ހޮޅި ސަރުކާރުގެ ގަޅި 3 އަހަރު | އިންޑިއާ އައުޓް އުބަށްޖެހުން
ރާއްޖެއަކީ އާބާދީ ކުޑަޔަސް ބައެއްގެ ބެކްޔާޑްގައި އޮތް ގައުމެއް ނޫން: މުއިއްޒު
ޑރ. މުއިއްޒު ރާއްޖޭގެ ވެރިކަމާ ހަވާލުވީ ފަހުން 3 އަހަރުވީއެވެ. މުއިއްޒުގެ ވެރިކަމަކީ ތާރީހުގައިވެސް މުޅި ރައްޔިތުންނަށް އެންމެ ދަތި އުދަގޫ ތިން އަހަރުކަމަށް އިއްތިފާގުވެއެވެ. ކަމެއް ރަނގަޅަށް ނުކުރެވޭތާ ރައްޔިތުންނަށް ވީދައްޗެވެ. އުދަގުލެވެ. ލިބުނީ އަނިޔާއެވެ.
މުއިއްޒަކީ އެހެން ވެރިންނަށް އަތްލަންނުކެރޭ ތަންތާ އަތްލާ ވެރިއެއްގޮތުގައި ސިފަކުރީ ރައްޔިތުންގެ މަޖިލީހުގެ ކުރީގެ ނައިބު ރައީސް އަހުމަދު ނާޒިމެވެ. ނާޒިމަކީ މުއިއްޒު ވެރިކަމަށް ދޮންކުރުމުގައި އެންމެ ބޮޑަށް މަސައްކަތްކުރި މުއިއްޒުގެ ދެބެންގެ ދެދަރި ބޭބެއެކެވެ. އަތްލަން ނުކެރޭތަންތާ އަތްލަން ކެރުނު ވަރުން މަޖިލީހުގެ ނައިބު ރައީސް ކަމުން ނާޒިމް ވަކިކުރުވާ ފިއްޓޭ ވިދާޅުވާހެން އެހުންނަނީ ސާދަލައްބައިގެ ފަހަތަށް ޖައްސާފައެވެ.
ދައްކަން މިއުޅެނީ ނާޒިމް ފޭކޮށްލި ގޮތުގެ ވާހަކައެއް ނޫނެވެ. ނާޒިމު އެބުނި އަތްލަތް ނުކެރޭ ތަންތާ އަތްލައިގެން އުނބަށް ޖަހަން ޖެހުނު ވާހަކައެވެ. މުއިއްޒު ވެރިކަމަކީ އުނބަށްޖެހުމުގެ ރެކޯޑް ހެދި ވެރިކަމެކެވެ.
އެންމެ ފުރަތަމަ އިންޑިއާ ސިފައިންގެ ވާހަކައެވެ. ބޫޓު ކިބައެއް ވެސް ނުބަހަޢްޓާ ބާލައިލަން ބުނި އިންޑިއާ ސިފައިންގެ ބޭލުނީ ޔުނީފޯމެވެ. ހެލްކޮޕްޓަރތަކާއި ޑޯނިއާ ބޯޓު ރާއްޖޭގައި އޮވެގެން ކުރިންވެސް އެކުރި މަސައްކަތެއް ކުރިއަށް ވުރެވެސް ބޮޑަށް މިހާރު އެބަކުރެއެވެ.
ރާއްޖެއަކީ އާބާދީ ކުޑަޔަސް ބައެއްގެ ބެކްޔާޑްގައި އޮތް ގައުމެއް ނޫންކަމަށާއި އެތައް ގައުމެއްގެ އައްސޭރިފަށް ހިއްސާކުރާ ރާއްޖެ އޮތް ކަނޑަކީ އިންޑިޔާގެ ކަނޑެއް ނޫންކަމަށް ބުނެ ދުނިޔޭގެ އެންމެ ބައިބޯ ގައުމާ ޗެލެންޖުކުރިއެވެ. އިންޑިއާގެ އެހީއަށް ބަރޯސާވުން ނިންމާ އިންޑިއާއިން ނަގާފައިވާ ލޯނެއްގެ ފައިސާ ވެސް އާނދޮގޭ ކިޔާފާ މުއްދަތުގެ މާކުރިން ދައްކާ ނިންމާލިއެވެ. ދަށުނުވާނެކަން ދެއްކުމަށެވެ.
ޔޫރަޕުން ބޭހާއި ތުރުކީން ކާޑާއި ޕާކިސްތާނުން ފިޔާ އަލުވި ކުކުޅުބިސް ގެންނަން ވަރުދައްކާލިއެވެ. ދިވެހިން ބޭސްފަރުވާ ހޯދަން ފޮނުވަން ނިންމީ ބެންކޮކާއި ދުބާއީއަށެވެ. މޯލްޑިވިއަންގެ ބައުބޯޓު ގަޑެއްގައި ކުރަހައިގެން އެއަރ އެންބިއުލާންސް ހަދާ ލަންކާއާއި ބެންކޮކަށް ކުއްލިފަރުވާގެ ބަލިމީހުން އުފުލަން ނިންމިއެވެ.
ލަންކާއަށް ކުރި އެންމެ ދަތުރަކާއެކު އެއަރ އެމްބިއުލާންސް ބަނޑު ބިންމަތީ ޖެހިގޮތަށް އުދުއްސައެއް ނުގަތެވެ. ޕާކިސްތާނުން ބިހާ އަލުއްވާ ފިޔާ ގެންނާނެ ހަކަތައެއް ނެތެވެ. ތުރުކީން ގެންނަ ކާޑު ޅަދަށުވެ ނިމުނީއެވެ. ހާމަކުރަން ބުނި އެއްބަސްވުންތައް ބޮޑު ސިއްރަށްވެ ބަޑިއަށްލާ އުނުގާއެޅީއެވެ.
އަތްލަން ނުކެރުނު ތަންތާނގައި އަތްލައިގެން ކެތެއް ނުވިއެވެ. އަތް ފިހި މާލީއެވެ. ގޮތް ހުސްވެ ރޮއިހޭރި ވެއްޓި ކަލާކޮއްޓަކާ ގޮވާ އާދޭސްކޮށްގެން އިހުނަށްވުރެ ބޮޑަށް އިންޑިއާގެ އުނގަށް ވެއްޓުނީއެވެ. ބެންކޮކް އާސަންދަ ލިބެނީ ހުވަފެނުގައެވެ. އާސަންދަ ހޮޅި ގުޅިފައި އޮންނަނީ ދެކުނު އިންޑިއާގެ ކެރަލާ އާއި ޓެމިލްނާޑޫ އާއި ކަރނާޓަކާގެ ހޮސްޕިޓާތަކަށެވެ.
ބޭސް ފަރުވާއާއި ކާބޯތަކެތި ހޯދުމުގެ އިތުރަށް މިލިޓަރީ ކަންކަމާއި މާލީ ކަންކަމުގައި އިހުނަށްވުރެ ބޮޑަށް މުއިއްޒު ސަރުކާރުން އިންޑިއާއަށް އޮތީ ބަރޯސާވެފައެވެ. އިންޑިއާ އާއި މުޅިން ވަތްކަނޑާލަން އުޅުނު އިރުހީވީ ފިސާރި ގޮތް ފޮތް އޮވެގެން ހަކަތަ ހުރެގެން އުޅުނު ހެންނެވެ. އާހިރުގައި އަގުޅިނެތް ކަންނޭލަކަށްްވެ ޖެހުނީ އިންޑީއާ އައުޓް އުނބަށް ޖަހާށެވެ.




