ސައިފް ގަޔަށް ވަޅިޖެހީ ބަންގާޅިއެއް!
ގެއަށް ވަގަށް ވަދެ ސްޕަރ ސްޓަރ ސައިފް އަލީ ޚާނަށް ވަޅިން ހަމަލާ ދިން މީހާ ހައްޔަރުކޮށްފިއެވެ. ސައިފަށް ހަމަލާ ދިނީ އިންޑިއާގައި އުޅޭ ބަނގުލަދޭޝް މީހެއްކަމަށް މުމްބާއީ ފުލުހުން ބުނެއެވެ.
މައްސަލައިގެ ތުހުމަތުގައި ހައްޔަރުކޮށްފައިވާ ބަނގްލާދޭޝް މިހާއަކީ މުހައްމަދު ޝަރީފުލް އިސްލާމް ޝެހެޒާދު ކިޔާ މީހެކެވެ. އޭނާ އިންޑިއާގައި އުޅެމުން އައިސްފައިވަނީ އޭނާގެ ނަން އޮޅުވާލައި ބިޖޯއި ދާސް ގެ ނަމުގައެވެ. އޭނާއަކީ މުމްބާއީގެ ރެސްޓޯރަންޓެއްގައި ވެއިޓަރެއްގެ ގޮތުގައި މަސައްކަތް ކުރަމުން އަންނަ މީހެކެވެ.
ސައިފަށް އޭނާ ހަމަލާ ދިނީ މި މަހުގެ 16 ވަނަ ދުވަހުގެރޭ ދަންވަރު ސައިފް އަލީ ޚާން ދިރިއުޅޭ ގެއަށްވަދެ ވަށްކަން ކުރަން އުޅެނިކޮށް ސައިފް އަށް ހޭލެވިގެން އޭނާ އާއި ކުރިމަތިލުމުން ހިނގި މާރާމާރީގައެވެ. ސައިފްގެ ހަށިގަނޑުގެ 6 ތަނަކަށް އޭނާ ވަޅިން ހަމަލާދީފައިވެއެވެ.
ސައިފަށް ހަމަލާ ދިން މީހާ ފުލުހުން އަތުލައިގަތީ މިއަދުގެ ވަރަށް ހެނދުނުގެ ވަގުތެއްގައެވެ. އޭނާގެ ބަންދާ މެދު ގޮތެއް ނިންމަން މިއަދު ކޯޓަށް ހާޒިރު ކުރާނެއެވެ.
