ވެލިން ވެސް ވައްކަން | ތިލަފުށީޕޯޓް ތަރައްގީކުރަން ގުޅީފަޅު ހިއްކިބިމުން ވެލިނެގުން
ގުޅިފަޅަކީ 18 މިލިޔަން ކޮޑިމީޓަރު ވެލިން ހިއްކި ބިމެއް
ގުޅީފަޅަކީ މާލެ ސަރަހައްދުގައި ދިރިއުޅޭ މީހުނަށް ބޯހިޔާވަހިކަން ދިނުމަށް ހާއްސަކޮށްގެން ހިއްކާފައިވާ ބިމެކެވެ. ގުޅީފަޅަކީ 18 މިލިޔަން ކޮޑި މީޓަރ ވެލި އަޅައިގެން ހިއްކާފައިވާ 192 ހެކްޓަރގެ ބިމެކެވެ. ގުޅީފަޅުން ހިއްކި ބިމަކީ ފެނުން މައްޗަށް 1،5 މީޓަރަށް ވުރެ ތިރި ނުވާ ވަރަށް އާއްމު ކާރިސާތަކުން ސަލާމަތްކުރެވޭ ގޮތަށް ތިމާވެއްޓަށް ވަރަށް ބޮޑު އިސްކަމެއް ދީގެން ހިއްކާފައިވާ ބިމެކެވެ.

އަނެއްކޮޅުން ގުޅީފަޅަކީ އެތައް ހާސް ބަޔަކަށް ގޯތިދީ އިން ވަކިކޮށް ދީފައިވާ ރަށެކެވެ. ވަށާފާރު ރާނާ ގެދޮރު ބިނާކޮށް ބަޔަކު އެތާ އަދި ދިރި ނޫޅުނަސް އެބިމަކީ ބައެއްގެ ހުރުމަތްތެރިވެގެންވާ ގެދޮރުތަކެވެ. އެހެން އެކަން އޮއްވާ ގޯތިތަކުގެ މީހުން ކުރެން އަހާލުމެއް ކަހާލުމެއްނެތި މިސަރުކާރުން އެ ގޯތިތަކުގެ ވެލިގަނޑު ކަހާލައިގެން ގެންގޮސް ތިލަފުށީގައި ތަރައްގީކުރާ ޕޯޓް ސަރަހައްދަށް އަޅަމުން އެބަގެންދެއެވެ.

ތިލަފުށީގައި ތަރައްގީކުރާ ޕޯޓް ސަރަހައްދަށް ބޭނުންވާ ވެލި ނަގާ ތަނަކަށް ގުޅީފަޅުން ދޫކޮށްފައިވާ ގޯތިތައް ވަނީ ހަދާފައެވެ. ދެ ފޫޓް ތިން ފޫޓްގެ ފުން މިނުގައި ސުރެންސުރެ ވެލިގަނޑު ކަހާލައިގެން ބޮޑެތި ޓްރަކްތަކުގައި ތިލަފުށީ ޕޯޓް ސަރަހައްދަށް ދަނީ ވެލިއުފުލަމުންނެވެ.

ގުޅީފަޅުގެ ހިއްކި ބިމުން ދެ ފޫޓަށް ވުރެ ބޯމިނުގައި ވެލިގަނޑު ކަހާލުމަކީ ސަރުކާރުން ފާޅުކަން ބޮޑު ގޮތެއްގައި ހިންގާ ޖަރީމާއެކެވެ. ތިލަފުށީ ޕޯޓް ތަރައްގީކުރަން ހަވާލުކޮށްފައިވާ ކުންފުންޏަށް ވެލިނަގަން ގުޅީފަޅު ދީނުމަކީ ގޯތިގެދޮރުގެ ހުރުމަތް ކަނޑައިގެން ހިންގާ ބޮޑު ވައްކަމެކެވެ.

ތިފުށީ ޕޯޓް ތަރައްގީކުރުމަށް ގުރުބާން ކުރެވޭ ކަންބަޅިއަކަށް ގުޅީފަޅު ހިއްކިބިން ހެދުމަކީ ދައުލަތުން ގުޅިފަޅުން ބިން ހިއްކުމަށް ކޮށްފައިވާ ބޮޑު ހޭދައަށް ގަސްދުގައި ސަރުކާރުން ވަމުންދާ ހިޔާނާތެކެވެ. މިހާރުން މިހާރަށް އެކަން ހުއްޓުވާ ގުޅިފަޅުގެ ހިއްކިބިމުން ނެގި ވެލި އަނބުރާ ޖަމާ ކުރުވަން ޖެހެއެވެ.




