ފައިސާއަށް ރަށްވެހިކަން ވިއްކުން ހުއްޓުވުމުގެ މަސައްކަތް އީޔޫ ފަށައިފި

ދުނިޔޭގެ ބޮޑެތި ބައެއް ނޫސް އެޖެންސީތަކުން ރިޕޯޓްކުރާ ގޮތުގައި ކެރީބިއަންގެ ފަސް ގައުމަކުން ހިންގަމުންދާ "ސިޓިޒަންޝިޕް ބައި އިންވެސްޓްމަންޓް" (ސީ.ބީ.އައި) ނުވަތަ އިންވެސްޓްކޮށްގެން ރައްޔިތުކަން ދޭ ޕްރޮގްރާމްތައް، 2028 ވަނަ އަހަރުގެ ނިޔަލަށް ހުއްޓާނުލައިފިނަމަ، އެ ގައުމުތަކުގެ ރައްޔިތުންނަށް ޝެންގެން ސަރަހައްދަށް ވިސާއާ ނުލައި ދަތުރުކުރުމަށް ދީފައިވާ ހުއްދަ ވަގުތުން ބާތިލްކުރާނެ ކަމުގެ އެންމެ ފަހުގެ އިންޒާރު ވިލާތުގެ އިއްތިހާދު (އީ.ޔޫ) އިން ދީފިއެވެ.

މި އިންޒާރު އަމާޒުކޮށްފައިވަނީ އެންޓީގުއާ އެންޑް ބާބިއުޑާ، ޑޮމިނިކާ، ގްރެނާޑާ، ސެއިންޓް ކިޓްސް އެންޑް ނޭވިސް، އަދި ސެއިންޓް ލޫޝިއާއަށެވެ. މުއްސަނދި ބޭރުގެ އިންވެސްޓަރުންނަށް ފައިސާ ދީގެން ރައްޔިތުކަން ހޯދައިދޭ މި ނިޒާމުތަކަކީ ވިލާތުގެ ގައުމުތަކަށް ވަނުމަށް ބޭނުންކުރާ "ވަލު ދޮރާއްޓެއް" ކަމަށް ބެލެވިފައި އޮންނާތާ ގިނަ ދުވަސްތަކެއް ވެއްޖެއެވެ.

މިކަމާ ބެހޭ ގޮތުން ކަންބޮޑުވުން އުފެދިފައިވާ އަނެއް ސަބަބަކީ، ތަފާސްހިސާބުތަކުން ދައްކާ ގޮތުގައި މި ޕާސްޕޯޓްތައް ގިނައިން ދޫކޮށްފައިވަނީ ނުރައްކާތެރި ނުވަތަ ދަތިކުރުމުގެ ފިޔަވަޅު އަޅާފައިވާ ގައުމުތަކުގެ ރައްޔިތުންނަށެވެ. މީގެ ތެރޭގައި ޗައިނާ، ރަޝިޔާ، ސީރިއާ، އީރާން، އިރާގު، ޔަމަން، ލީބިޔާ އަދި ނައިޖީރިއާ ހިމެނެއެވެ.

އީ.ޔޫގެ 27 މެންބަރު ގައުމުގެ ތެރެއިން 25 ގައުމަކަށް ވަނުމުގެ ހުއްދަ ކަނޑާލާނެ ކަމުގެ ބިރު ދެއްކުމުގެ އަމާޒު ބްރަސަލްސްގައި ހުންނަ އީ.ޔޫގެ މައި އިދާރާއިން ހިފާފައިވަނީ މި ކުދި ޖަޒީރާ ގައުމުތަކުގެ އާމްދަނީ ލިބޭ މައިގަނޑު ވަސީލަތްތަކަށެވެ.

ސަލާމަތީ ނުރައްކާތަކާއި ފާސްކުރުމުގެ ނިޒާމުގެ ބަލިކަށިކަން

ޔޫރަޕިއަން ކޮމިޝަނުން މިފަދަ ހަރުކަށި ފިޔަވަޅެއް އެޅުމަށް ނިންމި މައިގަނޑު ސަބަބަކީ މި ޕާސްޕޯޓްތައް ދޫކުރުމުގައި އަމަލުކުރާ ގޮތުން އުފެދޭ ސަލާމަތީ ކަންބޮޑުވުންތަކެވެ.

