މުއިއްޒަށް: ޒިންމާދާރު ލިޔުންތެރިކަމަކީ ހަނާކޮށް ފަނާކުރިޔަސް ސަނާކިޔުން!
ޒިންމާދާރު ލިޔުންތެރިކަމާއި ޒިންމާދާރު ނޫސްވެރިކަމުގެ ވާހަކަ މުއިއްޒު ނުދައްކާށެވެ. ގައުމު ހަނާކޮށް ފަނާކޮށް ގައުމަށް ގެއްލުންދެނީ ލިޔުންތެރި ކަމަކުންނޫނެވެ. މުއިއްޒު ހިތުހުރި ގޮތެއް ގައުމަށް ހަދާ ހަނާކޮށް ފަނާކޮށްލާއިރު ލިޔުންތެރިން އެވާހަކަ ލިޔެ ހާމަކުރާތީ މޭކަރާނެއެވެ. ކަންބޮޑުވާނެއެވެ. ޒިންމާދާރު ކަމެއް ނެތޭވެސް ބުނާނެއެވެ.
މުއިއްޒު ވެރިކަމަށް އައުމަށް ހެދިހާދޮގާ އޮޅުވާލި އޮޅުވާލުމުގެ ވާހަކައިގެ ހަނދާން އައުކޮށްދޭތީ ދަތްކުނޑި ވިކޭނެކަން އެނގެއެވެ. ވީހާ ވައުދާ ވަމުންދާހާ ވައުދުތައް ނުފުއްދާ ދައުލަތް ދަވާލާ ވާހަކަ ދައްކާތީ ރުޅި ގަދަވާނެއެވެ. ކުރީ ސަރުކާރުތަކުން ކޮށްފައި ހުންނަ ކަންކަން ކާޅު ހާލި ހެދީމާ ކޮވެލި ބިސް އަޅާހެން މުއިއްޒު މެޑެލް ޖަހާވާހަކަ ދައްކަންޏާ ބޮލުރޮދި ކެނދޭނެއެވެ. ރާވައިގެން ހިންގާ ބޮޑެތި ވައްކަމާއި ޖަރީމާތަކުގެ ވާހަކަ ދައްކާތީ ލިޔުންތެރިކަމުގައި ޒިންމާދާރުކަން އޮންނަކަމަކަށް މުއިއްޒަކަށް ނުވާނެއެވެ.
އަމާނާތަކީ ހަމައެކަނި ލިޔުންތެރި ކަމެއް ނޫނެވެ. ވެރިކަމަކީ މާ ބޮޑު އަމާނާތެކެވެ. މާތް ރަސްކަލާނގެ ރަސްކަންފުޅު ގަންދީ ހުވާކޮށްގެންހުރެ މުއިއްޒު އަމާނާތްތަކަށް ހިޔާނަތްތެރިވާ ވާހަކަ ލިޔުނީމާ އެވަހަކަ ލިޔާ ގަލަންތަކުގައި ދޯރި ޖައްސަން އުޅުނަސް އެކަމެއް ނުވާނެއެވެ.
މުއިއްޒާއި މުއިއްޒުގެ އައުވާނުން ރޯމާދުވާލު ހިންގަމުންދާ ބޮޑެތި ޖަރީމާތަކުގެ ވަހަކަ ހުއްޓާނުލާ ނުލިޔެވޭނަމަ ހަކުރާ ޖަހައިގެން ކާ ގަބުޅި ފޮއްޗެއްހެން ގައުމު ކައި ހުސްކޮށްލާކަށް ލަހެއް ފަހެއް ނުވާނެއެވެ. ހީރަސް ކެނޑި ވިއްސި ވިހާލިވެފައިވާ ދައުލަތް ޖެހުނު ގޮތަކަށް ލޫޓުވަމުން ދާއިރު އެއްވެސް ބަޔަކު އެވާހަކަ ދެއްކުމަށް މުއިއްޒަށް ނުރުހެވޭނެއެވެ. ޒިންމާދާރު ލިޔުންތެރިކަމަށް މުއިއްޒަށް ވާނީ ސަނާކިޔުމެވެ.
ޖެހެލުން ކުޑަ ލިޔުންތެރިންގެ މިންނަތް މަސައްކަތުން މުއިއްޒު ހިންގާ ޖަރީމާތަށް ރައްޔިތުންނާ ހަމައަށް ތިލަވެ ހަދާހާ ދޮގު ފަޅާއަރާ ތިބެންވީ އޮޅުވާލުމާ ހީލަތުގެ ފަރުދާތައް ނެގި ރައްޔިތުންގެ ލޯތަކަށް ކަޝްފުވީމާ ނުވެ ނުދާނެ ގޮތް ވަމުން ދިޔުމަކީ މުއިއްޒު ބޭނުންވާނެ ގޮތެއް ނޫނެވެ. ރައްޔިތުންގެ މަދު ބައެއްގެ ހިތުގައި މުއިއްޒުގެ މައްޗަށް އޮތް ލޯތްބައި އިހުތިރާމުވެސް އަރުއްވައިގަނެ މުއިއްޒާ ދެކޮޅަށް މުޅިގައުމު ތެދުވާތަން ދެކޭކަށް މުއިއްޒު ބޭނުމެއް ނުވާނެއެވެ.
މުއިއްޒު ކޮށްގެން ހުރި ހުވަޔަކީ ދައުލަތް ދަވާލަން ލިބިފައިއޮތް ތަޅުދަޑިއެއް ނޫންކަން ރައްޔިތުންނަށް ރަނގަޅަށް އެނގެއެވެ. ގައުމާއި ދީނާއި އެއްބައިވަންތަކަމާއި އެއްބައެއް ވަންތަކަމުގެ ވާހަކަ ދައްކައިގެން ރައްޔިތުންގެ ބޯދޮއްވައިގެން ގައުމުދަވާލަން މުއިއްޒަށް ފުރުސަތުދީގެން ތިބޭނެކަމަށް ހީނުކުރާށެވެ. ލިޔުންތެރިކަމުގެ ޒިންމާދާރުކަން މުއިއްޒަށް އިހުސާސް ވާނީ އޭރުންނެވެ.
