އިއްޔެގެ އިރާއެކު އޮއްސުނީ ޑިމޮކްރަސީގެ އިރު: ޝާހިދު

ދައުލަތުގެ ތިން ބާރު ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ މުށުތެރެއަށް ލެއްވުމުން ރާއްޖެއަށް ޑިމޮކްރަސީގެ އިރު އޮއްސިއްޖެކަމަށް އދގެ އާއްމު މަޖިލީހުގެ ކުރީގެ ރައީސް އޮނަރަބަލް އަބްދުއްލާ ޝާހިދު ވިދާޅުވެއްޖެއެވެ. އެމްޑީޕީގެ ރައީސް އޮނަރަބަލް ޝާހިދު އެހެން ވިދާޅުވީ އަށެއްކަ ގަޑިއިރު ތެރޭގައި ރާއްޖޭގެ ގާނޫނު އަސާސީއަށް ކުއްލި އިސްލާހުތަކެއް ރައްޔިތުންގެ މަޖިލީހުން ގެނައުމާ ގުޅިގެންނެވެ. 

އެމްޑީޕީގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ޝާހިދު ވިދާޅުވީ އިއްޔެ ފާސްކުރެވިގެން އެދިޔަ ގޮތަށް ގާނޫނުއަސާސީއަށް ކުއްލިއަކަށް އިސްލާހު ގެނައުމަކީ ޑިމޮކްރެޓިކް އެއްވެސް ހަމައަކުން ކަން ކުރެވިގެން ވާނެ ކަމެއް ނޫން ކަމަށެވެ. " އެ އިސްލާހުތައް ފާސްކުރަން ނިންމި ވަގުތު އޮއްސިގެން ދިޔައީ މި ގައުމުގެ ޑިމޮކްރެސީގެ އިރު" ކަމަށް އެމްޑީޕީގެ ރައީސް އަބްދުއްލާ ޝާހިދު ވިދާޅުވިއެވެ.

މަޖިލީހުގެ މެންބަރެއް އަމަލު ކުރި ގޮތަކާއި ނުކޮށް ދޫކޮށްލި ކަމަކާ މެދު މައްސަލަ ހުށަހަޅައި، ސިޔާސީ ޕާޓީގެ ވެރިންނަށް ފެނިއްޖެ ހާލަތެއްގައި، އެ މެންބަރަކު ޕާޓީން ވަކިކޮށް، މަޖިލީހުގެ މެންބަރުކަމުގެ ގޮނޑި ގެއްލުވައިލެވޭ ގޮތަށް ގާނޫނުއަަސާސިއަށް އިއްޔެ ގެނައި އިސްލާހާ އެކު ދައުލަތުގެ ތިން ބާރު ވެސް މިހާރު އޮތީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ މުށުތެރޭގައި ކަމަށް ޝާހިދު ވިދާޅުވިއެވެ.

ގާނޫނު އަސާސީއަށް ގެނައި ނުރަގަޅު މިސާލެއްގެ ގޮތުން ޝާހިދު ވިދާޅުވީ "މިއަދުގެ ރައްޔިތުންގެ މަޖިލީހުގެ ރައީސް ކަން ކުރައްވަމުން ގެންދަވަނީ ޕާޓީއަށް ގަބޫލު ކުރެވޭ ގޮތަކަށް ނޫނޭ ވިދާޅުވެ ޕާޓީން މަޖިލީހުގެ ރައީސް ވަކި ކުރައްވައިފި ހާލަތުގައި ރައްޔިތުންގެ މަޖިލީހުގެ ރައީސްކަމުން އަދި މެންބަރުކަމުން މަޖިލީހުގެ ރައީސް، އޮނަރަބަލް އަބްދުއްރަހީމް ވަކިވެގެން ދާނެ، އިތުރަށް އެއްވެސް ސުވާލެއް މަޖިލީހުގެ ރައީސް އަބްދުއްރަހީމްއަށް، ކުރެއްވުމުގެ ޖާގައެއް، މަސައްކަތެއް ކުރުމުގެ ފުރުސަތެއް ވެސް މިއަދަކު ނޯންނާނެ،" ކަމަށެވެ.

