ރައްޔިތުންގެ ޖީބަށް ނުވަނަސް މަޖިލީހަށް ޑޮލަރ ވަދެއްޖެ: މީކާއީލް
ރިޝްވަތަށް ވޯޓުވިއްކާ މެންބަރުން ޖަވާބުދާރީ ކުރުވަން ރައްޔިތުން ނިކުންނަންޖެހޭ
ދިވެހިރާއްޖޭގެ ރައްޔިތުންގެ ޖީބަށް ޑޮލަރު ނުވަނަސް ރައްޔިތުންގެ މަޖިލިސް ޑޮލަރުން ތިޔާގިވެއްޖެ ކަމަށް ގަލޮޅު އުތުރު ދާއިރާގެ މެންބަރ މީކާއީލް ނަްސީމް ވިދާޅުވެއްޖެއެވެ.
ރަސްމާލެއިން 500 ހެކްޓަރ ބިން އަބޫދާބީ އީގަލް ހިލްސް ކުންފުންޏަށް ދިނުމަށް ފާސްކުރަން އުޅޭ ދިވެހިރާއްޖޭގެ ރިއަލް އެސްޓޭޓް ވިޔަފާރީގެ ބިލަށް ބަހުސް ކުރައްވަމުން މިއަދު މީކާއީލް ވިދަޅުވީ "ރައްޔިތުންގެ މަޖިލީހުގެ ޕީއެންސީ މެންބަރުން ޑޮލަރުން ތިޔާގިވެއްޖެ" ކަމަށެވެ.
މަޖިލީހުގެ ޖަލްސާގައި މިކާއީލް ނަސީމް ހައްދަވަނީ ތެދުކަމަށް ވިދާޅުވަމުން މަޖިލީހުގެ ރިޔާސަތަށް އިޝާރާތް ކުރައްވާ މީކާއީލް ވިދާޅުވީ "އަޅުގަނޑު މި ހަދަނީ ތެދު، އަޅުގަނޑު މި ހަދަނީ ތެދު، ދިވެހިރާއްޖެއަށް ޑޮލަރު ވަދެއްޖެ، މި ރައްޔިތުންގެ މަޖިލީހަށް ޑޮލަރު ވަދެއްޖެ، ދިވެހިރާއްޖޭގެ ރައްޔިތުންގެ ޖީބަށް ޑޮލަރު ނުވަނަސް މި ރައްޔިތުންގެ މަޖިލިސް ޑޮލަރުން ތިޔާގިވެއްޖެ، މި ރައްޔިތުންގެ މަޖިލީހުގެ ޕީއެންސީ މެންބަރުން ޑޮލަރުން ތިޔާގިވެއްޖެ، ދިވެހިންގެ ބިން ވިއްކާލަން ތައްޔާރުވެއްޖެ،" ކަމަށެވެ.
ރޭގެ ވަގުތެއްގައި ކަޅު ދަބަހެއް ހިއްޕަވައިގެން ހައުސިންގ މިނިސްޓަރ އަބްދުއްލާ މުއްތަލިބު މަޖިލީހަށް ވަދެވަޑައިގެންނެވީ މަޖިލީހުގެ ޕީއެންސީ މެންބަރުންގެ އަނގައިގައި ތަޅު އެޅުވުމަށް ކަމަށް އެމްޑީޕީއަށް ނިސްބަތްވެ ވަޑައިގަންނަވާ މެންބަރ މީކާއީލް ނަސީމް ތުހުމަތު ކުރެއްވިއެވެ.
ރަސްމާލޭގައި ސަރުކާރުން ހިންގަން އުޅޭ ބޭރުގެ މަހުޖަނުުން ވަޒަންވެރި ކުރުވާ މަޝްރުއާއި އެ މަޝްރޫހު ހިންގަން ފާސްކުރަންއުޅޭ ރިއަލް އެސްޓޭޓް ވިޔަފާރީގެ ބިލާމެދު ރައްޔިތުންގެ ކަންބޮޑުވުން އޮވެގެން އެބިލް އެގޮތަށް ފާސްނުކުރުމަށް މެންބަރުންނަށް ދަނީ ގޮވާލެވެމުންނެވެ. ރައްޔިތުން ކަންބޮޑުވެ ދާއިރާތަކުގެ މެންބަރުންނަށް އިލްތިމާސް ކުރަމުން ދަނިކޮށް ކަޅުދަބަހެއް ހިއްޕަވައިގެން ވަޒީރު މުއްތޮލިބު ރޭނގަޑުގެ ވަގުތެއްގައި މަޖިލީހަށް ވަދެ ޕީއެންސީ މެންބަރުންނަށް ރިޝްވަތު ދެއްވާފައި ވާކަމަށް އެތައް ބަޔަކު ދަނީ ތުހުމަތު ކުރަމުންނެވެ.
އޮނަރަބަލް މީކާއީލް ނަސީމް މަޖިލީހުގައި އެ ދެއްކެވީ އެ ވާހަކައެވެ. އެ ވާހަކަ އަޑުއަހާކަށް ފަސޭހައެއް ނުވާނެއެވެ. ތަޅުމުން ބޭރުކޮށްލަންދެން މީކާއީލް ދެއްކެވީ ދައްކަވަންޖެހޭ ހައްގު ވާހަކައެކެވެ. އަޑުހަރުކޮށް ބާރަށް ދައްކަންޖެހޭ ވާހަކައެވެ. ރިޝްވަތު ނަގައިގެން ސަރުކާރު ބޭނުންވާހާ ގޮތަކަށް ގާނޫނު ފާސްކުރުމަށް ވޯޓުދޭ މެންބަރުން ޖަވާބުދާރީ ކުރުވަން ރައްޔިތުން ނިކުންނަން ޖެހެއެވެ.
މީކާއީލް ވިދާޅުވާހެން ގިނަ ބަޔަކު ގަބޫލުކުރާ ގޮތުގައި އަލައްބާރުގެ ކަޅު ފައިސާ މަޖިޅިހަށް ވަދެ ޕީއެންސީ މެންބަރުންގެ ޖީބުތައް ފުރާލައިފިއެވެ. ތެދެކެވެ. ރައްޔިތުންގެ ޖީބަށް ޑޮލަރު ނުވަނަސް މަޖިޅިހަށް ޑޮލަރު ވަދެއްޖެއެވެ.




