އެޗްޑީސީ މިހާރުވެސް ދަނީ ގާނޫނާ ހިލާފުވަމުން: އުސްތާޒް މައުރޫފް
އެޗްޑީސީ މިހާރުވެސް އެ ދަނީ ގާނޫނާ ހިލާފުވަމުންކަމަށް އަލްއުސްތާޒު އަހުމަދު މައުރޫފް ވިދާޅުވެއްޖެއެވެ. އެޗްޑީސީގެ ޗެއަރމަން ސޮއިކުރައްވާފައިވާ ސީޓީއެއް ހީރަސް ކުރައްވާ އެކްސްގައި ކުރެއްވި ޕޯސްޓްގައި މައުރޫފް މުހިންމު ގާނޫނީ ނުކުތާތަކެއްވަނީ ފާހަގަ ކުރައްވާފައެވެ.
މައުރޫފް ވިދާޅުވަނީ ޗެއަރމަން އަކީ ބޯޑުގެ ނަން-އެކްޒެކެޓިވް މެންބަރެއް ކަމަށެވެ. ވެއަރމަނަށް ކުންފުނީގެ އެތެރޭގެ ހިންގުމުގެ ކަންކަމުގައި ގޮތް ނިންމައި، ލިޔެކިޔުމުގައި ސޮއިކޮށް ނުހެދޭނެ ކަމަށެވެ.
ޗެއަރމަން ސޮއިކުރައްވާފައިވާ ސިޓީއަކާ ހަވާލާދެއްވާ މައުރޫފް ވިދާޅުވަނީ ވަޒީފާއާބެހޭ ގާނޫނުގެ 23 ވަނަ މާއްދާގެ (ހ) އާއި (ށ) އަށް ހަވާލާދީ ޓާރމިނޭޓް ކުރި ކަމަށް ބުނާއިރު، އެ މައްދާތަކުގައި އޮތީ، ނޯޓިހެއް ދިނުމަކާނުލައި ވަޒީފާއިން ވަކިކުރެވޭނީ، (1) އޭނާގެ މަސައްކަތުގެ އަޚްލާޤު އެކަށީގެން ނުވުމާއި (2) އޭނާ ވަޒީފާގައި އިތުރަށް ބެހެއްޓުމަކީ، އެކަށީގެންވާ ހަމަތަކަށް ބަލާއިރު، ކުރެވޭނެ ކަމެއްކަމަށް ވަޒީފާދޭ ފަރާތަށް ނުފެންނަ ޙާލަތުތަކުގައި ކަމަށެވެ.
ގާނޫނީ ވަކީލު ފާހަގަ ކުރައްވާ ގޮތުގައި މި 2 ހާލަތުން ކުރެ ހާލަތެއް މެދުވެރިވެއްޖެ ކަން އަންގައި، އެ މުވައްޒަފަކު ވަޒިކުރާ ސަބަބު ސާފުކޮށް ބަޔާން ކޮށްދޭންޖެހޭނެ ކަމަށް ގާނޫނު ބުނާކަމަށެވެ. 2 މާއްދާއަކަށް ހަވާލާދިނަކަސް، އެއީ ކޮން ކަމެއްކަން މުވައްޒަފުންނަށް ސާފެއްނުވާނެ ކަމަށާއި ޖާވާބުދާރީވުމަށް އެކަށީގެންވާ ފުރުސަތު ނުދީ އިދާރީ ފިޔަވަޅެއް ނޭޅޭނެކަން އޭނާ ފާހަގަކުރައްވައެވެ.
