މާލޭ ހުކުރު މިސްކިތު 450 ކޮޑި ހައިވަކަރު ނީލަމުގައި ވިއްކާލިކަން ފަޅާއަރައިފި

މާލޭ ހުކުރު މިސްކިތް މިހާރު އެ ވަނީ ވީރާނަވެދާން ދޫކޮށްލާފައި: ތޯރިގު

މާލޭ ހުކުރު މިސްކިތު 450 ކޮޑި ހައިވަކަރު ނީލަމުގައި ވިއްކާލިކަން ފަޅާއަރައިފި

އިންޑިއާ ސަރުކާރާއި ދިވެހި ސަރުކާރާ ދެމެދު ވެވިފައިވާ އެއްބަސްވުމެއްގެ ދަށުން ރާއްޖޭގެ ތަރިކަ ރައްކާތެރި ކުރުމުގެ މަޝްރޫއުގެ ދަށުން މާލޭ ހުކުރު މިސްކިތުގެ އާބާތުރަ ފިލުވުމަށް ކުރީ ސަރުކާރުގެ ދުވަސްވަރު އިންޑިއާގެ ހިލޭ އެހީގާ ރާއްޖެއަށް ގެނެސްފައިވާ 450 ކޮޑި ހައިވަކަރާއި އަގުހުރި އެތައް މުދަލެއް ނުއަގުގައި ނީލަމުގައި ވިއްލާލާފައިވާކަން ފަޅާއަރައިފިއެވެ. 

ރައީސް މުއިއްޒު ވެރިކަމުގައި ވޭތުވެދިޔަ 3 އަހަރު ތެރޭގައި މާލޭ ހުކުރު މިސްކިތުގެ އާބާތުރަ ފިލުވުމުގެ އެއްވެސް ކަމެއް ނުކުރާކަމަށް ތަރިކަ ރައްކާތެރި ކުރުމާބެހޭ މާހިރެއް ކަމުގައިވާ މުހައްމަދު ތޯރިގު (މަނަދޫ ތޯރިގު) ވިދާޅުވެއެވެ. މަނަދޫ ތޯރިގަކީ ތަރިކައާއިބެހޭ ވުޒާރާގެ ސްޓޭޓް މިނިސްޓަރުކަން ކުރީ ސަރުކާރުގައި ކުރައްވާފައިވާ ބޭފުޅެކެވެ. 

ހަމަގައިމުވެސް މި ސަރުކާރު އައިއިރު މާލޭ ހުކުރު މިސްކިތް އާބާތުރަ ފިލުވައި، ގިނަ ދުވަހަށް ރައްކާތެރި ކުރުމަށް ފަރުވާ ދިނުމުގެ މަސައްކަތް ދިޔައީ އެކަމުގެ ތަޖުރިބާކާރު ޓީމަކުން ކުރަމުންކަމަށް ތާރިގު ވިދާޅުވިއެވެ. މި ސަރުކާރުން ކުރެއްވި ކަމެއްގެ ގޮތުގައި ފާހަގަ ކުރެވިފައި ވަނީ އެ މަސައްކަތް ކުރަމުންދިޔަ ޓީމު ފޮނުވާލުމަށް ފަހު ހުކުރު މިސްކިތުގެ މަސައްކަތަށް ގެނެސްފައިވާ މޮޅު ހައިވަކަރު ބެރިތަކާއި އެނޫންވެސް ތަކެތި ނީލަން ކިޔަން ދޫކޮށްލުން ކަމަށްވެސް ތޯރިގު ވިދާޅުވެއެވެ. މާލޭ ހުކުރު މިސްކިތް މިހާރު އެ ވަނީ ވީރާނަވެދާން ދޫކޮށްލާފައި ކަމަށްވެސް ތޯރިގު ވިދާޅުވެއެވެ.
ހުކުރު މިސްކިތުގެ އާބާތުރަ ފިލުވުމަށް ރާއްޖެ ގެނެސްފައިވާ 450 ކޮޑީގެ ހައިވަކަރުގެ އިތުރަށް ނީލަމުގައި ވިއްކާލި ތަކެތީގެ ތެރޭގައި 1800 ދަގަނޑު ހޮޅިއާއި 170 ބަސްތާ އުވަ އާއި 200 ބަސްތާ އީޓް ކުނޑި ހިމެނޭކަމަށް މައުލޫމާތު އެގޭ ފަރާތަކުން ހީރަސްއަށް ވަނީ މައުލޫމާތު ދީފައެވެ. އެ ތަކެތި ބަހައްޓާފައި ހުރީ ސޯސަންގޭ ގޯތި ތެރޭގައި ކަމަށާއި އެތަކެތި އެހެން ހުރި ހުރުމުގައި ކޮންޓޭނަރެއްގެ ހޮޅިބިޑި ވަގަށް ނަގާފައިވާކަމަށް ވެސް މައުލޫމާތު ލިބިފައިވެއެވެ. 
ކޮޑިއަކަށް ގާތްގަޑަކަށް 500 ރުފިޔާގެ ދަށް އަގެއްގައި ނީލަމުގައި ވިއްކާލި ވަރުގެ މޮޅު ހައިވަކަރު ކޮޑިއެއްގެ ބާޒާރުއަގަކީ ކޮޑިއެއް -/12300 ރުފިޔާ ކަމަށް މައުލޫމާތު ލިބިފައިވެއެވެ. ނީލަމުގައި ވިއްކާލުމުން އެތަކެތީގެ ނީލަން ނެގީ ސެކުއަރ ބޭގުން ކަމަށް ހަބަރު ލިބެއެވެ.