ޖަނަތާ އަދާލަތު އިހުސާނާ އަރާހަމަނުކޮށެއް ނުހުންނާނެ!
ލަދުހަޔާތުގެ ކަންފުޅެއްވެސް ހަމަ ނެތީއެވެ. މާތް ރަސްކަނލާގެ ރަސްކަންފުޅު ގަންދީ ހުވާކޮށްގެން ހުރެ ފާޅުކަން ބޮޑުވެގެންވާ ދޮގު ހަދަނީ މުއިއްޒު އެކަންޏެއް ނޫނެވެ. މުއިއްޒުގެ ވަޒީރުންގެ މަޖިލީހުގައިވެސް ތިބީ ދޮގުވެރިންނެވެ. ދާހިލީ ވަޒީރު އިހުސާނަކީ ވަޒީރުންގެ ތެރެއިންވެސް ދޮގުހެދުމަށް އަރާހުރި މީހެކެވެ.
ޕީއެންސީއަށް މެންބަރުން އިތުރުކުރުމަށް ޒާތީ މައުލޫމާތު ވަގަށް ނެގުމަށް ހުރިހާ ދޮރެއް ހުޅުވާދިނީ މިނިސްޓަރ އަލީ އިހުސާނުކަން ޝައްކެއް ނެތްމިން ވަރަށް މިހާރު އާއްމު ރައްޔިތުނަށް ހަމަވެއްޖެއެވެ. އޮޅުވާލާ ބޮލުން ނައްޓާލަން ކޮންމެ ދޮގެއް ހެދިޔަސް އިހުސާނުގެ ބޮލުން އެކަމެއް ނައްޓައެއް ނުލެވޭނެއެވެ.
އަޖައިބެކެވެ. ވެލާނާގެއަކީ ޕީއެންސީގެ ޖަގަހެއް ނޫނެވެ. އެތާކު ޕީއެންސީ ޖަގަަހައެއް ނުހުރެއެވެ. އެތާ ހުންނަނީ ސަރުކާރުގެ އޮފީސްތަކެވެ. ސަރުކާރުގެ އޮފީސްތަކުގައި ޕީއެންސީއަށް ނިސްބަތްވާ ސިޔާސީ މީހުން ވަޒީފާ އަދާކުރަން ތިބުމަކީ ބައިހަދާފާ ގޮސް ޕީއެންސީގެ މަސައްކަތް ސަރުކާރުގެ އޮފީސްތަކުގައި ކުރަން ޖެހޭ ސަބަބެއް ނޫނެވެ. ސިޔާސީ މުއައްޒަފުންނަށް އެއްޔަކީ ދީފައި އޮންނަ ލައިސަންސެއް ނޫނެވެ.
ވެލާނާގޭ ފްލޯއެއްގައި ސިޔާސީޕާޓީއަކަށް މީހުން ވެއްދުމަށް ފޯމްފުރާކަން އެގޭ ހިސާބުން އެކަން ވަގުތުން ހުއްޓުވަންޖެހޭ މީހަކީ އިހުސާނެވެ. ކޮންރަސްމީ ގަޑިއެއް ނުރަސްމީ ގަޑިއެއްގެ ވާހަކަ ދައްކާކަށް ހެއްޔެވެ. ލީކުވެފައިވާ ފޮޓޯތަކުން އެކަނިވެސް އެކަމެއް އެކުރީ ސަރުކާރުގެ ރަސްމީ ގަޑީގައިކަން ވަރަށް ރަނގަޅަށް ސާބިތުވެއެވެ. އެންމެންހެން ޓައީއަޅައިގެން ކާޑްއަޅައިގެން ފުލްކިޓްގައި އެތިބީ ނުރަސްމީ ގަޑިއަކުނޫނެވެ. ރަސްމީވިޔަސް ނުރަސްމީވިޔަސް އެއްވެސް ގަޑިއެއްގައި ސަރުކާރުގެ އޮފީހެއްގެތެރޭގައި ސިޔާސީ ޕާޓީއަކަށް މީހުން ވެއްދުމަށް ފޯމުފުރުމުގެ މަސައްކަތެއް ނުހިންގޭނެއެވެ.
ނެޝަނަލް ރަޖިސްޓްރޭޝަންގެ ޑޭޓާތަކުން މީހުންގެ ޒާތީ މައުލޫމާތު ވަގަށް ނަގައިގެން އަތް އަނބުރާލާފާ ޕީއެންސީއަށް މީހުން ވައްދަން ފޯމް ފުރާތަން ބަލަން ގޮސް ހޯމް މިނިސްޓަރ އިހުސާނު ހުންނަ ހިސާބުން އިހުސާނަށް އެހުރެވެނީ މާތްކަލާގެ ރަސްކަންފުޅު ގަންދީ ކުރި ހުވައާއި ހިލާފުވެގެންނެވެ. ތިމާގެ ޒިންމާގެ ދަށުގައިހުރި އަމާނާތަކަށް ހިޔާނާތްތެރި ވެގެންނެވެ.
ހޯމް ލޭންޑް ސެކިއުރިޓީގެ ނަމުގައި ގައިރު ގާނޫނީ އަމުރު ހިންގަން އިތުރަށް ނުހުރެ އިހުސާން ވަޒީރުކަމުން އިސްތިއުފާ ދޭށެވެ. ވަގުފޯމްތަކެއް އިލެކްޝަންސްއަށް ހުށަހަޅާފައި ވާކަމަށް ޕީއެންސީން ވެސް އެވަނީ އިއުތިރާފް ވެފައެވެ. އެހެން ކަމުން އިހުސާނު އިސްވެހުރެ ހިންގި ޒާތީ މައުލޫމާތުން ވައްކަންކުރުމުގެ މައްސަލައިގެ އަވަސް ތަހުގީގެއް ހިންގުމުގެ އަމުރު ޕީޖީން ފުލުހުންނަށް ނުނެރުނަސް "ޖަނަތާ އަދާލަތު" އިހުސާނާ އަރާ ހަމަނުކޮށެއް ނުހުންނާނެއެވެ.
