ދިމްޔާތާއި ޒޭވަރުން ދައުލަތަށް އެތައް ބިލިޔަނުގެ ގެއްލުން!

ރައީސް ސޯލިހު ވެރިކަމުގައި ދިން ގޯއްޗެއް ދިން ތާކުން ދިން މީހަކަށް ދޭނެކަމަށް ބުނެ ވައުދުވެގެން ވެރިން ހޯދި މުއިއްޒުގެ ވެރިކަމަށް އަހަރުވެއްޖެއެވެ. ދިން ތާކުން ދިން މީހަކަށް ގޯތިތައް ހަވާލެއް ނުކުރިއެވެ. އެކި ބަހަނާ ދައްކައިގެން މާލެ ސަރަހައްދުން ގޯތިތައް ނުދީ ވާން އޮތް ހުރިހާ ގޮތެއް މުއިއްޒު ދަނީ ހަދަމުންނެވެ. މާލޭ ރައްޔިތުންގެ ތެރެއިން 9000 އާއިލާއަށް ގޯތި ދިނުން ބޮޑު ގެއްލުމަކަށް ވެގެން މުއިއްޒާ ފަޒުލް އެބަ ތެޅެފޮޅެއެވެ.

މާލޭގެ 9000 އާއިލާއަކަށް މާލެ ސަރަހައްދުން ގޯތިދިނުމުން މާލޭގެ އަގުބޮޑު ބިމޭ ކިޔައިގެން ޒާތްޒާތުގެ ފަސާދަ މުއިއްޒު އުފައްދާއިރު މާލޭގެ ހިއްކިބިމުގައި ދިމްޔާތު އަޅައިގެން މުއިއްޒު ވިޔަފާރި ކުރަނީ ވަށަފަރު ހުސައިން އަބްދުއްރަހުމާނު ވިހޭއިރު މަހަކަށް ވެއްޓުނު ބިމަކަށް ވެގެން ހެއްޔެވެ. އެ ބިންވެސް ހިއްކާފައިވަނީ ރައްޔިތުންގެ ފައިސާއިންނެވެ. ދިނީ ހިލެއެވެ. ދައުލަތުގެ ފައިސާ ހޭދަކޮށްގެން ހިއްކި ބިމެއް ހިލޭ ހޯދައިގެން މުއިއްޒު ބާލުހާނާ ހިންގަން އޯކޭއެވެ. އޭރުވެސް މާލޭގެ ބިމަކީ ރަނެވެ. 

އަނެއްކޮޅުން މާފަންނު ޒޭވަރަކީ ހަނީސަކްލް އަބްދުއްރަޝީދު ފުލުސްކޯޓުގެ ގާޒީކަމުގައި އިނދެ މޭޒުމަތީ ބަރާއި މޭޒުފައި ހެކިދީގެން އިއްވި އަނިޔާވެރި ހަރާން ހުކުމްތަކުގެ ގަނީމާކަން އޮޅެގެން އުޅެނީ ކާކަށް ހެއްޔެވެ. މާލޭގެ ރަންބިމުގެ ފައިދާ ފަޒުލް އާއިލާއިން ނަގާތާ ކިހާ ޒަމާނެއް ހެއްޔެވެ. އެކަން ގެއްލުމަކަށް ނުވޭހެއްޔެވެ.

މާލޭގެ ރަންބިމުން ދިމްޔާތާއި ޒޭވަރު ހިލޭ ދިން ފަހުން މިވީހާ ތަނަށް އެންމެ ހަތަރުއަނާވެސް އެތަންތާކުން ސަރުކާރަކަށް ނުލިބެއެވެ. ހިލޭ ދީފައިވާ ބަންޑާރަ އެ ދެގޯތިން އެކަނިވެސް ދިވެހި ދައުލަތަށް އެތައް ބިލިޔަން ރުފިޔާގެ ގެއްލުންވަނީ ލިބިފައެވެ. މާލެ ސަރަހައްދުން ކުރީ ސަރުކާރުން ދިން 9000 ގޯތި ދީގެން ލިބޭ ކަމަށް ބުނާ ގެއްލުމެކޭ ދިމްޔާތާއި ޒޭވަރު ދީގެން ދައުލަތަށް ގެއްލުން ލިބުމެކޭ އޮތީ ކޮންތަފާތެއް ހެއްޔެވެ. ސަރުކާރުން ލޯނު ނަގައިގެން ބޮޑު ހޭދަކޮށްގެން ބަންޑާރަ ގޯތި ދިނީކީ އަލަކަށް ނޫނެވެ. 

އެޗްޑީސީއަކީ މުއިއްޒާއި ފަޒުލުގެ ފޫޅުދަނޑިއާ ގުޅީފައި އޮތް މަހެއް ނޫނެވެ. ސަރުކާރުން ގެއްލުމާއި ފައިދާއަށް ޒިންމާވާ ސައްތައިން ސައްތަ ސަރުކާރު ހިއްސާވާ ކުންފުންޏެކެވެ. ރައްޔިތަކަށް ސަރުކާރުން ކޮށްދޭ ކަމަކުން އެއްވެސް ޒިންމާއެއް އެޗްޑީސީ އުފުލަން ޖެހެންޏާ އެކަމުގެ ޒިންމާ އެއިރަކު އޮންނަ ސަރުކާރަކުން އުފުލާނެއެވެ. އެކަން ހަމަޖައްސާނީ މުއިއްޒާ ފަޒުލުގެ މިލްކިއްޔާތަކުން ނޫނެވެ.  

ގޯތި ދިނުމުގެ ގެއްލުމުގެ ވާހަކަ އަޑުގަދަކޮށް ދައްކަމުން މިވީ ކުޑަ ދުވަސްކޮޅުގެ ތެރޭގައިވެސް ހުޅުމާލޭން އެތައް ބިމެއް ފަޒޫލާއި މުއިއްޒުގެ މަސްލަހަތުގައި ފުޅިއްސާ ލައިފިއެވެ. މާލޭ ރަންބިމުގައި އާއިލީ ބޮޑެތި ބިންތައް ހުރެ ފަޒުލުގެ އަނބިދަރިންނަށާއި މުއިއްޒުގެ އައުވާނުނަށް ދައުލަތުގެ ފައިސާ ދަވައިގެން މޭޒުދަށުން ބިން ވިއްކަން މާލެ ސަރަހައްދުގެ ބިންތައް ގޯތި ނުދީ ބާއްވާކަށް ލާހިކެއް ނޫނެވެ.