މުއިއްޒަކީ ހުރި ބޮލެއް | ކޮންޓްރޯލް އޮތީ އަދީބު އަތުގަ!

ރަސްމާލެ އަދީބުގެ ޑްރީމް އައިލެންޑް

މުއިއްޒަކީ ހުރި ބޮލެއް | ކޮންޓްރޯލް އޮތީ އަދީބު އަތުގަ!

ރާއްޖޭގެ ރައީސް ކަމުގައި މިއަދު ހުރި މުއިއްޒަކީ އެހިނދަކަށް ކުޅެންޖެހޭ ޑްރާމާ ކުޅެން ބަހައްޓާފައި ހުންނަ މީހެކެވެ. އުޅޭ ގޮތުންނާއި ކުރާކަންކަމުން މުއިއްޒަކީ ޗާބީ ދީފައި ހުންނަ ބުދެކޭ ތަފާތެއް ނުހުރޭ ނޫންހެއްޔެވެ. މުއިއްޒުގެ ކޮންޓްރޯލް މުއިއްޒަށް ވެސް އޮންނަ ކަމަކަށް ނުވެއެވެ. ގިނަ ބަޔަކު ހީކުރާހެން މުއިއްޒު ކޮންޓްރޯލް ކުރަނީ ސާޖިދާއެއް އަލައްބާރެއް ނޫނެވެ. މުއިއްޒުގެ ކޮންޓްރޯލް އޮތީ އެއަށްވުރެ މާ ބާރުގަދަ މީހެއްގެ އަތުގައެވެ. 

ހަގީގަތަކީ ރައީސް ޔާމީނުގެ ވެރިކަމުއްސުރެ ބާރުގަދަ އަތަކުން މުޅި ދައުލަތް ހިސޯރުކޮށްފައި އޮތްކަމެވެ. ޑރ. ވަހީދުގެ ވެރިކަމުއްސުރެ މުއިއްޒާއި ކާނަލް ނާޒިމާއި އަދީބަކީ އެއްގަލުން ފެހިކާ ލަނޑާ ތަކެއް ފަދަ ބައެކެވެ. އާތަރު ބްރަދާސް ފަދަ މާފިޔާ ގޭންގުތައް ގެނެސް އޮޅުކުރުމުގައި އޭރުވެސް އަދީބަކީ އަރާހުރި މީހެކެވެ. ރައީސް ޔާމީނު ވެރިކަމުގައިވެސް އެކަން އޮތީ އެހެނެވެ.

އެހެންކަމުން އެއް އުރައެއްގައި ދެކަނޑި ނޯންނާނޭހެން ރައީސް ޔާމީނުގެ ވެރިކަމެއްގައި ރައީސް ޔާމީނުގެ ޒަމާންވީ މިތުރު ނަމިރާ ނާޒިމަށް 25 އަހަރުގެ ޖަލުހުކުމެއް އިއްވާ ނާޒިމް ޖަލަށްލީ ލުމުން އެކަނިވެސް ދައުލަތުގެ ބާރުތައް މީހެއްގެ މުށުތެރެއަށް ލާފައި އޮތްކަން ސާފުވެގެން ދެއެވެ. މާލޭ ފެންކާރިސާއަށް ފަހު ކާނަލް ނާޒިމްގެ މަގުބޫލުކަން ބޮޑުވުމުން ކާނަލް ނާޒިމަށް ހަދާލިގޮތްވެސް ފެނިގެން ދިޔައެވެ. އެހުރިހާ ކަންކަން ހިނގާ ނިމި ދިޔައިރުވެސް މުއިއްޒުހުރީ ބަސްއަހައިގެންނެވެ.

ކަންކަން ވެގެން ދިޔަގޮތުން ރައީސް ޔާމީނުގެ މައްޗަށް ގަދަނުވެވި އަދީބަށް ޖެހުނީ ޖަލުގެ ތޭރިތަކުގެ ފަހަތަށް ދާށެވެ. ޖަލުގައި އޮތެއް ކަމަކު ދައުލަތުގެ ތެރެއިން އަދީބުގެ އާރާބާރު ނައްތާނުލެވުނުތާ ކުޑައެއްވެސް ނުކުރެވުނެވެ. އެކަމުގެ ހެއްކަކީ ވެރިކަން ނިމިނިމި އޮއްވާ ގާނޫނީ އޮނިގަނޑުގެ ތެރެއަށް ފައްތައިގެން ބޮޑު މުޖުރިމަކު މިނިވަން ކުރުމަކީ ވެރިއަކަށް ފަސޭހަވާނެ ކަމެއް ކަމަށް ނުވިޔަސް ނިޒާމުގެ ތެރެއިން ބޮޑު މުޖުރިމަކު މިނިވަންވުމެވެ. 

