ގޯތިތައް ވަގަށް ނަގާއިރު އޭސީސީ އޮތީ ބުރާންތިވެފަ؟؟

ރައީސް ސޯލިހު ވެރިކަމުގައި މާލޭ ރައްޔިތުންނަށް މާލެ ސަރަހަދުން ގޯތިދޭން ހިންގި ބިވެރިޔާ ސްކީމް މުއިއްޒު ސަރުކާރުން ގަޑުބަޑު ކުރާނެކަމީ ޝައްކެއްނެތް ކަމެއްކަން މާކުރިއްސުރެ މީހުންއައީ ބުނަމުންނެވެ. ގޯތި ދީފައިހުރީ ހޮޅިމަތިންނޭ މަގުމަތިންނޭ ކަނޑުއަޑިންނޭ ކިޔައިގެން މުއިއްޒު ސަރުކާރުން ވާހަކަ ފެތުރީ ގޯތިތަކުން ވެސް ވައްކަން ކުރުމުގެ ބޭނުމުގައި ކަމަށް އެތައް ބަޔަކު ބުނަމުން ދިޔައެވެ. 

ގިރާވަރުފަޅުން ދޭން ކަނޑައެޅި ގޯތިތައް ގުޅީފަޅަށް ބަދަލުކުރުމަކީވެސް ބިންވެރިޔާ ސްކީމް ގަޑުބަޑުކުރަން ހިންގި ޖަރީމާއެއް ކަމަށް މީހުން ތުހުމަތު ކުރިއެވެ. ގޯތި އޮތްތަނާ ބޮޑުމިން އެނގޭ ގޮތަށް މީހުނަށް ދޫކޮށްފައިވާ ރިޖިސްޓްރީތައް ދޫކޮށްފައިވާ މީހުންގެ އަތުން އަތުލާ އަގަޑަބަގަޑަ ކުރުމަކީ ގޯތިތައް ބަދަލު ކުރުމުގެ މައިގަޑު ސަބަބެވެ. ބޭނުމަކީ މީހުނަށް ދީފައިވާ ރަސްމީ ލިޔުން އަތުލުމެވެ. ގޯތިލިބުނު ރައްޔިތުންގެ އަތުގައި ހެއްކެއްގެ ގޮތުގައި އޮތް ރަސްމީ ލިޔުން އެ މީހުން އަތުން އަތުލާ ނައްތާލުމަކީ ޝަރީއަތުންވެސް ޝަކުވާކޮށް ކާމިޔާބު ކުރުމުގެ މަގު ބަންދު ކުރުމެވެ. 

ދޭން ކަނޑައެޅި 9004 ގޯތީގެ ތެރެއިން ރައީސް ސޯލިހުގެ ވެރިކަން ނިމުނު އިރު ނުހިކި އޮތީ އެންމެ 600 ގޯއްޗެވެ. އެ ހަސަތޭކަ ގޯތި ހިއްކާލުމަކީ ގިނަވެގެން ހަފްތާއެއްގެ ތެރޭގައި ސަރކާރުންކޮށް ނިންމާ ލެވޭވަރު ކަމެކެވެ. އެކަމަކު ރައީސް މުއިއްޒު ބޭނުންވީ އެތަން ތަން ހިއްކާފައި ގޯތިތައް ހަވާލުކުރުމުގެ ބަދަލުގައި ބިންވެރިޔާ ސްކީމް ގަޑުބަޑުކޮށް ގޭސް އެނބުރުމަށެވެ. މުއިއްޒު ބޭނުންވާ ވަކިބަޔަކަށް ގޯތިތަކެއް ހިލޭ ދެވޭނެ ގޮތް ހެދުން އެއީ އެނބުރި ގޭހުގެ މުޅި މޯޓިވްއެވެ.

އެންމެ ފަހުން ގިރާވަރުފަޅުން ގޯތިތައް ގުޅީފަޅަށް ބަދަލުކޮށް ލޭންޑް ޔޫސް ޕްލޭން ހަދާ ގޯތި ލިބުނު މީހުންގެ ގައިރު ހާޒިރުގާ އަލުން ގުރުއަތްލާ ރަނގަޅަށް ގޯތިތައް އޮޅީލީއެވެ. ކުރިން ރަނގަޅު ހިކިފަސްތަނުން ގޯތި ލިބިފައިވާ އެތައް ސަތޭކަ ބައެއްގެ ގޯތި ފުން ވިލަށް ވައްޓާލީއެވެ. ގުޅީފަޅާ ގިރާވަރުފަޅުން ގޯތިލިބުނު މީހުންގެ ގޯތިތައް އަވާ މެންދުރުގައި ބާއްވައިގެން ގޯތި ލިބުނު މީހުން، ގޯތި ލިބުން ލަސްވެދާނެތީ ގޯތީގެ އިންތިޒާރުގައި ހައްޕު ކިޔުވާފައި ބައިތިއްބައިގެން ހުޅުމާލެ ކޮޅު ހިލާލައި ނިންމާ ލަނީއެވެ. 

މުއިއްޒާ ފަޒުލް ގުޅިގެން ބިންވެރިޔާގެނަމުގައި ބޭނުންހާ މީހަކަށް ގޯތި ކަނޑާދީ ރަޖިސްޓްރީ ހަދައިދެމުންދަނީ ބިންވެރިޔާ ސްކީމުން ގޯތި ހޯދަން އެދުނުކަމެއް އަދި ލިބޭކަން ކަނޑައެޅިފައި އޮތެއް ނެތެއް ނުބަލައެވެ. މީހުންގެ މޫނުމައްޗަށް އެހެން ކަމެއް ތިލަކޮށްފައި ރޯމާދުވާލު ބިމުންވެސް ވައްކަން ކުރަނީކަމަށް ހުއްޓަނުލާ މީހުން އެބަކިޔައެވެ. 

އެކަމަކު ދޮންއަމައަށް އެވޯޑް ދިން މައްސަލައިގައި ކޮރަޕްޝަން އެކުލެވޭ ކަމުގެ ތުހުމަތުގައި ގުންފައިޖަހާފާ މީޑިއާ ކައުންސިލަށް ވަނތް އޭސީސީ މުއިއްޒު ސަރުކާރުން އެހިންގާކަމަށް ބުނާ ބިލާދަރު ވައްކަންތަކުގެ ވާހަކަ ދައްކާއިރު އެ އޮންނަނީ ކަންކަށިމައްޗަށް ބާރަށް އަތްދޮވެލީމާ މީހަކު ބުރާންތި އަރާހެން ރަނގަޅަށް ބުރާންތިވެފައެވެ. ފުލުހުންވެސް ބަރުގޮނު އަޅާފައި ދަގަނޑު ދަހަނާގައި އަންނާނީ މިވާހަކަ ދައްކާ މީހުން ބަލައެވެ. މުއިއްޒާއި މުއިއްޒުގެ ކޮރަޕްޓް ޓީމުން ފާޅުގައި ހިންގާ ޖަރީމާ ހުއްޓުވުމުގެ ހިތްވަރެއް ފުލުހުންނަކަށްވެސް ނުހުރެއެވެ.