ވަޒީފާއިން ވަކިކުރުމުގައި "މައުލޫއީ އަދުލުވެރިކަން" އަދި "އިޖުރާއީ އަދުލުވެރިކަން" ގާއިމުކުރުމަކީ ގާނޫނީ ގޮތުން ލާޒިމު ކަމެއްކަމަށް މައުރޫފު ވިދާޅުވެއެވެ. އެ ބަޔަކު މަގާމުތަކުގައި ތިބުމުގެ ސަބަބުން، ހިނގަމުންދާ ތަހުގީގަކަށް ހުރަސްއެޅޭނެ ކަމަށް ބެލެވެންޏާ އެ މުއްދަތައް މަސްއޫލިއްޔަތުން އެކަހެރި ކުރެވިދާނެ ކަމަށާއި ތަހުގީގު ނިމުމުން، އެމީހަކު ހިޔާނާތްވީކަން ނުވަތަ އެފަދަ ކަމެއްގައި ބައިވެރިވީކަން ނުވަތަ އިތުރަށް މަގާމުގައި ބަހައްޓައިފިނަމަ ތަނުގެ ހިންގުމަށް ދަތިވެދާނެކަމަށް ތަހުގީގުން ފާހަގަކުރެވިއްޖެ ނަމަ، ސަބަބު އަންގައިދިނުމާއެކު ވަޒީފާއިން ވަކިކުރެވިދާނެކަމަށް އޭނާ ވިދާޅުވެއެވެ.
ވަކީލު މައުރޫފު ހަވާލާދެއްވާ ލިޔުމުގައި އޮތީ، "ވަޒީފާގެ އެއްބަސްވުން ނިމުމަކަށް ގެންނަން "މި ކޯޕަރޭޝަނުން ނިންމައިފައި" ވާ ކަމަށް" ކަމަށެވެ. އެހެންވިޔާ ބޯޑު ރެޒޮލިޔުޝަނެއް އޮންނަންވާނެއެވެ. ކޯޕަރޭޝަނުގެ ނިންމުމެއް ކަމަށް ވަންޏާ ނިންމޭނީ، ޑިރެކްޓަރުންގެ ބޯޑުގެ ރެޒޮލިޔުޝަނަކުން ކަމަށްވެސް މާއްޓޭ ފާހަގަ ކުރައްވައެވެ.
ވަޒީފާއިން ވަކިކުރި މީހުންނަށް ޓްރައިބިއުނަލަށް މައްސަލަ ހުށަހަޅައި "ކޯޕަރޭޝަނުގެ ނިންމުން" ނިންމި ބޯޑު ރެޒޮލިޔުޝަން ކޮބައިތޯ ސުވާލުކުރެވިދާނެ ކަމަށް އުސްތާޒު މައުރޫފް ފާހަގަ ކުރެއްވިއެވެ. އޭރުން ދައްކާނެ އެއްޗެއް ނޯންނާނެ ކަމަށައި ވަޒީފާއާބެހޭ ޤާނޫނުގެ 23 ވަނަ މާއްދާގެ (ހ) އާއި (ށ) އަށް ހަވާލާދިނަސް، އެފަދަ ހާލަތެއް މެދުވެރިވިކަން ބަޔާންކޮށްދިނުން އެޗްޑީސީގެ މައްޗަށް ލާޒިމުވާނެ ކަމަށް އޭނާ ވިދާޅުވެއެވެ.
ވަޒީފާއާބެހޭ ގާނޫނުގައި ބަޔާންކުރަނީ، މުވައްޒަފަކު ވަޒީފާއިން ވަކިކުރި ސަބަބަކީ އެކަށީގެންވާ ސަބަބެއްކަން ސާބިތުކޮށްދިނުމަކީ ވަޒީފާދޭ ފަރާތުގެ ޒިންމާއެއް ކަމަށެވެ. އަދި، އެ މުވައްޒަފަކު ވަޒީފާއިން ވަކިކުރި ސަބަބަކީ، އެކަށީގެންވާ ސަބަބެއް ކަމުގައި ވަޒީފާދޭ ފަރާތަށް ސާބިތުކޮށް ނުދެވިއްޖެނަމަ، އޭނާ ވަޒީފާއިން ވަކިކުރީ އެކަށީގެންވާ ސަބަބެއްނެތި ކަމުގައި ބެލެވޭނެކަމަށް އުސްތާޒު އަހުމަދު މައުރޫފް ވިދާޅުވެއެވެ.
