ޓެކްސީ ޑްރައިވަރަކު އެއް އާއިލާއެއްގެ 7 މެންބަރުން މަރާލައިފި
މަރާލި މީހުންގެ ހަށިތައް އުކާލީ ނަންދަހިލް މަތިން ބޯ ޖަންގައްޔަށް
އިންޑިއާގެ ކަރްނާޓަކާ ސްޓޭޓްގެ ބެންގަލޫރު ނަންދީ ހިލްސް ސަރަހައްދުން އެއް އާއިލާގެ ހަތް މެންބަރަކު މަރާލާފައިވާ ކަމަށް ތުހުމަތު ކުރެވޭ މީހަކު ހައްޔަރު ކޮށްފިއެވެ. އާއިލާއެއްގެ ހަތް މެންބަރުން މަރާލިކަމަށް ތުހުމަތު ކުރެވެނީ އެ އާއިލާގެ އަންހެނެއްގެ ފިރިމީހާގެ މައްޗަށެވެ.
މައްސަލައިގައި ހައްޔަރުކޮށްފައިވަނީ ބެންގަލޫރުގެ ރާޖާޖީނަގަރުގައި ޓެކްސީ ދުއްވަން އުޅޭ އުމުރުން 52 އަހަރުގެ އިންދުޝޭކަރް (ޝޭކަރް) އެވެ.
މަރާލާފައިވާ މީހުންގެ ތެރޭގައި އޭނާގެ އަންހެނުންނާއި، އަންހެނުންގެ މަންމައާއި، ދެ ފިރިހެން ކޮއްކޮއިންނާއި، އެމީހުންގެ އަނބިމީހުންގެ އިތުރުން ހަތް އަހަރުގެ ކުއްޖަކު ހިމެނެއެވެ. މި އެންމެންގެ ހަށިތައް ޗިއްކަބައްލަޕޫރު ޑިސްޓްރިކްޓްގެ ނަންދީ ހިލްސްގެ އެކި ސަރަހައްދުތަކަށް އެއްލާލާފައިވާ ކަމަށް ފުލުހުން ބުނެއެވެ.
ފުލުހުންނަށް މިހާތަނަށް ފެނިފައިވަނީ ހަތް އަހަރުގެ ޕުނީތު ނަމަކަށް ކިޔާ ކުއްޖާގެ ހަށިގަނޑެވެ. ހާދިސާގައި މަރުވި މީހުންނަކީ ޝޭކަރްގެ އަންހެނުން ސުނީތާ (40)، އޭނާގެ މަންމަ ރޫޕަވަތީ (65)، ސުނީތާގެ ދެ ކޮއްކޮ ކަމަށްވާ ޝިވްކުމާރު (30) އާއި ޝަންކަރް (44)، އެމީހުންގެ އަނބިމީހުން ކަމަށްވާ ދިވްޔާ (30) އާއި ނަލިނީ (29) އެވެ. ފުލުހުންގެ ފުރަތަމަ ތަހުގީގުން އެނގޭ ގޮތުގައި ޝޭކަރް ވަނީ ދެ ދުވަހެއްގެ މަތިން އާއިލާގެ މެންބަރުން ވަކިވަކިން އޭނާގެ ގެއަށް ގެނެސް، ފުނޑާ ގަލަކުން ހަމަލާދީ މަރާލާފައެވެ.
ބިރުވެރި މި ހާދިސާ ފަޅާ އެރީ މަރާލި މީހުންގެ ތެރޭގައި ހިމެނޭ ނަލިނީގެ މަންމަ، އޭނާގެ ދަރިފުޅު ހަބަރެއް ނުވެގެން ބެންގަލޫރުގެ ސްރީރާމަޕޫރު ޕޮލިސް ސްޓޭޝަނަށް މައްސަލަ ހުށަހެޅުމުންނެވެ. ފުލުހުން ކުރި ތަހުގީގުގައި ޝޭކަރަށް ޝައްކު ކުރެވިގެން ސުވާލު ކުރުމުން، އޭނާ ވަނީ މި މަރުތައް ހިންގި ކަމަށް އިއުތިރާފުވެފައެވެ.
