ދިވެހީންގެ ރާއްޖެ ބިދޭސީންނަށް ވިއްކާލަން މުއިއްޒު ބޭނުންކަމުގެ ސާބިތުހެކި

ރައްވެހިކަމުގައި ސޭލްއަޅުވާފައި | ބިދޭސީނަށް ރަށްވެހިކަން ވިއްކާ ޕްރޮގްރާމެއް ފެށީ 2025

ދިވެހީންގެ ރާއްޖެ ބިދޭސީންނަށް ވިއްކާލަން މުއިއްޒު ބޭނުންކަމުގެ ސާބިތުހެކި

ބިދޭސީންނަށް ރާއްޖޭން ރައްވެހިކަން ވިއްކުމަކީ މުއިއްޒުގެ އަމާޒެއްކަން ޝައްކެއް ނެތް މިންވަރަށް ސާބިތުވާން އެބައޮތެވެ. ދިވެހި ބަހުން ވާހަކަ ދައްކަން އެނގޭ މުސްލިމަކަށް ނޫނީ ރާއްޖޭގެ ރައްވެހިކަމަކީ ދެވޭ ގޮތަކަށް އޮންނަ ކަމެއް ނޫނެވެ. ލައްކައެއްހާ ޑޮލަރުގެ އިވެސްޓެއް ކޮށްލައިގެން ގަނެލެވޭވަރުގެ "ޗީޕް" އެއްޗަކަށް ކުރިއަކުން ރާއްޖޭގެ ރަށްވެހިކަން ނުވެއެވެ. 

ދުނިޔޭގެ ބޮޑެތި މުޖުރިމުންގެ " ހޮލިޑޭ ހޯމް" އަކަށް ރާއްޖެ ހަދައިގެންވެސް މުއިއްޒު ބޭނުންވަނީ ފައިސާއެވެ. ދިވެހީންގެ ރާއްޖެ ބިދޭސީންގެ ރާއްޖެއަކަށް ހަދާ އިސްލާމް ދީނާއި ދިވެހި ބަހާއި ގައުމުގެ އަސާސީ ރުކުންތަން ކޮމްޕްރަމައިޒް ކޮށްގެންވެސް މުއިއްޒު ބޭނުން ވަނީ ފައިސާއެވެ. ޑްރަގް ލޯޑުންނާއި ޖުވާރީންނާއި ކަނޑުފޭރޭ ޕައިރެޓުންނާއި ކޮންޓެކްޓް ކިލަރުން ވިޔަސް ފައިސާ ދެންޏާ ރައްވެހިކަން ވިއްކަން މުއިއްޒު އެހުރީ ފޫގަޅާފައެވެ. މަހުޖަނުން ކޯޓާ ސޫޓާ ބޫޓާ ޖުއްބާގައި ތިބުމުން ކާކަކީ ކާކުކަން ނޭނގުނަސް ލައްކަލައްކައިން ޑޮލަރު ދެނިކޮން މުއިއްޒަށް ވަރިހަމައެވެ. ރާއްޖޭގެ ރައްވެހިކަން މުއިއްޒު އޮތީ ސޭލް އަޅުވާފައެވެ.

ރާއްޖޭގެ ރައްވެހިކަމުގައި ސޭލް އަޅުވާފައި އޮތްކަން ކަށަވަރުވަނީ ބިދޭސީނަށް ދިވެހި ރަށްވެހިކަން ވިއްކާ ވިޔަފާރި ޕްރޮގްރާމެއް ފެށުމަށް ދިވެހި ސަރުކާރުގެ ފަރާތުން ހެންލީ އެންޑް ޕާޓްނާސްއާ ދެމެދު ތާރީހީ އެއްބަސްވުމެއްގައި ސޮއިކުރުމުންނެވެ. 01 ޖުލައި 2025 ގައި ދިވެހި ސަރުކާރާއެކު ހެންލީ އެންޑް ޕަރޓްނަރސް ކިޔާ ކުންފުންޏާއެކު ބިދޭސީންނަށް ރާއްޖޭން ރައްވެހިކަން ވިއްކުން މާރކެޓްކޮށް ރަށްވެހިކަން ގަންނާނެ މީހުން ހޯދަން ވަނީ ހަވާލުކޮށްފައެވެ. ދިވެހި ސަރުކާރާއި ހެންލީ އެންޑް ޕާޓްނާސް އާއި ދެމެދު އެ ތާރީހީ އެއްބަސްވުމުގައި ސޮއިކުރި ހިސާބުން މުއިއްޒަށް އަރާނެ ގެ އެވަނީ ހުސްވެފައެވެ. ތަފާތު ދީންތަކުގެ މީހުން ރަށްވެހިވާން ހުޅުވާ ލެވުނީއެވެ. 

