ރަސްޑީލް ދިފާއުކޮށް ދައްކާ ވާހަކައަކީ ބޮޑު އޮޅުވާލުމެއް: އައްބާސް

ފަތުރުވެރިކަމަށް ދޫކޮށްފައިވާ ފަޅުތަކާއި ރަށްތަކާއި ރަސްމާލެ އާ އަޅުވާ ކިޔަނީ ރައްޔިތުންނަށް ހަގީގަތް އޮޅުވާލަންކަމަށް ވެލިދޫ ދާއިރާގެ މެންބަރ މުހައްމަދު އައްބާސް ވިދާޅުވެއްޖެއެވެ. މުހައްމަދު އައްބާސް އެވިދާޅުވަނީ ވަރަށް ބޮޑު ތެދެކެވެ. ފަތުރުވެރިކަމަށް އާއްމު ގޮތެއްގައި ރަށްރަށާއި ފަޅުތައް ދޫކޮށްފައިވަނީ އާއްމުކޮށް ހުޅުވާލައިގެންނެވެ. 

އައްބާސް ވިދާޅުވާހެން ފަތުރުވެރިކަމަށް ފަޅު ނުވަތަ ރަށް ދޫކުރަނީ އެރަށެއް ނުވަތަ ފަޅަކަށް ދައުލަތުން ކަޑައަޅާ އަދަދެއްގެ ފައިސާ ގަޑުކޮށް ދެއްކުމުންނެވެ. އަނެއްކޮޅުން ފަތުރުވެރިކަމަށް ދޫކުރާ ފަޅުތަކާއި ރަށްތައް ހިއްކާ ތަރައްގީ ކުރަނީ ކުއްޔަށް ނަގާ ފަރާތަކުންނެވެ. ރިސޯޓް ހަދަން ރަށްރަށާއި ފަޅުތައް ދޫކުރަނީ ރައްޔިތުންގެ ފައިސާއިން އެތަންތަން ހިއްކާފައެއް ނޫނެވެ.

ފަތުރުވެރިކަމަށް ފަޅެއް ނުވަތަ ރަށެއް ތަރައްގީކޮށް ނިންމުމުން ދައުލަތަށް ކުލި ދައްކައެވެ. ގްރީން ޓެކުސް އާއި ޓީޖީއެސްޓީ އާއި ބީޕީޓީގެ އިތުރުން އެހެނިހެން ޓެކުސްތައް ކޮންމެ މަހަކުވެސް ދައުލަތަށް ދައްކަމުންދެއެވެ. ފަތުރުވެރިކަމަށް އެބޫދޫ ފަޅު ހިއްކާ ތަރައްގީ ކުރީވެސް ރައްޔިތުންގެ ޓެކުސްފައިސާއަކުން ނޫނެވެ. މުހައްމަދު އައްބާސް ވިދާޅުވާހެން އެބޫދޫ ފަޅު ކުއްޔައް ދޫކޮށްފައި ވަނީ ފަތުރުވެރިކަމަށެވެ. ފަތުރުވެރިކަން ނޫންކަމެއް އެނބޫދޫ ފަޅަކު ނުކުރެއެވެ. ނުވެސް ކުރެވޭނެއެވެ.

ފަތުރުވެރިކަމަށް ދޫކޮށްފައިވާ އެއްވެސް ރަށަކީ 99 އަހަރަށް ކުއްޔަށް ދޫކޮށްފައިވާ ތަންތަނެއް ނޫނެވެ. އިންވެސްޓަށް ޔަގީންކަން ދިނުމުގެ ގޮތުން އެތަންތަން ކުއްޔަށް ދީފައިވާ މުއްދަތު ހަމަވުމުން 99 އަހަރަށް ވުރެ އިތުރު ނުވާގޮތަށް މުއްދަތު އިތުރުކޮށްދެވިދާނެ ކަމަށް ބުނެފައި އޮންނަ އޮތުމަކީ 99 އަހަރަށް ކުއްޔަށް ދިނުންކަމަށް ބެލޭނެ ގާނޫނީ ހަމައެއް ނުއޮންނާނެއެވެ. 

ފަތުރުވެރިކަމަށް ދޫކުރާ ރަށްރަށާއި ފަޅުފަޅުފަޅާ ފުށިދިއްގަރު ފަޅު ނުވަތަ ރަސްމާލެ ތަފާތެވެ. ރަސްމާލެއަކީ ފަތުރުވެރިކަމަށް ކުއްޔަށްދޭ ތަނެއް ނޫނެވެ. ފުށިދިއްގަރު ފަޅު ނުވަތު ރަސްމާލެ ހިއްކީ ބޯހިޔާވަހިކަމަށް ހައްލު ހޯދައިދިނުމުގެ ނަމުގައި ރައްޔިތުންގެ ޓެކްސް ފައިސާއިންނެވެ.

މުހައްމަދު އައްބާސް ވިދާޅުވާހެން ވަގުތީ އުފަލައްޓަކައި ރިޝްވަތުގެ ހަރާމް ލާރީގެ ދަހިވެތިކަމުގައި ތިބި ބަޔަކު ލައްވާ ރިޝްވަތުގެ ހުތުރު ފައިސާ ދީގެން 10 މިނެޓުން ގާނޫނު ބަދަލުކުރެވިދާނެއެ. ވަޒީފާގެ ބިރުވެރިކަމުގައި ތިބި ބިޔަކު ސަރުކާރު ދިފާއު ކޮއްފާނެއެވެ. އެހެނެއްކަމަކު އީގަލް ހިލް އަށް ރަސްމާލެއިން 500 ހެކްޓަރު ބިން ދިނުން ދިފާއުކޮށް ދައްކާ ލަންބާޗޯޅާ ވާހަކައަކީ ބޮޑު އޮޅުވާލުމެކެވެ.