2028ގައި ރާއްޖޭގައި ރިޔާސީ އިންތިހާބެއް ނޯންނާނެ؟!

ޕީއެންސީގައި ރިޔާސީ ޕްރައިމަރީ ނޯންނާނެ ކަމަށް ބުނުމަކުން ހައިރާނެއް ނުވެއެވެ. މީގެކުރިންވެސް އަދުރޭމެން ތިޔަ ސަކަރާތް އޮތީ ޖަހާފައެވެ. ޕްރޮގްރެސިވް ކޯލިޝަނުގެ ކައުންސިލް ސެނެޓަށް ބަދަލުކޮށް ސެނެޓުން ރައީސް ޔާމީނަށް ޕްރޮގްރެސިވް ކޯލިޝަންގެ ރިޔާސީ ޓިކެޓް ޕްރައިމަރީއަކާއި ނުލާ ވެދުން ކުރިތަން މިތިބީ ދެކިފައެވެ.

2023ގެ ރިޔާސީ އިންތިހާބަށް ކުރިމަތިލުމުގެ މުއްދަތު ހަމަވާން 3 ދުވަހަށް ވީއިރުވެސް ތިޔަ ބައިގަނޑުގެ ކެނޑިޑޭޓަކީ ރައީސް ޔާމީނޭ ކިޔައިގެން އުޅުނެވެ. ޑރ. މުއިއްޒާއި އަދުރޭއާއި މުހައްމަދު ސައީދާއި ނައިފަރު ޝިޔާމާއި ގައްސާނާއި އާދަމް ޝަރީފު މެން ޕޯޑިއަމަށް އަރާތިބެ ރައީސް ޔާމީނު ނޫން މީހަކު ޕްރޮގްރެސިވް ކޯލިޝަނުން ރިޔާސީ އިންތިހާބުގައި ވާދަ ނުކުރާނެ ކަމަށް ބުންޏެވެ. 

މުއިއްޒާއި އަދުރޭގެ މުނާފިގުކަމާއި ވެރިކަމަށް ފެން ބޮވާފައި ތިބިވަރުން ރައީސް ޔާމީނުގެ ފަރާތްޕުޅުން އެހެން ނަމެއް އަތުވެދާނެތީ ކޯލިޝަން ކެންޑިޑޭޓަކީ މުއިއްޒު ކަމަށް ވަގުވަގަށް އޮތީ މާކުރިން ހަދާ ނިންމާފައެވެ. ޕްރޮގްރެސިވް ކޯލިޝަންގެ ރިޔާސީ ކެންޑިޑޭޓްކަން މުއިއްޒަށްދީ ފޯމުފުރާ ޕާޓީގެ ތައްގަޑު ފޮރުވާ އެހެން މީހަކަށް ފުރުސަތު ލިބުނަނުދީ ރިޔާސީ ޓިކެޓް މުއިއްޒު ފޭރިގަތްކަން އޮޅިގެން އުޅޭ މީހަކު މިގައުމަކު ނެތެވެ. 

ރިޔާސީ ޕްރައިމަރީ ނުބާއްވާ ވާހަކަ މިހާރު އެ ދައްކަނީ ހަމަ އެބައިގަނޑެވެ. މިއަދު މުއިއްޒު ނޫން މީހަކު ނެތިގެން އުޅުނަސް އިންތިހާބަކާ ހަމަޔަށް ދާއިރު މި ފަހަރު މިނިކާ ބާޒަކަށްވާނީ އަދުރޭގެ ދަރި ފައިސަލް ނޫން ކަމެއްވެސް ނޭނގެއެވެ. އެކަމަކު ބުނަން ހެއްޔެވެ.

ރާއްޖޭގެ ވެރިކަމަކީ އެއްވެސް ބަޔަކު ކުޅެކުޅޭ އެއްޗެއް ކަމަށް ހީކުރުމަކީ މޮޔަކަމެކެވެ. މިދިޔަ ފަހަރު ރައީސް ނަޝީދު މަޖިލީހުގެ ރައީސްކަމުގައި އިނދެގެން ރައީސް ސޯލިހާ ކުޅުނު ކުޅި، މަޖިލީހުގެ ރައީސް ކަމުގައި އަދުރޭ ހުރެގެން މުއިއްޒާ ކުޅެން ޖާގަ ދީފާނެހެން ހިއެއް ނުވެއެވެ. މުއިއްޒަކީ އިބޫ ކަހަލަ ކެތްތެރި މައިތިރި މީހެއް ނޫނެވެ. ވެރިކަމަށްޓަކާ ކުރަންޖެހުނު ކޮންމެ ކަމެއް ކުރާކަށް މުއިއްޒު ލަހެއްފަހެއް ނުވާނެއެވެ.

އެހެން ނޫނަސް ޕީއެންސީގައި ރިޔާސީ ޕްރައިމަރީ އެއް ބާއްވާނީ ރާއްޖޭގައި 2028 ގައި ރިޔާސީ އިންތިހާބެއް ބޭއްވުމުގެ ވިސްނުން ޕީއެންސީގައި އޮތް ނަމަތާއެވެ. މުއިއްޒަށް ވެރިކަމުގައި އަދި އިތުރު އެއް އަހަރު ހުރެވުނަސް ރާއްޖޭގައި 2028ގައި ރިޔާސީ އިންތިހާބެއް ނުއޮންނާނެއެވެ. ގާނޫނު އަސާސީއަށް ބަދަލުގެނެސް ވެރިކަމުގެ ދައުރު ދަންމާލާކަށް މުއިއްޒު ފަހަކަށް ނުޖެހޭނެއެވެ. 

ވެރިކަމުގެ ދައުރު ދަންމާލެވޭނީ ރައްޔިތުންގެ ވޯޓަކުންނޭ ބަޔަކު ބުނެފާނެއެވެ. ރައްޔިތުންގެ ފެންނަ ނުފެންނަ ބެލުމަށް ގާނޫނުއަސާސީ ބުނާ ކަންތައްތަކުގެ ލިސްޓުގައި ރިޔާސީ ދައުރަށް ބަދަލު ގެނައުމަށް އޮންނަ އަކުރު ގާނޫނު އަސާސީއަށް އިސްލާހެއް ގެނެސް އުނިކޮށްލުމުން އެކަން އެނިމުނީއެވެ. އިރުއަރާ އޮއްސުމުގެ ކުރީން އެބަދަލު ގާނޫނުއަސާސީއަށް ގެނައުމަކީ މުއިއްޒަށް އުދަގޫ ކަމަކަށް ނުވާނެކަން މިހާރު އެނގޭނެއެވެ. 

މުއިއްޒުގެ އަމަލާ ބަސް މަގުހުންނަ ގޮތުން ރާއްޖޭގައި 2028 ގައި ރިއާސީ އިންތިހާބެއް އޮތުމަށްވުރެ ނެތުން ގާތެވެ. މުއިއްޒު ވެރިކަމުގެ ބާރުގައި ހުރެގެން މުއިއްޒު އިންތިހާބަކުން ބަލިކޮށް ވެރިކަމުން ދުރުކުރުމަކީ ހުރިހާ ރައްޔިތުން މުއިއްޒާ ދެކޮޅަށް ވޯޓުދިނަސް ވާނެކަމެއް ނޫނެވެ. ގަބޫލުކުރެވޭ ގޮތުގައި މުއިއްޒުގެ ވެރިކަން ނިންމަންޖެހޭނީ މަގު މަތިންނެވެ.