އިހުތިރާމަކީ އާދޭސް ކޮށްގެން ލިބޭނެ އެއްޗެއް ނޫން
ގައުމާ ދީން ވިއްކަމުން އިހުތިރާމަށް ސަލާންޖެހުން
ކަނުލާ އަޑުއަހަން އިނީ އިހުތިރާމް ބޭނުންވާ މީހެއްގެ ކިބައިގައި ހުންނަންޖެހޭ އެންމެ އަސާސީ އެއް ސިފަ ހުރިތޯއެވެ. ދޮގު ހެދުމާއި މަކަރު ހެދުމާއި އޮޅުވާލުމަކީ ގޯސް ކަންކަން ކަމަށް ހުތުބާގައި ކިޔާނެ ކަމަށް އިންތިޒާރު ކުރެވުނެވެ.
ހުތުބާ ނިމުނުއިރުވެސް އިހުތިރާމު ބޭނުން މީހަކު ދޮގުހަދައިގެން ނުވާނެކަމަށާއި އެ މީހަކީ ގައުމުގެ ވެރިމީހާ މުހައްމަދު މުއިއްޒު ކިޔާ މީހެއް ކަމުގައި ވިއަސް އިހުތިރާމު ހޯދަން ޖާދޫ ހެދުމަކުން ލިބޭނެ ކުރިއެރުމެއް ނޯންނާނެކަން ހުތުބާގައި ނެތުމުން ފުރިހަމަ ހުތުބާއަކަށް ނުވިއެވެ.
ގައުމުގައި ހިނގާ މުހިންމު ކަންކަމަށް ހުތުބާގައި އަލި އަޅުވާލުން މުހިންމު ކަމަށް ބުނި ބުނުން ރަގަޅެވެ. ނަމަވެސް ގައުމުގައި މި ވަގުތު ދިމާވެގެން އުޅޭ ގައިރު ދީންތަކުގެ މީހުން މުސްލިމު ގައުމެއްގައި ވަޒަންވެރި ކުރުވާއިރު އަޅާ ނުލާ ތިބުމަކީ އެ ކުށުގައި ބައިވެރިވާ މީހުންގެ ކިބައިން ފެންނާނެ ސިފަތަކެއް ކަމުގައި ބުނެފައި ނެތުން ހުތުބާގެ ކޮށި ކަމެއް ކަމުގައި ބެލެވެއެވެ. އަދި ހަނުހިމޭނުން ތިބޭ މީހުންގެ ތެރޭގައި ދީނީ އިލްމު އުގެނިގެން ތިބި މީހުން ތިބުމަކީ އެ މީހުން ދީނުގެ ހަމަތަކަށް ވެވޭ ބޭ އިންސާފެއް ކަމުގައި ބުނެފައި ނެތުން ހުތުބާގެ ފުރިހަމަކަމުން އުނިވެއެވެ.
ދައުލަތުގެ ވަލީއުލް އަމުރު ކަމުގައި ވިއަސް އިހުތިރާމު ބޭނުންނަމަ އުޅުމާއި އަހުލާގާއި ގުޅުންތައް ސީދާ ކުރަން ޖެހެއެވެ. ވިއްސަކަށް އަހަރުގެ ކުއްޖެއް ގޮވައިގެން ސޯފާއެއްގެ މަތީގައި ތެޔޮދެމުން ގޯހަކަށް ނުވެ ދައުލަތުގެ އެންމެ މަތީ އިދާރާގެ ކޮޓަރިއެއްގެ ހުރުމަތް ކަނޑާލުމުން އިހުތިރާމު ލިބޭނީ ގަނެގެންނެވެ.
ފައިސާ ނުދޭނަމަ އަދި ދިން ފައިސާ ހުސްވީމާ އެ އިހުތިރާމު ޖެހޭނީ ރީލޯޑު ކުރާށެވެ. މިއީ ނިމުމެއް ނާންނާނެ ރީލޯޑަކަށް ވާނެއެވެ. ހިތާމައަކީ އަދުގެ ސަރުކާރު ހިމެނޭ ޖަމާއަތުގައިވާ އެއް ލައްކަ މީހުންގެ ތެރޭގައި ގިނައީ ހަކުރު ދެންޏާ ބޮޑުބޭބެ ތަކެކެވެ. އެ މީހުން ދީން ވިއްކައެވެ. އެ މީހުން ގައުމު ވިއްކައެވެ. އެ މީހުން ނަފުސު ވިއްކައެވެ. އެ މީހުން އިހުތިރާމުވެސް ވިއްކައެވެ.
