ކުރަންޖެހުނު ކޮންމެކަމެއް ކުރަން ތައްޔާރު: ރައީސް ސޯލިހު
އެމްޑީޕީ އޮތީ ރައްޔިތުންނާ އެކީގައި

ރައްޔިތުންގެ ހައްގުތައް ހޯދައިދިނުމަށް ކުރަންޖެހުނު ކޮންމެ ކަމެއް ކުރައްވަން ރައީސް ސޯލިހު ހުންނެވީ ތައްޔާރަށެވެ. ރައީސް ސޯލިހު ވިދާޅުވި ގޮތުގައި މިއަދު އަޅުގަނޑުމެން ކުރަންވީ ކަމަކީ އެންމެން ފަހަށް ނުޖެހި ނުކުތުމެވެ. އޭރުން ސަރުކާރަށް އަޑުއަހަން މަޖުބޫރުވާނެ ކަމަށާއި ރައްޔިތުން ބޭނުންވާ ގޮތަށް ކަންތައްތައް ކުރަން މަޖުބޫރުވާނެ ކަމަށް ރައީސް ސޯލިހު ވިދާޅުވިއެވެ.
"މިއަދު އަޅުގަނޑުމެން ކުރަންވީ ކަމަކީ އަޅުގަނޑުމެންގެ ތެރެއިން އެންމެން ކުރަންވީ ކަމަކީ، ފަހަށް ނުޖެހި ނުކުންނަންވީ. އަޑުއަހަން މަޖުބޫރުވާނެ. ރައްޔިތުން ބޭނުންވާ ގޮތަށް ކަންތައްތައް ކުރަން މަޖުބޫރުވާނެ." ކަމަށް ވެސް ރައީސް ސޯލިހު ވިދާޅުވިއެވެ.
ރައީސް މުއިއްޒު ރައްޔިތުންގެ ފަޅީގައި ރައްޔިތުންނާ ދުރުގައި ހުންނެވިޔަސް ރައީސް ސޯލިހާއި އެމްޑީޕީ އޮތީ ރައްޔިތުންނާއެކުގައެވެ. ރައީސް ސޯލިހު ވިދާޅުވަނީ "އަޅުގަނޑުމެން ނުވާނެ ފަހަތަށް ޖެހިގެންނެއް. ބާރު އޮތީ ރައްޔިތުންގެ އަތް މަތީގަ. އެމްޑީޕީ މިއަދު މި އޮތީ ތިޔަ ރައްޔިތުންނާ އެކީގައި" ކަމަށެވެ.
ރައީސް ސޯލިހު ވިދާޅުވި ގޮތުގައި ކުރިމަތިން ފެންނަމުންދާ ވިލާގަނޑުން ފެންނަނީ ވަރަށް ބަނަ ދުވަސްތަކެކެވެ. ބިރުވެރި ދުވަސްތަކެކެވެ. ނާމާންް ދުވަސްތަކެކެވެ. ދަތި އުނދަގޫ ދުވަސްތަކެކެވެ. މިކަމާ ދޭތެރޭގައި މިހާރުން މިހާރަށް މަސައްކަތްތަކެއް ނުކޮށްފި ނަމަ އަނިޔާވެރި ދުވަސްތަކަކަކާ އަނެއްކާ ވެސް ކުރިމަތިލާން ޖެހިދާނެކަމަށް ރައީސް ސޯލިހު ވިދާޅުވިއެވެ.
މިހާރުގެ ސަރުކާރުން ބޭނުންވަނީ ރާއްޖޭގައި އަނެއްކާ ވެސް ހުދުމުހުތާރު ވެރިކަމެއް ގާއިމް ކުރަން ކަމަށާއި އެކަމާ ދެކޮޅަށް ހުރިހާ ރައްޔިތުން ނުކުންނަންޖެހޭ ކަމަށް ރައީސް ސޯލިހު އިލްތިމާ ކުރެއްވިއެވެ.
ގާނޫނު އަސާސީގެ ދިފާއުގައި ރޭގެ ޖަލްސާގައި ވާހަކަ ދައްކަވަމުން ރައީސް ސޯލިހު އިތުރަށް ވިދާޅުވީ، ކުރިއަށް އޮތީ ނާމާން ދުވަސްތަކެއް ކަމަށާއި އެކަންކަމާ ދެކޮޅަށް މިއަދުން މިއަދަށް ފިޔަވަޅުތަކެއް އަޅަންޖެހޭ ކަމަށެވެ.