އެއްވެސް ޕްރޮޖެކްޓެއް ނުހިންގާ 31 ބިލިއަން ފަރިއްކުޅުއްވީ: މަޓޭ

ރާއްޖޭގެ ތާރީހުގައި ފާސްކުރެވުނު އެންމެ ބޮޑު ބަޖެޓް ކަމުގައިވާ 49.3 ބިލިޔަން ރުފިޔާ ދިހަމަސް ދުވަސް ނުވަނީސް ހުސްކޮށްލާ އިތުރު 5 ބިލިޔަން ރުފިޔާގެ ބަޖެޓަކަށް ވަނީ ރައްޔިތުންގެ މަޖިލީހުގައި އެދެފައެވެ. ބަޖެޓް ބަހުސްގައި ވާހަކަ ދައްކަވަމުން ކެންދޫ ދާއިރާގެ އިއްޒަތްތެރި މެންބަރު އޮނަރަބަލް މައުރޫފް ޒާކިރު ސަރުކާރަށް ވަށިވަށިން ދިނީ ދޭންވެގެންނެވެ.

ރައީސް މުއިއްޒާއި އޭނާގެ އައުވާނުން 2024 ވަނައަހަރުގެ ބަޖެޓް ދިރުވާލިގޮތް ކެންދޫ ދާއިރާގެ މެންބަރ މައުރޫފް ޒާކިރު އެވަނީ ކުރުކޮށް ފޮނިކޮށް ދިވެހި ރައްޔިތުންނަށް ވިދާޅުވެ ދެއްވާފައެވެ. ރައީސް ސޯލިހުގެ ވެރިކަމުގައި އިދިކޮޅުގައި ތިބެގެން ޕްރޮގްރަސިވް ކޯލިޝަނުގައި ހިމެނޭ އެންމެން ގޮވިހާ ކުނިފުޅަ އެއަށްވުރެ ހުތުރުކޮށް އެއަށްވުރެ އަވަހަށް އެމީހުންގެ އަނގަޔަށް ވަދެ ނިމުނީއެވެ.

މެންބަރު މަޓޭ ވިދާޅުވީ ދައުލަތުގެ ބަޖެޓުގައި 2024 ވަނަ އަހަރު ޕީއެސްއައިޕީ އަަށް 9 ބިލިއަން ޖަހާފަައިވާއިރު ޖޫން މަހާ ހަމަޔަށް އައިއިރު ޕީއެސްއައިޕީ ޕްރޮޖެކްޓްތަކަށް ހަރަދުކުރިކަމަށް ފެންނަނީ 2 ބިލިއަން ރުފިޔާ ކަމަށެވެ. އަނެއް 7 ބިލިއަން ރުފިޔާއަށް ވީގޮތެއް ނޭނގޭ ކަމަށް މެންބަރު މަޓޭ ވިދާޅުވިއެވެ.

މައުރޫފް ޒާކިރު މަޖިލީހަށް ސާފުކޮށް ދެއްވި ގޮތުގައި 2024 ވަނަ އަހަރަށް ފާސްކުރި 49 ބިލިއަން ރުފިޔާގެ ބަޖެޓުން ހަރަދުކުރެވުނު ކަމަށް ފެންނަން ހުރީ 18 ބިލިއަން ރުފިޔާއެވެ. ބާކީ އޮންނަންޖެހޭ ކަމަށް ދައްކާ 31 ބިލިއަން ރުފިޔާ ފެންތަށްޓަކާ ނުލައި މިސަރުކާރުން ދިރުވާލާފައި ވާކަމަށް މައުރޫފް ވިދާޅުވެއެވެ.

ކެންދޫ ދާއިރާގެ އިއްޒަތްތެރި މެންބަރު އިތުރަށް ތަފްސީލް ކޮށްދެއްވަމުން ވިދާޅުވީ "އަޅުގަނޑު ދާއިރާގެ ކަމަދޫ އާއި ކެންދޫގައި އެއްވެސް ޕްރޮޖެކްޓެއް ނުހިނގާ. ޕްރޮޖެކްޓުތައް ބަޖެޓުގައި ޖަހާފައި އެބަހުރި. އަދަދުތައް ކަނޑައަޅާފައި އެބަހުރި." ކަމަށެވެ. ސަރުކާރާއި ސަރުކާރަށް ތާއީދުކުރާ މެންބަރުންނަށް ނިސްބަތް ކުރައްވާ މެންބަރު މައުރޫފް ޒާކިރު ވިދާޅުވީ "31 ބިލިއަން ފަރިއްކުޅުއްވައިގެން ތިޔަ ތިއްބެވީ އެއްވެސް ޕްރޮޖެކްޓެއް ނުހިންގަވާ" ކަމަށެވެ.