އެކަތިގަނޑަކަށްވެ މަސައްކަތްކުރަންވީ ވަގުތެއް: އޮނަރަބަލް ޝާހިދު

މިހާރު ކުރަމުންދާ ވިއްސާރާގައި ރާއްޖޭގެ ބައެއްރަށްތަކުގައި ފެންބޮޑުވެ، އެކިވަރުގެ ގެއްލުންތައް ދަނީ ލިބެމުންނެވެ. ބައެއް ރަށްރަށުގައި ދިރިނޫޅެވޭ ވަރަށް ވިއްށަރައިގައި ގެއްލުން ލިބިފައިވެއެވެ. ބައެއް ގޭގެއިން މީހުން ބަދަލުކޮށް ވަގުތީ ހިޔާވަހިކަން ދޭންޖެހިފައިވެއެވެ. މުޅިމާލެހެން ފެނުއަޑިއަށް ގޮސް ބޮޑެތި ގެއްލުންތައް މިވިއްސާރާގައި ލިބިފައިވެއެވެ. 

ރައްޔިތުންނަށް ދިމާވެފައިވާ ދަތިއުދަގޫ މި ދަނޑިވަޅަކީ އެންމެން އެކަތިގަނޑަކަށްވެ، މަސައްކަތްކުރަންވީ ވަގުތުކަމަށް އެމްޑީޕީގެ ރައީސް އަދި ކުރީގެ ހާރިޖީ ވަޒީރު ޢަބްދުއްލާ ޝާހިދު ވިދާޅުވެއެވެ.

ޝާހިދު އެކްސްގައި ކުރެއްވި ޕޯސްޓެއްގައި ކުރެއްވި ވިދާޅުވީ އާންމު ރައްޔިތުންގެ ސަލާމަތާއި ރައްކާތެރިކަމަށްޓަކައި ކައުންސިލު ތަކާއި، އެހެނިހެން އިދާރާތައް ގުޅިގެން ކުރެވޭ މަސައްކަތުގައި އެންމެން ބައިވެރިވެ، އެއްބައެއްގެ ގޮތުގައި އެހީތެރިވަމުން ގެންދިއުމަށް އެދިވަޑައިގަންނަވާ ކަމަށެވެ.

ރާއްޖޭގެ ބޮޑުބަޔަކަށް ގަދަވަޔާއެކު ކުރަމުންއަންނަ ވިއްސާރާގައި ރަށްތަކަށް ބޮޑެތި ގެއްލުންތައް ލިބި އާންމު ދިރިއުޅުން ގިނަ ރަށްރަށުގައިވަނީ ހުއްޓުމަކަށް އައިސްފައި މި ދަނޑިވަޅުގައި ރައްޔިތުން ތަހައްމަލް ކުރަމުންދާ ހިތާމައިގައި އެ މަނިކުފާނުވެސް ބައިވެރިވެ ވަޑައިގަންނަވާ ކަމަށް ޝަހިދު ވިދާޅުވިއެވެ.

އެންމެބޮޑަށް ފެންބޮޑުވި ރަށްތަކުގެ ތެރޭގައި މާލޭގެ އިތުރަށް ފ. މަގޫދޫ އާއި ފ. ނިލަންދު އާއި ދ. ކުޑަހުވަދޫ އާއި ދ. މީދޫ ހިމެނޭއިރު ށ. ނަރުދޫ އާއި ކ. ގުރައިދޫ އާއި އދ. މާމިގިނލި ވެސް ހިމެނެއެވެ. ވިއްސާރާގައި މާލެއަށް ރެކޯޑް އަދަދަކަށް ވާރޭ ވެހި، މުޅި މާލޭގެ ހުރިހާ މަގެއްގައިހެން ވަނީ ފެންގަނޑު ބޮޑުވެ، އާއްމު ދަތުރުފަތުރަށްވެސް ހުރަސްއެޅިފައެވެ.