ހީރަސް ރެސިޕީ: ކަރާ ސަރުބަތު
ހީރަސް ރެސިޕީގައި ހިމަނައި މިލަނީ ރޯދަވީއްލާ ގަޑިއަށް ވަރަށް ހާއްސަ، ހަށިގަނޑަށް ފިނިކަން ގެނެސްދޭ މީރު ބުއިމެއް ކަމަށްވާ ކަރާ ސަރުބަތެވެ. މުޅި ދުވަހުގެ ކަރުހިއްލުން ފިލުވާލުމަށް އެންމެ އެކަށީގެންވާ އެކައްޗަކީ ކަރާ ސަރުބަތެވެ.
ބޭނުންވާ ތަކެތި:
2 ޖޯޑު ކަރާ (އޮށް ނެތް، ކުދިކޮށް ކޮށާފައި)
1 ސަމުސާ އިސްބަޢުލް
1 ޖޯޑު ފިނި ކިރު
2 ނުވަތަ 3 ސަމުސާ ރޯޒް ސިރަޕް
އައިސް ކިއުބް (ގަނޑުފެން)
ތައްޔާރުކުރާނެ ގޮތް:
- އެންމެ ފުރަތަމަ އިސްބަޢުލް ފެނަށް އަޅައި 10 ނުވަތަ 15 މިނެޓު ވަންދެން ފޯކުރަން ބަހައްޓާށެވެ.
- ބުއިން ތައްޔާރުކުރާ ތަށްޓަށް ނުވަތަ ބޯތަށްޓަށް ކަރާ ކޮށާފައި އަޅާށެވެ.
- ކަރާތަށީގެ ތެރެއަށް ފިނި ކިރުކޮޅު އޮއްސާލާށެވެ.
- ފޯވެފައި ހުރި އިސްބަގުލް ކޮޅު އެއްކޮށްލާށެވެ.
- އޭގެ މައްޗަށް ރޯޒް ސިރަޕް އަޅާށެވެ.
- އައިސް ކިއުބް އެޅުމަށްފަހު ރަނގަޅަށް ގިރާލާށެވެ.
މީރު މި ބުއިން ބޭނުން ކުރައްވާނީ ފިނިކޮށް ބަހައްޓައިގެންނެވެ.
