ލުޓޭރުންގެ ކިބައިން ގައުމު ސަލާމަތް ކޮށްދޭނީ އެމްޑީޕީ: މައުރޫފް ޒާކިރު
ޑިމޮކްރަސީގެ ހަމަތަކުން ރީތިކޮށް ފައްކާވަމުން އައި، ރައްޔިތުން ބަލައިގަތް ލާމަރުކަޒީ ނިޒާމު ފުނޑުފުނޑުކޮށްލައިފި ކަމަށް ކެންދޫ ދާއިރާގެ އިއްޒަތްތެރި މެންބަރ މައުރޫފް ޒާކިރު ވިދާޅުވެއްޖެއެވެ.
މާލޭ ބޮނޑިބަތް ޕާކުގައި އެމްޑީޕީން ރޭ ބޭއްވި ކަންމަތީ އެއްވުމުގައި ވާހަކަ ދައްކަވަމުން މައުރޫފް ވިދާޅުވީ އަތޮޅު ކައުންސިލްތައް އުވާލައި ކޮންމެ އަތޮޅަކަށް އަނެއްކާ ވެސް މިސަރުކާރުން އަތޮޅުވެރިޔަކު ލާނެކަމަށެވެ.
ޖުޑިޝަރީ ނިޒާމު ގޮނޑިކޮއްކޮއަކަށް ހަދާ ރައްޔިތުންގެ މަޖިލިސް ރައީސްގެ ރަބަރު ތައްގަޑަށް ހާދާ ނޫސްވެރިކަމުގައި ކަސްތަޅު އަޅުވަން ނޫސްވެރިންނާ ހަނގުރާމަ އުއުލާނުކޮށްގެން ސަރުކާރުން އުޅޭ ދަނޑިވަޅެއްގައި އެމްޑީޕީން ބޭއްވި ކަންމަތީ އެއްވުމުގައި މައުރޫފް ވިދާޅުވި ގޮތުގައި ކުރިން އޮތް އަނިޔާވެރި ހުދުމުހުތާރު މައުމޫނު ވެރިކަމުން ގައުމު ސަލާމަތްކުރަން އިސްނަގާ ގައުމު ސަލާމަތްކޮށްދިނީ އެމްޑީޕީ ކަމަށެވެ.
މިހާރު ވެރިކަމުގައި ތިބި އަނިޔާވެރި ލުޓޭރުންގެ ކިބައިން ގައުމު ސަލާމަތް ކޮށްދޭނީވެސް އެމްޑީޕީންކަމަށް މައުރޫފު ވިދާޅުވިއެވެ. އެމްޑީޕީއާއި މެދު ޔަގީންކަން އޮތްކަމަށާއި މިހާރު ވެރިކަމުގައި ތިބި ލުޓޭރުންގެ ކިބައިން އެމްޑީޕީ ގައުމު ސަލާމަތް ކޮށްދޭނެ ކަމާމެދު ރައްޔިތުން ޝައްކުނުކުރެއްވުމަށް މައުރޫފް ވިދާޅުވިއެވެ.
