ޕީއެންސީން މެންބަރުން ވަގަށްނެގުމެއް ފުލުހުން ނުހުއްޓުވާނެ!
މުއިއްޒު ސަރުކާރުން ވައްކަން ކުރުމުގައި އެޔެއް މިޔެއް ބަލާކަމަކަށް ނުވެއެވެ. ދައުލަތުގެ ފައިސާއާއި މުދަލާއި ބިމާ ކަނޑުފަޅުން ވެސް ކުރަނީ ވައްކަން ކަމެވެ. މީސްމީހުން ސަރުކާރުގައި ރަޖިސްޓްރީކޮށްފައި ހުންނަ ކުންފުނިތައްވެސް ހިއްސާދާރުންނަށް ނޭނގި ވަގަށް ނަގަނީއެވެ. ސަރުކާރުގެ އިދާރާތަކުގައި ހުންނަ މީހުންގެ ޒާތީ މައުލޫމާތުން ވައްކަން ކުރުމާއި ޕާޓީތަކުން މެންބަރުން ވަގަށް ނެގުންވެސް އިންތިހާއެވެ.
ވާނީ އެހެންތާއެވެ. ރައީސް ޔާމީނަށް ޕްރޮގްރެސިވް ކޯލީޝަނުން ދީފައިއޮތް ރިޔާސީ ޓިކެޓެއް ދޮންކަޅު އަންގާނުލާ ވަގަށް ނަގައިގެން ހޯދި ވެރިކަމެއްގައި ވައްކަން ނޫން ކަމެއް ނުކުރާނެތާއެވެ. ރިޔާސީ ޓިކެޓާއެކު ތިންހާސް ހަމަނުވާ ޕީއެންސީ ވެސް މުއިއްޒު ޖަހައިގަތީ ބިޔަ ބޮޑު ޕީޕީއެމް ވާގިނައްތާލާފައެވެ. ވެރިކަން ލިބުމާއެކު ޕީޕީއެމްގެ އެތައް ހާސް މެންބަރުން ވެސް ޕީއެންސިއަށް ވަގަށް ނެގީއެވެ.
2023 ވަނައަހަރަށް ޕީޕީއެމަށް ދައުލަތުން ދީފައިވާ 10.4 މިލިޔަން ރުފިޔާވެސް ޕީޕީއެމްގެ ކަމަކަށް ހަރަދުނުކޮށް ޕީއެންއެފުން ނަގާ ބޭނުންކޮށްލީއެވެ. ޕީޕީއެމް ހިސޯރުކޮށްގެން ރައްޔިތުންގެ މަޖިލީހަށް ޕީޕީއެމްގެ ނަމުގައި ވާދަކުރަން ފުރުސަތުނުދީ ޕީޕީއެމްގެ ސިޔާސީ ބާރުވެރިކަންވެސް ވަގަށް ނެގީއެވެ. ޕީޕީއެމްގެ މެންބަރުން ޕީއެންސީން ވަގަށްނަގާ އެންމެ ފަހުން ޕީޕީއެމް ކަފުންކޮށް ވަޅުލާވެސް ނިމުނީއެވެ.
ޕީއެންސީއަށް ޕީޕީއެމް މެންބަރުން ވަގަށް ނަގައިގެން އެކަނި ފުއްދައެއް ނުލިއެވެ. ސަރުކާރުގެ އިދާރާތަކުގައި ހުރި މީސްމީހުންގެ ޒާތީ މައުލޫމާތުން ވައްކަންކޮށް ޕީއެންސީއަށް ބޯ ގިނަކުރަން މީހުންގެ ރުހުމެއް ނުރުހުމެއް ނުބަލާ ޕީއެންސީގެ މެންބަރުންނަށް ހަދަންފެށީއެވެ.
މީހުންގެ ސޮއި ފޯޖުކޮށްގެންނާއި އެގޮތް މިގޮތަށް ޕާޓީތަކުންވެސް މެންބަރުން ވަގަށް ނަގަނީއެވެ. އެހެން ސިޔާސީ ޕާޓީތަކުގެ އާއްމު މެންބަރުންނާއި ގައުމީ މަޖިލީހުގެ މެންބަރުން ވެސް ޕީއެންސީއަށް ވަގަށް ވެއްދުމުގައި މުއިއްޒާއި އީސީސީ އޮތީ އަތުގުޅާލާފައެވެ. އަމާޒަކީ 2024 ވަނައަހަރު ނިމޭއިރަށް ލައްކައެއްހާ މީހުން ވައްދައިގެން ދައުލަތުގެ ބަޖެޓުން ސިޔާސީ ޕާޓީތަކަށް ދޭފައިސާ ގަނޑު ކައްވާލުމެވެ.
އެމްޑީޕީގެ މަނަދޫ ދާއިރާގެ ރައީސް ތޯރިގު މެންފަދަ އެމްޑީޕީނުން އެހެންޕާޓީއަކަށް ދުވަހަކުވެސް ސޮއިނުކުރާ މީހުން ވަގަށް ނަގައިގެން ޕީއެންސީއަށް ގެންދާއިރު ޕާޓީ ބަދަލުކުރުމުގައި ލަވަކިޔާލާފާ ތިބޭމިހުންނަށް ވާނީކޮންވަރެއް ހެއްޔެވެ. އަމްދުން ވާނުވާ ނުބަލާ ތިބި އެތައް ހާސްބަޔަކު ވަނީ ވަގަށް ނެގިޔަސް އެމީހުނަށް ދޮންކަޅުވެސް ނޭގޭނެއެވެ.
އެނގޭކަމަކީ ވާނުވާ ބަލައިގެން އެނގިގެން މައްސަލަ ޖައްސާނީ މަދު މީހެއްކަމެވެ. އޭގެ ފައިދާ ނަގައިގެން ޕީއެންސީން ވަނީ އެތައް ބަޔެއްގެ މެންބަރޝިޕް ވަގަށް ނަގާފައެވެ. އެހެނެކޭ ކިޔާ ބަޔަކު ކިތަންމެ ވަރަކަށް ޕޮލިހަށް ލިޔުނަސް ޕީއެންސީން މީހުން ވަގަށް ނަގާނެގުން ހުއްޓުވުމުގެ ހިއްވަރެއް ފުލުހުންގެ ނުހުންނާނެއެވެ. ފުލުހުން އެ މައްސަލަ ބަލާ ފިޔަވަޅެއް ނާޅާނެއެވެ.
