެއް ނުލިބޭ ކަމަށާއި ވިޔަފާރިތަކަށް ޓީޓީ ނުހެދޭކަމަށެވެ. "އެކަމުގެ ނަތީޖާ އަކީ ސަޕްލައި ދަށްވެ، ތަކެތީގެ އަގު އިންތިހާއަށް މައްޗަށް ދިޔުން" ކަމަށެވެ،
އިއްޔެއާ ހަމައަށް ކެރެޓު ކިލޯއެއްގެ އަގު ހުރީ 170ރ. ގައި ކަމަށާއި މިދިޔަ އަހަރުގެ އޮކްޓޫބަރު މަހާ އަޅާބަލާއިރު، މި އަހަރުގެ އޮކްޓޫބަރު މަހު އެއްގަމު މަހުގެ ބާވަތްތަކުގެ އަގު %23.97 މައްޗަށް ގޮސްފައި ވާކަމަށް ފައިސަލް ވިދާޅުވިއެވެ. ތަރުކާރީގެ އަގު ވަނީ %22.16 މައްޗަށް ގޮސްފައިކަމަށް ވެސް ފައިސަލް ވިދާޅުވިއެވެ.
މިއަދުގެ ޙަގީގަތަކީ މި ސަރުކާރު އޮތްހާ ހިނދަކު ތަކެތީގެ އަގުތައް އުފުލުމަށް ހުއްޓުމެއް ނާންނާނެކަން ކަމުގައި ކުރީގެ ނައިބު ރައީސް ވިދާޅުވިއެވެ. އަގު ތިރިކުރަން މި ސަރުކާރުން ނިންމި އެއްވެސް ސިޔާސަތަކުން ރަނގަޅު ނަތީޖާއެއް މިހާތަނަށް ފެނިފައި ނުވާކަމަށް ފައިސަލް ނަސީމް ވިދާޅުވިއެވެ.