ތިންބާރު ރައީސް މުއިއްޒުގެ މުށުތެރެއަށް ދިޔަ ގޮތުގެ ދެވަނަ މިސާލެއްގެ ގޮތުގައި ޝާހިދު ވިދާޅުވީ "އުއްތަމަ ފަނޑިޔާރާއި ނުވަތަ ފަނޑިޔާރުންނާ ގުޅޭ މައްސަލައެއް މަޖިލީހަށް ހުށަހެޅުމަށްފަހު ވެސް ޕާޓީގެ ވިޕްލައިނެއް ނެރެ، އެ ޕާޓީގެ ވިޕް ލައިނާ ހިލާފުވާ ކޮންމެ މީހަކު ރައްޔިތުންގެ މަޖިލީހުން ކަނޑައިލައްވާނެ ކަމުގެ އިންޒާރު އިއްޔެ ގާނޫނުއަސާސީއަށް އެ ގެންނެވި ބަދަލުން ލިބިގެން ދިޔައީ، އެހެންވީމާ ސުޕްރީމް ކޯޓު މިހާރު އެ އޮތީ ރައީސުލްޖުމްހޫރިއްޔާގެ ފުރިހަމަ ކޮންޓްރޯލްގެ ދަށުގަ" އެވެ.

ގާނޫނު އަސާސީ އެކުލަވާލި ރައްޔިތުންގެ ހާއްސަ މަޖިލީހުގައި ވެސް ހިމެނިވަޑައިގެން އަދި ރައްޔިތުންގެ މަޖިލިސްގެ ރައީސްކަން ވެސް ކުރައްވާފައިވާ އޮނަރަބަލް ޝާހިދު ވިދާޅުވި ގޮތުގައި ގާނޫނުއަސާސީގެ މުޅި މަފުހޫމަކީ ރައްޔިތުންގެ ހިޔާލާއި މަޝްވަރާގެ މަތިން ކަންކަން ކުރުން ކަަމަށެވެ. މަޖިލީހުން އިއްޔެ އެ ފާސްކުރި އިސްލާހުތަކާ މެދު ވެސް ރައްޔިތުން ދެކޭ ގޮތް ބަލައި، ހިޔާލު ހުށަހެޅުމުގެ ފުރުސަތު ފަހިކޮށްދޭން ޖެހޭނެ ކަމަށް ޝާހިދު ވިދާޅުވިއެވެ.

ގާނޫނުއަސާސީއަށް ބަދަލު ގެނެވޭ ވަރަށް މެންބަރުން ތިބީތީ ކަން ބޭނުން ގޮތަކަށް ކަން ކޮށްލުން އެއީ ޑިމޮކްރެސީއެއް ނޫން ކަމަށް ޝާހިދު ވިދާޅުވިއެވެ. ރައީސް މުއިއްޒު އިއްޔެ ދިވެހިރާއްޖޭގެ ރައްޔިތުންނަށް އެ ދެއްވަން ބޭނުންފުޅުވި މެސެޖަކީ ރާއްޖޭގައި ކޮންމެ ކަމެއް، ހިތުހުރި ކޮންމެ ވަގުތެއްގައި ހިތުހުރި ކޮންމެ ގޮތަކަށް ތިމަން މަނިކުފާނު ކުރައްވަފާނެ ކަމުގެ މެސެޖުކަމަށް ޝާހިދު ގަބޫލުކުރައްވާ ކަމަށް ވިދާޅުވިއެވެ. 

" އިއްޔެ ރައްޔިތުންގެ މަޖިލީހުން އެ ބަދަލު ގެންނެވިކަން، ވޯޓު ނަގައި އިއުލާނު ކުރެއްވި ވަގުތު އިއްތިފާގު ވެގެން ދިޔައީ އިއްޔެގެ އިރު އޮއްސި މަގުރިބު ނަމާދަށް ގޮވި ވަގުތާ. އަޅުގަނޑަށް ސިފަ ކުރެވުނީ އިރު އޮއްސިގެން އެ ދިޔައީ ހަމައެކަނި އިއްޔެގެ އިރެއް ނޫނޭ، ރާއްޖެއަށް ރާއްޖޭގެ ޑިމޮކްރެސީގެ އިރު ވެސް އޮއްސިގެން އެ ދިޔައީއޭ. އެ ރަމްޒުވެގެން އެ ދިޔައީ،" ޝާހިދު ވިދާޅުވި އެވެ.