ފުލުހުންނަށް: ޒާތީ މައުލޫމާތުން ވައްކަންކުރާ މީހުން ހޯދާ!
ރައްޔިތުންގެ މަޖިލީހުގެ ވައިކަރަދޫ ދާއިރާގެ ޢިއްޒަތްތެރި މެމްބަރު ހުސެއިން ޒިޔާދުގެ ނަމުގައި ފުރާފައިވަނީ ވަގު ފޯމެއްކަމަށާއި ވަގުފޯމެއް ހުށަހެޅުމުން އިލެކްޝަން ކޮމިޝަނުން އެކަން ބަލައިގަތުމަކީ ނުހަނު ކަންބޮޑުވުން އޮތް ކަމެއްކަމަށް އެމްޑީޕީގެ ރައީސް އޮނަރަބަލް އަބްދުއްލާ ޝާހިދު ވިދާޅުވެއްޖެއެވެ.
މިވަގުތަކީ މަޖިލީހުގެ އިއްޒަތްތެރި މެމްބަރުން ޕާޓީ ބަދަލުކުރެއްވިކަމަށް އިލެކްޝަން ކޮމިޝަނުން ކަނޑައަޅައިފި ހިނދެއްގައި މަޖިލީހުގެ މެމްބަރުކަމުގެ ގޮނޑި ގެއްލިގެންދާނެ އިސްލާހެއް ގާނޫނު އަސާސީއަށް ގެނެވިފައިވާ ވަގުތެއް ކަމަށްވެސް އެމްޑީޕީގެ ރައީސް ވިދާޅުވެއެވެ.
އޮނަރަބަލް ޝާހިދު ވިދާޅުވާ ގޮތުގައި ދިވެހިންނަށް ލިބުނު ފެހި ގާނޫނު އަސާސީގެ ދަށުން އުފެދިފައިވާ އެންމެ މުހިންމު އެއްކޮމިޝަނަކީ އިލެކްޝަން ކޮމިޝަނެވެ. އެ ކޮމިޝަނާމެދު ދިވެހިރައްޔިތުންގެ ހިތުގައި އޮންނަންޖެހޭ އިތުބާރު ގެއްލުނަނުދީ ހިފެހެއްޓުމަށް އިތުރަށް މަސައްކަތް ކުރެއްވުމަށް ކޮމިޝަނުގެ މެމްބަރުންނަށް އެމްޑީޕީގެ ރައީސް އިލްތިމާސް ކުރައްވައެވެ.
ދިވެހިރައްޔިތުންގެ ޒާތީ މައުލޫމާތު ވަގަށްނަގައި ސިޔާސީޕާޓީއަކަށް މެމްބަރުން އިތުރުކުރުމަށް ކުރަމުންދާ މަސައްކަތުގައި ބައިވެރިވާ ފަރާތްތައް ހޯދުމަށްޓަކައި ޖިނާއީ ތަހުގީގެއް ފުލުހުން ހިންގުމަށް ވެސް އޮނަރަބަލް ޝާހިދު ގޮވާލައްވައެވެ. އޮނަރަބަލް ޝާހިދު އެ މޭރުމުން އެކްސްގައި މިއަދު ޕޯސްޓެއް ޝާއިއު ކުރެއްވީ ރައްޔިތުންގެ މަޖިލީހުގެ ވައިކަރަދޫ ދާއިރާގެ މެމްބަރު ހުސެއިން ޒިޔާދުގެ ނަމުގައި ވަގުފޯމެއް ހުށަހެޅުމުން އިލެކްޝަން ކޮމިޝަނުން އެކަން ބަލައިގަތުމުގެ ކަންބޮޑުވުން ފާޅުކުރެއް ވުމުގެ ގޮތުންނެވެ.
