ކުރީ ސަރުކާރުގެ ވެރިން ހައްޔަރުކުރަން ފަށަނީ!
އެކުގައިނެތް ރައްޔިތުން ކިބައިން ބަދަލުހިފާނަން: މުއިއްޒު
ރައީސް މުއިއްޒު ބުނާ ގޮތުން ރައްޔިތުން ތިބެންޖެހޭނީ އެޅިހާބަތަކަށް ރިހަވެގެންނެވެ. ސަރުކާރުން ހެދިހާއެއްޗެއް ހެދިގެންނެވެ. ސަރުކާރުގެ އެއްވެސް ނިންމުމަކަށް ފާޑުކިޔާ ދެކޮޅު ހެދިގެން ނުވާނެއެވެ. އިހުތިޖާޖުކޮށް ޝަކުވާކޮށްގެން ނުވާނެއެވެ. ސަރުކާރުން ހެދިހާއެއްޗެއް ހެދިގެން ރައްޔިތުން ނެތިއްޔާ ރައްޔިތުންގެ ކިބައިން ބަދަލުހިފާނެކަމަށް ރައީސް މުއިއްޒު އެބުނީ ވަރަށް ފާޅުގައެވެ.
މުއިއްޒު ބުނިގޮތުގައި ރާއްޖޭން ބަދަލު ހިފުމުގެ ރޫހު ނައްތާލެވިއްޖެއެވެ. ރައްޔިތުން މުއިއްޒު ބޭނުންވާ ގޮތުގައި ތިބިހާ ހިނދަކު ބަދަލު ހިފުމުގެ ރޫހެއް ނުފެންނާނެއެވެ. މުއިއްޒުގެ ފަރާތުން ބަދަލު ހިފުމުގެ ރޫހު ފެންނާނީ މުއިއްޒު ޖަހާހާ ބެރަކަށް ނުނަށަންޏާއެވެ.
އަދުލު އިންސާފު ގާއިމު ކުރުމުގެ ނަމުގައި މުއިއްޒު އަމާޒު ހިފާފައި ހުރީ ކުރީ ސަރުކާރުގެ އިސްވެރިން ހިފާ ހައްޔަރު ކުރުމަށެވެ. އެއްވެސް ބޭފުޅެއްގެ މޫނަކަށް ކަނދުރާއަކަށް ބެލުމެއް ނެތިއެވެ. އަދުލު އިންސާފު ގާއިމުކުރުމުގެ ނަމުގައި ބަދަލު ހިފުމަށެވެ. އެތެރެހަށީގައި ރޯވެ އަނދަމުންދާ ބަދަލު ހިފުމުގެ ހުޅުގަނޑު އެންމެ ފަހުން ކެތްނުވެގެން ވަރަށް ފާޅުގައި މުއިއްޒު އެ ބޭރުކޮށްލީއެވެ.
އިދިކޮޅު ސިޔާސީ ވާދަވެރިކަމަށް ރާއްޖޭގައި މިހާރު ޖާގަ ނޯންނާނެ ކަމަށް އެބުނީއެވެ. ސަރުކާރާއެކީ މަސައްކަތްކޮށް މުއިއްޒަށް އިހުލާސްތެރިކަމުގެ އަތް ދިއްކުރާ މީހަކަށް ނޫނީ ރައްކާތެރިކަމެއް ނެތްކަމުގެ އިންޒާރު މުއިއްޒު ރައްޔިތުންނަށް ރޭގައި އެދިނީއެވެ. ހަގީގީ ގޮށްމުށުގެ ވެރިކަމަށް ފެށިއްޖެކަން ރަސްމީކޮށް އެވަނީ އިއުލާނުކޮށްފައެވެ.