ތަހުގީގުން އެނގިފައިވާ ގޮތުގައި ޝޭކަރާއި ސުނީތާ ކައިވެނި ކުރީ މީގެ 20 އަހަރު ކުރިންނެވެ. އެ މީހުން ދިރިއުޅެމުން ދިޔައީ ރާޖާޖީނަގަރުގެ އިމާރާތެއްގެ މަތީބައިގައި ހުންނަ ކުޑަ އެޕާޓްމަންޓެއްގައެވެ. ފުލުހުން ލަފާކުރާ ގޮތުގައި މި ޖަރީމާ ހިންގަން މެދުވެރިވީ ސުނީތާ އޭނާގެ އާއިލާއާ ބާއްވާ ގާތް ގުޅުމުގެ ސަބަބުން ދެމަފިރިންގެ މެދުގައި އުފެދިފައިވާ ދެބަސްވުންތަކެއްގެ ސަބަބުންނެވެ. އާއިލާގެ މެންބަރުން މީގެ ކުރިން މި މައްސަލަތައް ހައްލުކުރަން މަސައްކަތް ކޮށްފައިވާ ކަމަށްވެސް މައުލޫމާތު ލިބެއެވެ.
ހަށިތައް ހޯދުމަށް ޚާއްސަ ޓީމެއް
ހައްޔަރުކުރި މީހާގެ ބަޔާނަށް ބިނާކޮށް، ފުލުހުން އޭނާ ގޮވައިގެން ނަންދީ ހިލްސް ސަރަހައްދުގައި ގިނަ ގަޑިއިރުތަކެއް ވަންދެން ކުރި މަސައްކަތުން ޕުނީތުގެ ހަށިގަނޑު ވަނީ ފެނިފައެވެ.
މައުލޫމާތު ލިބޭ ގޮތުގައި ޝޭކަރް ވަނީ ހަށިތައް ނަންދީ ހިލްސްގެ އެކި ދިމާލަށް އެއްލާލާފައެވެ. އޭގެ ތެރޭގައި ޗާމްރާޖްޕެޓް ފަރުބަދަ ކައިރީގެ ސަރަހައްދުތައް ވެސް ހިމެނެއެވެ. މި ހަށިތައް އެއްލާލާފައިވާ ސަރަހައްދުތަކަކީ ވަރަށް އުސް އަދި ވަރަށް ބޮޑަށް އަރިމަތި ގުންޑޮޅި ބޮޑު ސަރަހައްދުތަކެއް ކަމުން، އެ ތަންތަނުން ތިރިއަށް ވެއްޓޭ ހަށިތައް ވަނީ ޖަންގަލީގެ ވަރަށް ފުން ހިސާބުތަކަށް ވެއްޓިގެންގޮސް ވަނީ ގެއްލިފައެވެ. މީގެ ސަބަބުން ހަށިތައް ހޯދުމަށް ފުލުހުންނަށް ބޮޑެތި ގޮންޖެހުންތަކަކާ ވަނީ ކުރިމަތިވެފައެވެ.
ފުލުހުން އެ ސަރަހައްދުގައި ގަވާއިދުން ފޯރިމަރަމުން ދިޔަ ނަމަވެސް، ހަށިތައް އެއްލާލާފައިވަނީ ފުލުހުންނަށް އާންމުކޮށް ނުދެވޭ ފަދަ ފުން ބޯ ޖަންގަލި ތެރެއަށް ކަމުން މިހާރު ފުލުހުން ދަނީ ޖަންގަލީގެ އޮފިސަރުންގެ އެހީތެރިކަމާއެކު އެކި ސަރަހައްދުތައް ބަލައި ފާސްކުރަމުންނެވެ. މީގެ އިތުރުން، އެ ހަށިތައް ނަންދީ ހިލްސްއާ ހަމައަށް އުފުލިގޮތާއި އެއްލާލި ގޮތުގެ ތަފްސީލުތައް ވެސް ފުލުހުން ދަނީ ތަހުގީގު ކުރަމުންނެވެ.
ޑެޕިއުޓީ ކޮމިޝަނަރ އޮފް ޕޮލިސް ބާބާސާބު ނޭމަގައުޑް މި ހާދިސާ ކަށަވަރުކޮށްދެއްވަމުން ވިދާޅުވީ، މަރުގެ މައްސަލައެއްގެ ގޮތުގައި އެފް.އައި.އާރް ރަޖިސްޓްރީކޮށް ތަހުގީގު ފަށާފައިވާ ކަމަށެވެ. މައްސަލަ ތަހުގީގު ކުރުމަށާއި، ނުފެނި ބާކީ ހުރި ހަށިތައް ހޯދުމަށް ތިން އެސިސްޓަންޓް ކޮމިޝަނަރ އޮފް ޕޮލިސް ހިމެނޭ ގޮތަށް ހާއްސަ ޓީމެއް މިހާރު ވަނީ އެކުލަވާލާފައެވެ.




