މަރުގެ އިންޒާރަށް ފުލުހުން އަޅައެއްނުލި: ސަލީމް
ހޯމް މިނިސްޓްރީގެ ސްޓޭޓް މިނިސްޓަރުކަން ކުރައްވާފައި ބޭފުޅެއް ކަމުގައިވާ އަހުމަދު ސަލީމް ހ. މާޒް /މާލެ ( މާޒް ސަލީމް)އަށް މަރުގެ އިންޒާރުގެ ކޯލްތަކާއި މެސެޖުތައް ލިބެމުން ދާތީ ފުލުހުންގެ ސަމާލުކަމަށް ގެންނަން ކުރެއްވި މަސައްކަތް ނާކާމިޔާބު ވެއްޖެކަމަށް މާޒް ސަލީމް ވިދާޅުވެއްޖެއެވެ. ސަލީމް ވިދާޅުވި ގޮތުގައި ސަލީމަށް އިންޒާރުގެ ކޯލާއި މެސެޖްތައް ލިބެނީ އެއް ފަރާތަކުންނެވެ.
އެންމެ ފަހުން ރޭގައި ލިބުނު އިންޒާރުގެ ކޯލާއި ގުޅިގެން ރޭގެ މެންދަމު 12.30 އާއި 01.00 ދެމެދު ފުލުސް އޮފީހަށް އެކަން ފޯނުން ރިޕޯޓް ކުރުމުން ހެންވޭރު ދަނޑު ކައިރީގައި ހުންނަ ތަހުގީގުތަކާބެހޭ ބަޔަށް ހާޒިރުވުމަށް ބުނުމުން އެތަނަށް ސަލީމު ވަޑައިގަތް އިރު ކައުންޓަރ ޑިއުޓީގައި އިން ކުއްޖަކުފިޔަވާ އެހެން މީހަކު އެތާގައި ނެތެވެ. ކައުންޓަރުގައި އެވާހަކަ ބުނުމުން ފޯނުން މީހަކާ ގުޅުމަށް ފަހު އެކޯލްގައި ގުޅިފައި ހުރި މީހަކާ ސަލީމާ ގުޅުވާދިން ކަމަށްވެއެވެ. އެމީހަކު ސަލީމުގާތުގައި އެދުނު ކަމަށްވަނީ ސަލީމު އަތުގައި ހުރި އެވިޑެންސްތައް އެފަރާތާ ހިއްސާ ކުރުމަށެވެ.
ފުލުހުން އެދުނު ގޮތަށް ސަލީމް އެވިޑެންސްތައް ހިއްސާކުރި ފަހުން ބަޔާނެއް ނަގާ ހަދާފައެއް ނުވެއެވެ. މައްސަލަ ކުރިއަށް ގެންދާކަމެއް ނުގެންދާކަމެއްވެސް އަންގާފައިވާ ކަމަކަށް ނުވެއެވެ. ސަލީމް ވިދާޅުވާ ގޮތުގައި ފުލުހުން އެކަމަށް އެހާ ބޮޑު އިސްކަމެއް ނުދެނީ ދާހިލީ ވަޒީރު އަލީ އިހުސާނުގެ އެންގެވުމަކުން ކަމަށްވުން ގާތް ކަމަށެވެ. މުއިއްޒު ސަރުކާރުގެ ކަންކަން ހިނގަމުންދާ ގޮތަށް ބަލާ ސަލީމުމެންފަދަ އިދިކޮޅު ފިކުރުގެ މީހުންގެ މައްސަލަތައް ނުބެލުމަށް ފުލުހުންނަށް އަންގާފައި އޮންނަކަމަށް ގަބޫލުކުރެވޭ ކަމަށް މާޒު ސަލީމު ވިދާޅުވެއެވެ.
މާޒް ސަލީމަކީ 2012 ވަނަ އަހަރުގެ ފަހު ކޮޅުވެސް ބަޔަކު މީހުން އޭނާގެ ގަޔަށް ތޫނު އެއްޗަކުން ހަމަލާދީ ބޮޑެތި ޒަހަމްތަކެއް ކޮށްފައިވާ މީހެކެވެ. ޖިސްމާ ފުރާނައަށް ގެއްލުންދޭ ފަދަ އިންޒާރުތަކެއް މީހަކަށް ލިބޭކަމުގެ ޝަކުވާ އެހާލުއިގޮތަކަށް ޕޮލިހުން ނެގުމަކީ ކަންބޮޑުވުން އޮތް ކަމެކެވެ. އާއްމު ރައްޔިތުންގެ ސަލާމަތާއި ރައްކާތެރިކަން ކަށަވަރުނުވާ ކަމުގެ ބިރުވެރިކަން އޮތް ކަމެކެވެ.
2023 ވަނަ އަހަރުގެ ރިޔާސީ އިންތިހާބްގައި އުމަރު ނަސީރުގެ ރަނިންގ މޭޓް މާޒް ސަލީމަކީ މިހާރު އެމްޑީޕީގެ ގައުމީ މަޖިލީހުގެ މެންބަރެއްގެ ހައިސިއްޔަތުން އިދިކޮޅު ސިޔާސީ ހަރަކާތުގައި ވަރަށް އަވަދިނެތި އުޅުއްވާ ބޭފުޅެކެވެ. މާޒް ސަލީމްއަށް އިންޒާރު ދިނުމުގެ މައްސަލައެއް ޕޮލިހަށް ހުށަހެޅިފައިވޭތޯ މިރޭގެ 19.11 ގައި ޕޮލިސް މީޑިއާ ގުރޫޕްގައި ހީރަސް ނިއުސް އިން ކުރި ސުވާލަށް އަދި ޖަވާބު ނުދެއްވާތީ ޕޮލިހުންގެ ބަހެއް ވަނީ ނުލިބިއެވެ.