މިނިވަންވުމާއެކު ދިޔަތާކަށް ގޮސް ނިޒާމުން ބޭރުވެ އާއްމުންގެ ލޯތަކަށް ފަރުދާވެއްޖެއެވެ. އެހެނެއް ކަމަކު ހިނދުކޮޅަކަށް ވެސް އަދީބު ބްރޯގެ ލޮލުން ރާއްޖެ ކައްސަލައިގެނެއް ނުދެއެވެ. ވާނީ އެހެންތާއެވެ. އާރާ ބާރުގައި ހުރި އިރު ބަދަހިވި ގުޅުންތަކުން ދުނިޔޭގެ އެތައް މަހުޖަނަކު ތިބީ އަތާ އަތް ގުޅާ ލައިގެންނެވެ. ޑްރަގްލޯޑުންނާއި ކޮން އާޓިސްޓުންނާއި މާފިއާ ގޭންގްތަކާ ބްރޯގެ ގުޅުމަކީ އިމެއް މިނެއް ނެތް ފުން ގުޅުމެކެވެ. 

ބުނެވޭ ގޮތުގައި އިންތިހާބުގައި ދެކޮޅަށްވެސް ބްރޯ ދިޔައީ އަޅަމުންނެވެ. ކޮންމެ ބަޔަކަށް ކާމިޔާބު ވިޔަސް އުފެދޭނީ ބްރޯގެ ގޮނޑިކޮއްކޮ ސަރުކާރެއްކަމަށް ބަލައިގެންނެވެ. އިންތިހާބުގެ ދެވަނަ ބުރު ނިމުނުއިރު ވެރިކަމަށް ހޮވުނީ ސިޔާސީ ބުރަދަނެއް ނެތް ގޮނޑިކޮއްކޮ ގޮފަޅު އެކުވެރިޔާ ކަމަށް ވުންވީ ބްރޯގެ ނަސީބަށެވެ. 

އިންތިހާބު ނިމި ހުވާވެސް ނުކުރަނީސް ޖެޓެއް ފޮނުވައިގެން އިންތިހާބީ ރައީސް ދުބާއީއަށް ގެންގޮސް އަދީބު އަތަށް މުއިއްޒުގެ ކޮންޓްރޯލް ނެގިއެވެ. އިންވެސްޓަރުންނާއި ފައިސާ ދައްކައިގެންނެވެ. ސަރުކާރުގެ ތެރެއިން އަދީބު ބޭނުންވާ ބަޔަކަށް ވަޒީރުކަމާއި ސިޔާސީ މަގާމާއި ފައިސާ ލިބޭނެ ދޮރުތައް ހުޅުވާދިނުން ލާޒިމުކުރިއެވެ. މުއިއްޒު ސަރުކާރުގައި ބާރުހުރި މަގާމުތަކުގައި ގިނައިން ތިބީ އަދީބުގެ އަތުން ކޮޅު ގޮހޮރަށް ކައިގެން ތިބި އަދީބުގެ އަޅުކުދީންނެވެ. ބާރުބާރަށް އެމްއެމްޕީއާރުސީގެ ހިޔާނާތް ބަލާ ވާހަކަ މުއިއްޒު ދައްކަނީ ކައިރީގައި ތިބި މީހުން މޭބޮޑުކޮށްލުމަށެވެ. 

ފުށިދިއްގަރުފަޅު ތަރައްގީ ކުރުމުގެ މުޅި ކޮންސެޕްޓަކީ ރައީސް ޔާމީނު ގެންގުޅުއްވި ކޮންސެޕްޓެއް ކަމުން ރައީސް ޔާމީނު ވެރިކަމުގައި އެކަމާ ހަވާލުވެތިބި ދެމީހުން ފުށިދިއްގަރުފަޅު ވިއްކާލުމުގެ ރޭވުން އެހިސާބުން ފަށައިގަތެވެ. އިންވެސްޓަރުން ހޯދުމުގެ ޒިންމާ އަދީބު ބްރޯ ނެގިއެވެ. ވެރިކަމަށް އެރިގޮތަށް އަރާ ބަޖެޓް ނެތަސްވެސް ފުށިދިއްގަރު ފަޅު ހިއްކަން ފެށީ އެ އެޖެންޑާގެ ދަށުންނެވެ.  

ދުބާއީ ދަތުރަށް ފަހު ވެރިކަން ހިންގަން ފަށައިގަނެގެން އުޅޭ ގޮތް ބަލަން އަދީބު ބްރޯ އިނެވެ. އެކި މީހުން އެކިތަނުން ހޮވައިގެން ގެންނަ އިންވެސްޓަރުން އަތަށް ގޮއްވަމުންދާތަން ބަލަން އަދީބު ބްރޯ އިނީ ހީލަހީލައެވެ. ވެރިކަމުގެ ހަނީ މޫނު ޕީރިއަޑް ނިމުމުން އަދީބު ބްރޯގެ ވަލަށް ބާރުކޮށްލުމާއެކު ޓޫރިޒަމް އެޑްވައިޒަރާއި ވިޔަފާރި އެޑްވައިޒަރ ބޭރުވެއްޖެއެވެ، އެންމެ ފަހުން ޒަމީރާއި ނަމިރާ ބޭބެވެސް ޖެހުނީ އެއްފަރާތް ކުރާށެވެ. އެ ހިސާބުން މުޅި ސަރުކާރުގެ ކޮންޓްރޯލް އޮތީ އަދީބު އަތުގައެވެ. އަދީބު ބޭނުންނުވާ ގޮތަކަށް މުއިއްޒަށް އެއްކަމެއްވެސް ނުކުރެވޭނެއެވެ.