އޮޑިޓް ރިޕޯޓް: އަމާނާތްތެރިކަމުގެ ހެޓްރިކް ޝާހިދަށް

ފަހަކަށް އައިސް ދައުލަތުގެ މުއައްސަސާތަކާއި ވުޒާރާތަކަކީ ކޮރަޕްޝަނާ ފަސާދައިގެ ތުހުމަތު ވަރަށް ބޮޑަށް ކުރެވޭ ތަންތަނެވެ. ރައީސް މައުމޫނުގެ ވެރިކަމުއްސުރެ ކޮރަޕްޝަނާއި ފަސާދައިގެ އިނގިލި ދިއްނުކުރެވޭ ތަނެއް ވެރިއެއް ރާއްޖޭގައި މަދެވެ. މިފަދަ ހާލަތެއްގައި ގައުމުގެ ކަންކަން އޮތް އިރެއްގައި އެއިން ކަމެއްގައި ނުޖެހި ސަލާމަތްވެވޭނީ ވަރަށްވެސް ނަޒާހަތްތެރި އަމާނާތްތެރި ވެރިއަކު ހުންނަ އިދާރާއަކަށެވެ. 

ގާނޫނާއި ގަވައިދާއި އެއްގޮތަށް ދައުލަތުގެ މުއައްސަސާތަކުން ކަންތައް ކުރޭތޯ ބަލާ ފާރަވެރިވާ ފަރާތަކީ އޮޑިޓަރ ޖެނެރަލެވެ. ސަރުކާރުގެ އިދާރާތަށް އަހަރުން އަހަރަށް އޮޑިޓްކޮށް އަޅަންޖެހޭ އިސްލާހީ ފިޔަޅުތައް އަޅުވަނީ އޮޑިޓަރ ޖެނެރަލެވެ. އޮޑިޓަރ ޖެނެރަލް އޮޑިޓްކުރާ ގިނަ އިދާރާތަކުގައި ގިނަ ކަންތައްތަކެއް ހުންނަނީ ވަރަށް ގޯސްކޮށް އުސޫލާއި ގާނޫނާ ހިލާފަށެވެ. އެހެން ކަމުން ގިނަ އިދާރާތަކެއްގެ ގިނަ ކަންތައްތަކެއް ކޮންމެ އަހަރަކުވެސް އިސްލާހުކޮށް އެކިވަރުގެ ފިޔަވަޅު އަޅަން އޮންނަނީ ޖެހިފައެވެ. 

ކޮރަޕްޝަނާއި ފަސާދައިން ކަޅިވެފައިވާ މިޒަމާނުގައި އޮޑިޓަރ ޖެނެރަލަށް އެއްވެސް ގޯހެއް ނުފެނި އެއްވެސް އިދާރާއެއް އޮވެދާނެކަމަށް ބަޔަކު ގަބޫލުނުކޮށްފާނެއެވެ. އެހެނެއް ކަމަކު ނިމިދިޔަ ސަރުކާރުގެ ހާރިޖީ ވުޒާރާއަކީ ދެވައެއް ނެތް ވުޒާރާއެއްކަން އޮޑިޓަރ ޖެނެރަލް ވަނީ ކަށަވަރު ކޮށްދެއްވާފައެވެ. 

ފޮރިން މިނިސްޓްރީގެ 2020 ވަނަ އަހަރާއި 2021 އަހަރުގެ އޮޑިޓް ރިޕޯޓުން އެ މިނިސްޓްރީއަށް ވަނީ އޭ ޕްލަސް ލިބިފައެވެ. 2020 ވަނަ އަހަރާއި 2021 ވަނަ އަހަރު ފޮރިން މިނިސްޓްރީން މާލީ ހުރިހާ ކަމެއް ކޮށްފައިވަނީ ރަނގަޅަށް ކަމަށް އެ ދެއަހަރުގެ އޮޑިޓް ރިޕޯޓުގައި ވަނީ ފާހަގަ ކޮށްފައެވެ.

ހުސްވި ހަފްތާގައި 2022 ވަނަ އަަހަރުގެ އޮޑިޓް ރިޕޯޓްވެސް އޮޑިޓަރ ޖެނެރަލް އެވަނީ ނެރުއްވާފައެވެ. 2022 ވަނަ އަހަރުވެސް ހާރިޖީ ވުޒާރާގައި މާލީ ހުރިހާ ކަމެއް ކޮށްފައިވަނީ ވަރަށް ރަނގަޅަށް ކަމަށް އޮޑިޓަރ ޖެނެރަލް ބަޔާން ކުރައްވާފައިވެއެވެ. 

2022 ވަނަ އަހަރު ފޮރިން މިނިސްޓްރީން ކޮންމެ ކަމެއްވެސް ކޮށްފައިވަނީ މާލިއްޔަތު ގާނޫނާއި ދައުލަތުގެ މާލިއްޔަތު ގަވައިދާ އެއް ގޮތަށާއި ރައްޔިތުންގެ މަޖިލީހުން ފާސްކޮށްފައިވާ ބަޖެޓުގެ މަގްސަދުތައް ހާސިލްވާ ގޮތަށް ކަމަށް ބަޔާން ކޮށްފައިވަނީ މިދިޔަ ހަފްތާގައި އޮޑިޓަރ ޖެނެރަލް އާއްމު ކުރި ފޮރިން މިނިސްޓްރީގެ 2022 ވަނަ އަހަރުގެ އޮޑިޓް ރިޕޯޓުގައެވެ.

ޖެހިޖެހިގެން 3 އަހަރު ފޮރިންމިނިސްޓްރީގެ މާލީކަންކަން ކޮށްފައިވަނީ ގާނޫނާއި ގަވައިދާއި އެއްގޮތަކަށްކަމަށް އޮޑިޓަރ ޖެނެރަލް ވިދާޅުވުމަކީ އެ ވުޒާރާގެ ވަޒީރުގެ އަމާނާތްތެރިކަމާއި ކޮރަޕްޝަނުން އެއްކިބާވެފައިވާ ދާއިރާއަކަށް ފޮރިން ސާވިސް ހެއްދެވުމަށް އެ މަނިކުފާނު ކުރެއްވި މަސައްކަތްޕުޅުގެ ނަތީޖާކަން ސާބިތުވެއެވެ. ޖެހިޖެހިގެން ތިން އަހަރު އޮޑިޓް ރިޕޯޓަށް އޭ ސްޓަރ ލިބުމަކީ އޮނަރަބަލް އަބްދުއްލާ ޝާހިދަށް އަމާނާތްތެރިކަމުގެ ހެޓްރިކް ލިބުމެވެ. އެމްޑީޕީގެ ރައީސް އާއި އެމްޑީޕީ ކޮރަޕްޝަނުން އެއްކިބާވާ ކަމުގެ ހެއްކެކެވެ.