ދުނިޔޭގައި ގައުމުތައް ހަނގުރާމަ ކުރަނީ ބިމަށެވެ. އެ ބައެއްގެ ދީނުގެ ހައްގުގައެވެ. ބާރުވެރިކަމާއި ނުފޫޒު ހޯދާށެވެ. ހަގީގީ މާނައިގައި ދީނާއި ގައުމުގެ ހައްގުގައި ކުރާ ހަނގުރާމަ ހައްގު ޖިހާދަށް ވެގެން ދެއެވެ.
ދިވެހި ދައުލަތުން ގައުމާއި ދީން ވިއްކަނީ ދޮލަނގުގައި އެ ވަގުތަކު ގަންނަން އަންނަ މީހަކަށް ކުޑަ ލާރި ކޮޅަކަށެވެ. އިހުތިރާމު ދޭނީ ކިހިނެތް ހެއްޔެވެ.
ހުތުބާގައި އެ ވާހަކަ ނެތީ ކީއްވެތޯއެވެ. ހާއްސަ ކޮށް އެ ދޭ ކުޑަ ލާރިކޮޅުވެސް ވަންނަނީ އެ ބާޒާރުގައި ވިޔަފާރިއަށް ނިކުމެ އުޅޭ މީހާއާއި އޭނާގެ ސާހިބު މީހާއާއި ބައެއް ގާތް އައުވާނުންނަށެވެ. އިހުތިރާމު ދޭނީ ކިހިނެތް ހެއްޔެވެ.
ދިވެހި ދައުލަތުގެ މަގާމުތަކުގެ ވެރިން މާތް ރަސްކަލާނގެ ގަންދީ ހުވާ ކުރީ ގައުމަށް ކަނޑައަޅާ ވެރިއަކު ބުނާ ހުރިހާ ކަމެއް ކުރާކަށް ނޫނެވެ. ދީނާއި، ގައުމާއި، ރައްޔިތުންގެ ހެވާޔާއި ލާބައަށެވެ.
ދައުލަތުގެ ސަލާމަތީ ބާރުތަކުގެ އެންމެ އަސާސީ އެއް ޒިންމާއަކީ ދިވެހި ދައުލަތާއި ދީން ހިމާޔަތް ކުރުމެވެ. ދީނާއި ގައުމުގެ ދިފާއުގައި ފުރާނައިން ގުރުބާން ވާށެވެ.
ދައުލަތުގެ މަސްއޫލިއްޔަތުތައް އުފުލާ ބައެއް މަގާމުތަކުގައި ގައުމަށް ތާރީހީ ހިދުމަތްތަކެއް ކޮށްދިން ހަރުދަނާ ބަތަލުންތަކެއް ވެއެވެ. މަގާމުގެ ޒިންމާއަކީ ވެރިންނަށް ގައުމު މިސްރާބު ޖަހާފައިވާ ނުރައްކާތައް ބުނެދިނުމެވެ. އެ ޒިންމާ އަދާ ނުކުރެވޭނަމަ ހީރޯއިން ޒީރޯއަށް ވެ، ހިދުމަތްތެރި ބަތަލުން ގައްދާރުންނަށް އެނބުރިގެން ދެއެވެ.
ދިވެހި ދައުލަތުގެ އަމާޒު ނުރައްކަލަށް ދަނީކީ ނޫނެވެ. ވެރިންގެ ހުވާތަކުގެ މާނައިގައިވާ ކަންކަމަށް އިހުމާލު ވުމުން ގައުމު ނުރައްކަލަށް ހުޅުވެނީއެވެ.
