މިސްރާބަކީ ރާއްޖެ ރީނދޫކޮށްލުން: ޝާހިދު

2028 ގައި އޮންނަ ރިޔާސީ އިންތިހާބުގައި އެމްޑީޕީގެ ޓިކެޓަށް ވާދަކުރެއްވުމުގެ ޝައުގުވެރިކަން އެމްޑީޕީގެ ޗެއަރޕާސަން އަލްއުސްތާޒު ފައްޔާޒު އިސްމާއީލު ވަނީ ފާޅުކުރައްވާފައެވެ. އޮނަރަބަލް ފައްޔާޒުގެ ވިސްނުންފުޅު ހާމަވުމާއި ގުޅިގެން އެމްޑީޕީގެ ރިޔާސީ ޕްރައިމަރީގައި ދެން ވާދަ ކުރައްވާނީ ކޮންކޮން ބޭފުޅުންނެއްތޯ ބެލުމުގެ ޝައުގުވެރިކަން އެމްޑީޕީގެ މެންބަރުންނާއި އާއްމުން ދަނީ ފާޅުކުރަމުންނެވެ.

މިހާކުރިން ހިޔާލު ހޯދުމުގެ ވޯޓުތައް ނަގާ އެމްޑީޕީގެ ރިޔާސީ ޓިކެޓާއި މެދު އާއްމުންގެ ޝައުގުވެރިކަން ބޮޑުވަމުން ދިޔުމަކީ ހެޔޮފާލެކެވެ. ރައްޔިތުންގެ އުންމީދު އެމްޑީޕީއާއި ގުޅި ލާމެހިފައިވާ މިންވަރު ދައްކުވާދޭ ކަމެކެވެ. އެމްޑީޕީގެ ވެރިކަމަކަށް ރައްޔިތުންގެ ގިނަ ބަޔަކު ކެތް މަދުވެފައި ތިބިވަރު އެނގިގެންދާ ކަމެކެވެ.

އެމްޑީޕީގެ ރިޔާސީ ޓިކެޓަށް ހައެއްކަ ބޭފުޅުން ވާދަ ކުރައްވާނެ ކަމަށް ބެލެވެއެވެ. އެހެން ނަމަވެސް އޮނަރަބަލް ފައްޔާޒު ނޫން ބޭފުޅަކު އިންޓްރެސްޓް އަދި ފާޅެއް ނުކުރައްވައެވެ. އެމްޑީޕީގެ ރިޔާސީ ޓިކެޓް ކޮންމެ ބޭފުޅަކަށް ލިބިވަޑައިގަތަސް ތަފާތު ދައްކަވާނެ ކަމާ މެދަކު ޝައްކެއް ނެތެވެ. 

އެމްޑީޕީގެ ރައީސް އޮނަރަބަލް އަބްދުއްލާ ޝާހިދު ވިދާޅުވަނީ މިވަގުތަކީ އެވަގުތު ނޫން ކަމަށެވެ. ޝާހިދު ވިދާޅުވާ ގޮތުގައި މި ވަގުތަކީ ރައީސް މުއިއްޒުގެ ސަރުކާރުގެ ހުދުމުތާރު ކަމާއި ރާއްޖެއަށް މި ސަރުކާރުގެ ސަބަބުން ލިބެމުންދާ ގެއްލުންތައް ހުއްޓުވަން މަސައްކަތް ކުރުމުގެ ވަގުތު ކަމަށެވެ. އެކަން މަޑުޖައްސާ ދެހާސް އަށާވީހުގައި އޮތް ކަމަކާއި ދިމާއަށް މިސްރާބު އަމާޒު ހިފައިފިއްޔާ ރާއްޖެއަށް ލިބޭ ގެއްލުން އިންތިހާ ބޮޑުވާނެކަމަށް ޝާހިދު ވިދާޅުވެއެވެ.

މި ވަގުތަކީ ދެހާސް އަށާވީހުގައި އޮންނަ ކަމަކަށް އަމާޒު ހިފައިގެން ޝާހިދު ކަމެއް ކުރައްވާނެ ދަނޑިވަޅެއް ނޫންކަމަށް ވެސް ޝާހިދު ވިދާޅުވެއެވެ. " (މިއީ) އަޅުގަނޑު ހަމަގައިމު ވެސް އެ ދިމާލަށް އަޅުގަނޑުގެ އަމާޒު ހިފައިގެން ކަމެއް ކުރާނެ ދަނޑިވަޅެއް ނޫން" ކަމަށް ޝާހިދު ވިދާޅުވިއެވެ. ޕާޓީގެ ރައީސެއްގެ ހައިސިއްޔަތުން ޝާހިދުގެ މުޅި ފޯކަސްއަކީ މުއިއްޒު ސަރުކާރު ޖަވާބު ދާރީކުރުވުން ކަމަށް ޝާހިދު ވިދާޅުވިއެވެ.

ހަމަ އެއާއެކީގައި ދެހާސް ސައްބީހުގައި ލޯކަލް ކައުންސިލް އިންތިހާބު އޮންނަކަން ޝާހިދު ފާހަގަ ކުރައްވައެވެ. އެހެން ކަމުން 2028 ގައި އޮންނަ ކަމަކަށްވުރެ ކުރީން 2026ގައި އޮންނަ ލޯކަލް ކައުންސިލް އިންތިހާބުގައި މުޅި ރާއްޖެ ރީނޑޫކޮށްލުމަށް ވުރެން ވަކީން މުހިންމުކަމެއް ޝާހިދަށް އޮތްކަމަކަށް ނުވެއެވެ." އަޅުގަނޑުގެ މުޅި މިސްރާބު ހުންނާނީ ދެހާސް ސައްބީހުގައި މުޅި ރާއްޖެ ލޯކަލް ކައުންސިލް އިންތިޚާބުގައި ރީނދޫކޮށްލުން." ކަމަށް އެމްޑީޕީގެ ރައީސް ޝާހިދު ވިދާޅުވިއެވެ.