ހެންލީ އެންޑް ޕާޓްނަރސްއަކީ ފުޅާ ދާއިރާއެއްގައި އެއް ގައުމުގެ ރައްޔިތުންނަށް އަނެއް ގައުމެއްގެ ރައްޔިތުކަން ހޯދާދިނުމުގެ ވިޔަފާރީގައި އަރާ އޮތް ކުންފުންޏެކެވެ. ހޭންލީ އެންޑް ޕާޓްނާރސް މެދުވެރިވެގެން އެތައް ހާސް އިޒްރޭލް މީހުނަށް ދުނިޔޭގެ އެކި ގައުމުތަކުން ރައްވެހިކަން ހޯދާ ދީފައިވެއެވެ. ހެންލީ އެންޑް ޕާޓްނަރސް ގެ މާރކެޓިންގ 2 އޮފީސް އިޒްރޭލުގެ ދެ ހިސާބެއްގައި ގާއިމުކޮށްފައި ހުރެއެވެ. 

ރާއްޖޭގެ އެއްކޮޅުން އަނެއްކޮޅަށް އެސްއީޒެޑް ޓައުންޝިޕް ރަށްވެހިކަން ވިއްކާ (ރެސިޑެންސް ބައި އިންވެސްޓްމަންޓް) ދިވެހި ދައުލަތުގެ ތެރޭގައި ސަހުޔޫނީ ދައުލަތެއް އުފަންކުރުމަށް މަސައްކަތް ކުރާކަމަށް ގަބޫލުކުރެވެނީ އެހެން ވެގެންނެވެ. އިޒްރޭލަށް އިހުތިރާމް ކުރުމުގެ ބައިނަލްއަގުވާމީ އެޖެންޑާގެ ތެރެއިން ހެންލީ އެންޑް ޕާޓްނަރސްގެ އަމާޒަކީ ދިވެހި ދައުލަތުގެ ތެރޭގައި ސަހުޔޫނީ ދައުލަތެއް އުފަންކުރުމާއި ސައްތައިން ސައްތަ މުސްލިމު ދައުލަތުގެ ސިފަ ރާއްޖެއިން ނައްތާލުމަށް ޕްރޮގްރާމެއް އެކުލަވާލައި ތަންފީޒުކުރުމެވެ. 

މުއިއްޒު ސަރުކާރަށް ވިޔަފާރި ކަންކަމުގައި ލަފާދޭ ކުންފުންޏަކީ ވެސް ހެންލީ އެންޑް ޕާޓްނާސްއެވެ. ސިންގަޕޫރުގެ ސެންޓޯސާ އައިލެންޑްގައި ބޭއްވި މޯލްޑިވްސް-ސިންގަޕޫރު ބިޒްނަސް ފޯރަމް 2025 ގެ ހަވާސާގައި ބޭއްވި ރަސްމިއްޔާތުގައި ސޮއިކުރެވިގެން ދިޔައީ ދިވެހީންގެ ރާއްޖެ ބޭރު މީހުންނަށް ވިއްކާލުމުގެ ހަގީގީ އެއްބަސް ވުމުގައެވެ. ހަގީގަތް އޮޅުވައެއް ނުލެވޭނެއެވެ. ސާބިތު ހެކި އެހުރީ ފެންނާށެވެ.