2026 ވަނަ އަހަރު އިރު ދިވެހިރާއްޖެއަށް އަލި އެޅުނީ ނާމާން ކަމާއި ނުރައްކަލާއި އެކުގައެވެ. ރާއްޖޭގެ ވަލިއުލް އަމުރު ކުރި ހުވާ ހަނދާން ނައްތާލީއެވެ. މިނިސްޓަރުން ކުރި ހުވަޔަށް ހިޔާނާތްތެރިވީއެވެ. ރައްޔިތުންގެ މަޖިލިހުގެ މެންބަރުން ކުރި ހުވާ އަމިއްލަ މަސްލަހަތަށް ވިއްކާލީއެވެ. މިނިވަން މުވައްސަސާތަކުގެ ވެރިން ކުރި ހުވާތައް ފަސްދާނުލީއެވެ. ގައުމުގެ ސަލާމަތީ ބާރުތަކާއި ޖުޑިޝަރީގެ ވެރީން ކުރި ހުވާތަކަށް ގާފިލުވީއެވެ.
ދިވެހި ދައުލަތުގައިވަނީ ސޭލް އަޅުވާފައެވެ. ދީނާއި ބިން ވިއްކުމުގެ ބާޒާރުގައި ހިޔަޅުތަކަކަށް ވިއްކަން ފައިވިއްދާފައެވެ.
މުސްލިމުންނަށް ގައިރުދީންތަކުގެ މީހުންނާއި އެކު ވިޔަފާރި ކުރެވުނަސް އެކުގައި އެއްދާން ކުރަން މުޅިޔަކުން އެންމެ ރަގަޅެއް ނޫނެވެ. ހާއްސަކޮށް ތާރީހީ ހެކިތަކުގެ އަލީގައި ޔަހޫދީންނާއި އެ މީހުންގެ ބައިވެރިންނަށް ދިވެހި ދައުލަތުން ހުސްނުވާ ގަރުނަކުން ގަރުނަކުން ދިވެހިފަސްގަނޑުން އަކައިންޗިއެއްވެސް ދޭކަށް ބޭނުމެއް ނުވާނެކަން ޔަގީނެވެ.
އިހުތިރާމު މައި މައުލޫއަށްވެ ހުތުބާގެ ފަލަ ސުރުހީން ޖާގަ ހޯދި ނަމަވެސް އެ އިހުތިރާމު ދޭނީ ކިހިނެއް ތޯއެވެ. ވެރިންގެ ބަހާ އަމަލާއި ކުރި ހުވަޔާއި ފުށުއަރަނީއެވެ. އިހުތިރާމޭ ވިދާޅު ނުވާށެވެ. ހުތުބާ ގެ މައުލޫތައް ވާށާޖެހޭ ފަދަގޮތަކަށް ވިސްނަވައިގެން ލިޔުއްވާށެވެ. ހުތުބާއަށް މަލާމާތް ރައްދުވާގޮތް ނުހައްދަވާށެވެ.
އަދަބު އިހުތިރާމާއި އެކު ދަންނަވަމެވެ. އަލުން ހިތާނު ކުރުވައިގެން ނަމަވެސް ވެރި މީހާ އިސްލާހު ކުރުވާށެވެ. ވެރި މީހާ ދޮގު ނުހަދާނެ ފަދަ ރުގްޔާއެއް، މަކަރު ނުހަދާނެ ފަދަ ރުގްޔާއެއް، ގައުމަށް ގައްދާރު ނުވާނެފަދަ ރުގްޔާއެއް ހުތުބާގައިވެސް ގެންނަން އެބަ ޖެހެއެވެ. އެފަދަ ދުއާ ތަކެއް ގުނޫތުގެ ގޮތުގައި ކިޔަވައިގެން ނަމަވެސް އިސްލާހު ކުރުވަން އެބަޖެހެއެވެ.
އޭރުން އިހުތިރާމު ކުރާށޭ ކިޔާ އާދޭސް ދަންނަވާކަށް ނުޖެހޭނެއެވެ. ހުތުބާގެ މައުލޫއަކަށް އިހުތިރާމު ލާކަށްވެސް ނުޖެހޭނެއެވެ.