އާންމުގޮތެއްގައި ސީ.ބީ.އައި ޕްރޮގްރާމްތަކުގެ ދަށުން، ގާތްގަނޑަކަށް 200,000 އެމެރިކާ ޑޮލަރުގެ އިންވެސްޓްމަންޓެއް ކޮށްގެން، އެ ގައުމެއްގައި ދިރިއުޅުމުގެ ޝަރުތަކާ ނުލައި، އެއް އަހަރު ދުވަހުގެ ތެރޭގައި ފުރިހަމަ ރައްޔިތުކަމާއި ބާރުގަދަ ޕާސްޕޯޓެއް ލިބެއެވެ.

ވިލާތުގެ އިސްވެރިން ގަބޫލުކުރާ ގޮތުގައި، މިފަދަ ލުއި ގޮތްތަކަކީ މުޅި ސަރަހައްދުގެ ސަލާމަތަށް އޮތް ނުރައްކަލެކެވެ. ރައްޔިތުކަމަށް އެދި ހުށަހަޅާ މީހުން ގިނަވުމާއި، ހުށަހެޅުންތައް ބާތިލްކުރާ ނިސްބަތް މަދުވުމުގެ އިތުރުން، އަވަސް އަރުވާލައިގެން މަރުހަލާތައް ކުރިއަށް ގެންދިއުމުގެ ސަބަބުން، އެކަށީގެންވާ ގޮތެއްގައި މީހުންގެ ބެކްގްރައުންޑް ޗެކް ނުކުރެވެއެވެ. މިކަމުގެ ސަބަބުން ނުރައްކާތެރި މީހުންނާއި އިންސާނީ ހައްގުތަކަށް އަރައިގަންނަ ކަމަށް ތުހުމަތު ކުރެވޭ ފަރާތްތަކަށް، ބައިނަލްއަގުވާމީ ބޯޑަރުތަކުގެ ފާސްކުރުންތަކުން ރެކިގަތުމަށް ދެވަނަ ޕާސްޕޯޓެއް ހޯދުމުގެ ފުރުސަތު ލިބެއެވެ.

މީގެ އިތުރުން، ރަނގަޅަށް ތަހުގީގު ނުކޮށް ދޫކުރާ މިފަދަ ރައްޔިތުކަމުގެ ސަބަބުން ބައިނަލްއަގުވާމީ ފެންވަރުގައި ޓެކްސްއަށް މަކަރު ހެދުމާއި، މަނީ ލޯންޑަރިންގް އަދި ނުގަވާއިދުން ހޯދާފައިވާ މުދާ ފޮރުވުމަށް މަގުފަހިވާ ކަމަށް ވިލާތުގެ ރެގިއުލޭޓަރުން އިންޒާރު ދެއެވެ.

ދައުލަތުގެ އާމްދަނީ އާއި ވިލާތަށް ވަނުމުގެ ހުއްދައިރުމަތީ ކެރީބިއަންގެ ގައުމުތަކަށް އީ.ޔޫގެ މި އިންޒާރަކީ އިގްތިސާދީ ގޮތުން ކުރިމަތިވި ބޮޑު ގޮންޖެހުމެކެވެ. ފާއިތުވި ދިހަ އަހަރު ދުވަހުގެ ތެރޭގައި، ރައްޔިތުކަން ވިއްކުމަކީ ހަމައެކަނި ހިޖުރަކުރުމުގެ ވަސީލަތަކުން ބަދަލުވެ، އެ ގައުމުތަކުގެ އިގްތިސާދުގެ މައި ތަނބަކަށް ވަނީ ވެފައެވެ. ބައިނަލްއަގުވާމީ މާލީ އިދާރާ (އައި.އެމް.އެފް) ގެ ހިސާބުތަކުން ދައްކާ ގޮތުގައި، 2019 އާއި 2023 އާ ދެމެދު އެ ސަރަހައްދުގެ ޖީ.ޑީ.ޕީގެ އެވްރެޖް 6.5 އިންސައްތަ ހިއްސާކުރަނީ މި ޕްރޮގްރާމްތަކުންނެވެ.

އެންޓީގުއާ އެންޑް ބާބިއުޑާ ފަދަ ބައެއް ގައުމުތަކުގައި، ސީ.ބީ.އައި އިން ލިބޭ އާމްދަނީއަކީ ޓެކްސް ނޫން ގޮތްގޮތުން ސަރުކާރަށް ލިބޭ އާމްދަނީގެ 60 އިންސައްތައެވެ.

