އިހުސާންގެ މައްޗަށް ފައިސަލަށް ގަދައެއް ނުވެވުނު!
މިނިސްޓަރ އިހުސާންގެ މުށުތެރެއަށް މުޅި ޕީއެންސީގެ ކޮންޓްރޯލް ގެންދިއުމަށް ކުރާ މަސައްކަތުގައި ރައީސް މުއިއްޒަށް ވާނުވާ ނޭގެއެވެ. ވާނީ އެހެންތާއެވެ. ޕީއެންސީގެ ތެރެއިން މުއިއްޒުގެ ބާރުކަނޑުވާލާ 2028 ގެ ރިޔާސީ ޓިކެޓް ހޯދުމަކީ ފައިސަލް އާއި އިހުސާންގެވެސް އަމާޒެކެވެ.
އަމާޒަށް ވާސިލުވުމަށް ޕީއެންސީގެ ނައިބު ރައީސްކަން ހޯދުމުގެ ދަހިވެތިކަން ފައިސަލާއި އިހުސާނާއި ދެމީހުންގެވެސް އިންތިހާއަށް ބޮޑެވެ. އެހެންކަމުން އެއް އަމާޒު ހިފައިފައިވާ ފައިސަލާއި އިހުސާންގެ ކޯޅުން ރައްޔިތުންގެ މަޖިލީހުގެ އިންތިހާބައި ހަމައިން ވަނީ ފެށިފައެވެ.
އަލީ އިހުސާން ޕީއެންސީގެ ނައިބު ރައީސްކަން ހިފާއިރު ޕީއެންސީގައި ކުރިއްސުރެ ތިބި މެންބަރުންނާއި ޕީޕީއެމުން ބަދަލުކުރި ގިނަ މެންބަރުންނަކީ އަދުރޭގެ ލޯޔަލިސްޓުންނެވެ. އެ މެންބަރުންގެ ތެރޭގައި ބާއްވާ އެތެރޭގެ އިންތިހާބެއް ފަސޭހަކަމާއެކު ކާމިޔާބު ކުރާނީ ފައިސަލްކަން އިހުސާނަށް އެނގެއެވެ. އެހެން އެކަން ވިޔަ ނުދިނުމަށްޓަކާ އިހުސާނު އިސްވެހުރެ ޕީއެންސިއަށް މެންބަރުން އިތުރު ކުރުމުގެ ހާއްސަ މަސައްކަތްތަކެއް ފެށިއެވެ.
ޑީއެންއާރުގެ ޑާޓާބޭހުގައި ހުރި މީސްމީހުންގެ ޒާތީ މައުލޫމާތުން ވައްކަންކޮށްގެންވެސް އިހުސާނު ބޭނުންވީ އަދުރޭއަށް އޮތް މެންބަރޝިޕް ކޮންޓްރޯލު ޕީއެންސީން ގެއްލުވާލުމަށެވެ. ޕީއެންސީގެ ނައިބު ރައީސް ހޮވަން ވާއިރަށް އިހުސާނަށް ޕީއެންސީގެ ނައިބު ރައީސްކަން ކަށަވަރުވާ ވަރުކުރުމަށެވެ. މެންބަރުންގެ ލިސްޓަށް އަދުރޭއަށް އެކްސަސް ނުވޭވަރަށް ސަރުކާރުގެ އިދާރާތައް ބޭނުންކޮށްގެން ކޮންޓްރޯލު ނެގުމަށެވެ.
ޕީއެންސީގެ މެންބަރޝިޕް ޑްރައިވް ބޮޑުކޮށް އެތައް ހާސް ވަގުފޯމެއް އެޅުމުންވެސް އިލެކްޝަނުން އޭގެ ގިނަ ފޯމްތައް ބަލައިގަނެ ވަނީ ރަޖިސްޓްރީކޮށްދީފައެވެ. ރަޖިސްޓްރޭޝަން ހަލާލުކުރުމަށް ޝަކުވާ ހުށަހަޅަން ހުޅުވާލީއިރު ޑީއެންއާރުގެ ޑާބޭސް ކަހާލާފައި އޮތްކަން އިލެކްޝަން ކޮމިޝަނަށް އެނގޭ ކަމަކަށް ނުވެއެވެ. ކުޑަމިނުން ފޯމްތަކުގައި ހުރި ފިންގަރޕްރިންޓް ވެރިފައި ކޮށްލުމެއްވެސް ނެތި ޕީއެންސީއަކީ 68 ހާސް މެންބަރުން ތިބި ޕާޓީއަކަށް ހަދާ ނިންމާލީއެވެ.
ޕީއެންސީން އިލެކްޝަނަށް ހުށަހެޅި ފޯޖުކުރި ފޯމްތަކުގެ އަސްލު މިހާރު އިލެކްޝަންގައި ހުރި ކަމަކަށް ނުވެއެވެ. އިލެކްޝަންގައި ހުރީ ހަމައެކަނި ފޯމްތަކުގެ ސްކޭން ކުރި ސޮފްޓް ކޮޕީއެވެ. ގިނަ ފޯމްތަކުގެ އަސްލު އިހުސާނުގެ ބެޅުމުގެ ދަށަށް ގެންގޮސްފައިވާކަމަށް މައުލޫމާތު ލިބެއެވެ. ބޭނުމަކީ ވަގުފޯމްތަކާބެހޭ ޝަރީއަތެއް ހިންގިޔަސް ޝަރީއަތަށް އަސްލު ފޯމް ހުށަހެޅުމުގެ ފުރުސަތު ގެއްލުވާލުމެވެ. އިހުސާންގެ ހުރިހާވެސް ބޭނުމަކީ ޕީއެންސީ އިހުސާނުގެ މުށުތެރެއަށް ކަހާލުމެވެ. 2028 ރިޔާސީ ޓިކެޓް ހޯދުމެވެ.
