ޖަލުތައް ފުރާލަންޏާ ފުރާލަންވީ | ކުރާވައްކަމުގެ ވާހަކަ ދައްކާނެ: ގަޕޯ

އަމިއްލަ އަބުރު އަމިއްލައަށް ނަގާލުމުން ގާނޫނުން ހޯދާދޭނެ ހިމާޔަތެއް ނޯންނާނެ

ޖަލުތައް ފުރާލަންޏާ ފުރާލަންވީ | ކުރާވައްކަމުގެ ވާހަކަ ދައްކާނެ: ގަޕޯ

އަމިއްލައަށް އަބުރު ގެއްލޭ ކަންކަން ކުރާ އެއްވެސް މީހަކަށް ގާނޫނުން ރައްކާތެރިކޮށް ދެވޭނެ އަބުރެއް ނޯންނާނެއެވެ. ހަނިމާދޫ ދާއިރާގެ އިއްޒަތްތެރި މެންބަރ އަބްދުލްގަފޫރު މޫސާ (ގަޕޯ) ވިދާޅުވާހެން އަމިއްލަ ނަފުސުން އެ މީހާގެ އަބުރަށް އަރައިގަތީމާ ރައްޔިތުން އެ ވާހަކަދައްކާނެއެވެ. އެއްވެސް މީހަކު އެއްވެސް ކަމެއް ނުކޮށް ހުއްޓަކައި، އެއްވެސް މީހަކު އެއްވެސްކަހަލަ ކަމެއް ނުކޮށް ހުއްޓަކައި އެ މީހަކާ ގުޅޭގޮތުން ގޯސް ވާހަކައެއް މީހުން ނުދައްކާނެއެވެ. 

ގަޕޯ ވިދާޅުވާހެންް ޖަލުތައް ފުރާލަންޏާ ޖަލުތައް ފުރާލަންވީއެވެ. ރައްޔިތުން ތިބީކީއެއް ފަހަތަށް ޖެހޭގޮތަކަށް ނޫނެވެ. މުޅި ދައުލަތް ނޮޅައި ވީދާ ކުދިކޮށް ކާއިރުގައި ރައްޔިތުން އަނގައިން ނުބުނެ ތިބުމަކީ ދީނީގޮތުން ވެސް ފަރުދީގޮތުން ވެސް ގައުމީ ގޮތުން ވެސް އެ މީހުން ކޮށްގެން ވާނެކަމެއް ނޫނެވެ. 

ދިވެހިންގެ ފައިސާއިން ކުރާ ހަރަދާއި އެ ފައިސާއިން ކުރަނީ ކޮން ކަމެއްކަން ރައްޔިތުންނަށް އެނގެން ޖެހޭނެއެވެ، އެހެން ނޫނީ ގަޕޯ ވިދާޅުވާހެން އެވާހަކަ ދައްކާނެއެވެ. ވައްކަމާއި ކޮރަޕްޝަނާއި ހައްދުފަހަނަ އެޅީމާ ވެސް ދިވެހިރައްޔިތުން އެވާހަކަ ނުދައްކާ ތިބެންވީތޯ ގަޕޯ ސުވާލު އުފައްދަވައެވެ. 

އެމީހެއްގެ އަބުރު ރައްކާތެރި ކުރުމަކީ އެމީހަކަށް އޮތް ދީނީ އަދި ގާނޫނީ ޒިންމާއެކެވެ. އެކަން ނުކޮށް ތިމާ ހިތުހުރި ކަމެއް ހިތުހުރި ގޮތަކަށް ކުރަމުން ގެންދިޔައީމާ އެ ވާހަކަ މީހުން ދައްކާނެ ކަމަށް ގަޕޯ ވިދާޅުވެއެވެ. 

ކުރީގެ އެއްވެސް ސަރުކާރަކަށް ބަޖެޓުގެ ގޮތުގައި ފައިސާ ނުލިބޭ ވަރަށް މުއިއްޒުގެ މިސަރުކާރަށް ބަޖެޓުން ފައިސާ ލިބުނު ނަމަވެސް، ރާއްޖޭގެ ރަށްރަށުގައި ހިނގަނީ ކޮން މަޝްރޫއުއެއްތޯ ގަޕޯ ވަނީ ސުވާލުކުރައްވާފައެވެ. ރައްޔިތުން ދައްކަނީ އެވާހަކައެވެ. ގާނޫނަކުން މަނާ ކުރިޔަސް އެޥާހަކަ ދެއްކުމެއް ނުހުއްޓުވޭނެއެވެ.

އަބުރުގެ ގަނޫނެއް ހަދައިގެން ދިވެހިންނަށް ބިރުދައްކައި ނޫސްވެރިންގެ އަނގައިގައި ޓޭޕު އަޅަން މަސައްކަތްކުރި ނަމަވެސް، އެކަން ނުކުރެވޭނެ ކަމަށް ވެސް ގަޕޯ ވިދާޅުވެއެވެ.  އެއްޔަކީ ރައްޔިތުން ބަލައިގަންނާނެ ކަމެއް ވެސް ނޫން ކަމަށް ހަަނިމާދޫ ދާއިރާގެ މެންބަރު، އަބްދުލްގަފޫރު މޫސާ ވިދާޅުވެއެވެ.