އެންޓީގުއާ އެންޑް ބާބިއުޑާގެ ބޮޑުވަޒީރު ގަސްޓަން ބްރައުން ޕާލަމެންޓުގައި ވާހަކަ ދައްކަވަމުން ވިދާޅުވީ، މިއީ ގައުމަށް ކުރިމަތިވެފައިވާ އުނދަގޫ ނިންމުމެއް ކަމަށެވެ. އެއީ ވިލާތަށް ވިސާއާ ނުލައި ދަތުރުކުރުމުގެ ފުރުސަތު ދެމެހެއްޓުން ނުވަތަ އަހަރަކު ދައުލަތަށް ލިބޭ 100 މިލިއަން ޑޮލަރަށްވުރެ ގިނަ އާމްދަނީ ދޫކޮށްލުމާ ދެމެދު ގޮތެއް ނިންމުމެވެ. ބްރައުން ފާހަގަކުރެއްވި ގޮތުގައި، މިއީ ގައުމުގެ މާލީ އޮނިގަނޑުގެ މުހިންމު ބަޔަކަށް ވާތީ، އާމްދަނީ ހޯދާނެ އެހެން ފުރުސަތުތަކެއް ނެތި މިކަން ހުއްޓާލުމަކީ ކުރެވޭނެ ކަމެއް ނޫނެވެ.

މާލީ ހަމަޖެހުމަށް ކުރިމަތިވެފައިވާ މި ނުރައްކަލާ ގުޅިގެން، ކެރީބިއަންގެ ފަސް ގައުމުގެ ވެރިން ތައްޔާރުވަމުންދަނީ ބްރަސަލްސްއަށް ދަތުރުކޮށް، ޑިޕްލޮމެޓިކް ފެންވަރުގައި މިކަމަށް ހައްލެއް ހޯދުމަށެވެ. އެ ބޭފުޅުން ވިދާޅުވަނީ ފައިސާ ދީގެން ރައްޔިތުކަން ހޯދުމުގެ ނިޒާމުތައް ދުނިޔޭގެ އެކި ކަންކޮޅުތަކުގައި އެކި ސިފަސިފަޔަށް އެބަހުރި ކަމަށާއި، މި ޕްރޮގްރާމްތައް އެއްކޮށް ހުއްޓާލުމުގެ ބަދަލުގައި އޮތް ހައްލަކީ އޭގެ ބެލެހެއްޓުން ހަރުދަނާކުރުން ކަމަށެވެ.

ކެރީބިއަންގެ ސީ.ބީ.އައި ޕްރޮގްރާމްތަކާ ދެކޮޅަށް އީ.ޔޫއިން ގެންގުޅޭ ހަރުކަށި ސިޔާސަތަކީ އެ އިއްތިހާދުގެ އެތެރޭގެ ނިންމުންތަކާވެސް ގުޅިފައިވާ ކަމެކެވެ. ވިލާތުގެ މަތީ ކޯޓުން "ގޯލްޑަން ޕާސްޕޯޓް" ސްކީމްތަކަކީ ގައިރު ގާނޫނީ ކަމެއް ކަމަށް ނިންމުމާ ގުޅިގެން، އީ.ޔޫގެ ހުރިހާ މެންބަރު ގައުމުތަކަކުން މިހާރު ވަނީ އެ ގައުމުތަކުގެ އަމިއްލަ ސީ.ބީ.އައި ޕްރޮގްރާމްތައް އުވާލާފައެވެ. މިހާރު ބްރަސަލްސްއިން މަސައްކަތް ކުރަމުންދަނީ ވިލާތުގެ ބޯޑަރުތަކުން ފަސޭހަކަމާއެކު ވަދެވޭ ގޮތަށް އޮންނަ ބޭރުގެ ގައުމުތަކަށްވެސް މި މަނާކުރުން ފުޅާކުރުމަށެވެ.

އީ.ޔޫ އާއި ކެރީބިއަން ގައުމުތަކުގެ މެދުގައި އުފެދިފައިވާ މި ޖިއޯޕޮލިޓިކަލް ކުރިމަތިލުމަކީ ދުނިޔޭގެ ފެންވަރުގައި ދަތުރުފަތުރު ކުރުމުގެ މިނިވަންކަމާއި މުއްސަނދި އިންވެސްޓަރުން ހިޖުރަކުރުމުގެ ސިޔާސަތުތަކަށް ބޮޑު ބަދަލެއް ގެންނާނެ ކަމެކެވެ.