މިހާރު އޮތް ރައްޔިތުންގެ މަޖިލީހުގެ ގާނޫނީ ސައްހަކަން ގެއްލުނީތަ!

ރައްޔިތުންގެ މަޖިލިސްގެ މެންބަރުކަން އެތައް އަހަރަކު ކުރައްވައި މަޖިލީހުގެ ރައީސްކަން ވެސް ކުރައްވައި އދ މަޖިލީހުގެ އާއްމުމަޖިލިސްގެ ރައީސްކަން ވެސް ކުރައްވާފައިވާ އޮނަރަބަލް އަބްދުއްލާ ޝާހިދު ރާއްޖޭގެ މިހާރުގެ ރައްޔިތުންގެ މަޖިލީހުގެ ގާނޫނީ ސައްހަ ކަމާމެދު ސުވާލު އުފައްދަވައިފިއެވެ. ޝާހިދު އެ ސުވާލު އުފެއްދެވީ ރައްޔިތުންގެ މަޖިލީހުން ގާނޫނު އަސާސީއަށް އިއްޔެ ގެނައި ބަދަލަކާ ގުޅިގެންނެވެ. 

ޝާހިދު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ "ގާނޫނުއަސާސީގެ 75 ވަނަ މާއްދާ ބުނަނީ މެންބަރުން އަމަލުކުރަންވާނީ މުޅި ގައުމާއި ހުރިހާ ރައްޔިތުންގެ މަންފާއަށް ކަމަށްް. ދިހަ ގަޑިއިރުގެ ތެރޭގައި ގާނޫނުއަސާސީއަށް ގެނެވުނު ބަދަލާ ގުޅިގެން މުހިންމު ސުވާލުތައް އެބަހުރި: މަޖިލީހުގެ މިހާރުގެ ލެޖިޓިމަސީއަކީ ކޮބާ؟ 75 ވަނަ މާއްދާއާ މި ބަދަލު ފުށުއަރާއިރު މެންބަރުން އަމަލުކުރާނީ ކިހިނެއް؟"ތޯއެވެ. 

ރައްޔިތުންގެ މަޖިލީހުގެ ގޮނޑި ގެއްލުމާ ގުޅޭގޮތުން ގާނޫނު އަސާސީއަށް ގެނައި އިސްލާހުން ގާނޫނީ ބަހުސެއްގެ ތެރެއަށް މަޖިލީހުގެ މެންބަރުންގެ ލެޖިޓެމަސީ މައްސަލަ ވެއްޓިގެން ހިނގައްޖެއެވެ. ބައެއް ގާނޫނީ ވަކީލުންވެސް ބޮޑެތި ކަންބޮޑުވުންތައް ފާޅޔ ކުރައްވާއިރު ބައެއް މެންބަރުން ވިދާޅުވަނީ އެމީހުންގެ މައްޗަށް އެގާނޫނު ނުހިނގާނެ ކަމަށެވެ. ސްޕްރީމް ކޯޓުން އަމިއްލަ އިސްނެގުމުން ވެސް ތިންބާރު އެއްވާ އެއްވުން ހުއްޓުވާ ގާނޫނު އަސާސީ ދިފާއުކޮށްދޭން ޖެހިއްޖެއެވެ.