ނަޝީދަށް: ކުރިން އެކުގައި ނުކުރިކަމެއް މިހާރަކު ނުކުރެވޭނެ!

ދިވެހި ރާއްޖޭގެ ކުރި މަގެއް އޮތްކަން ޑިމޮކްރެޓުންނަށް އިހުސާސްވީ އަދި ކިރިޔާ ހެއްޔެވެ. ކެނެރީގޭ ނަޝީދު ނޫން މީހަކު އެމްޑީޕީން ވެރިކަން ކުރާތައް ދެކެން ހަޖަމު ނުވެގެން އުޅުނު އިރު އެބުނާ ގައުމާއި ކުރިމަގު އޮތީ ކޮންތާކު ހެއްޔެވެ. ދަ ޑިމޮކްރެޓްސަށް ގައުމުގެ ކުރިމަގު އޮތްކަން އެނގުނީ މަޖިލީހުން އެންމެ ގޮނޑިއެއް ނުލިބި ހުޅުނބު ފޭބީމާ ހެއްޔެވެ.

ރައީސް ސޯލިހާއި ރައީސް ނަޝީދު އެއްގަލަށް އެރުވުމުގެ ވާހަކަ އަލީ އާޒިމުމެން ދެއްކީމާ ލަވަނީ ހޮޑެވެ. އެމްޑީޕީއަށް ގައުމު ބަދަލުކޮށްލަން ލިބުނު ރަނުގެ ފުރުސަތު ގެއްލުނީ ތިޔަ ބުނާ ނަޝީދަކަށް ވެރިކަމުގެ ބާރުތައް ހޯދާދޭން ރައީސް ސޯލިހުގެ ސަރުކާރު ހަވަރަށް ދީގެން ނޫން ހެއްޔެވެ. ދިވެހި ވެރިކަމަކީ ކެނެރީގެ ނަޝީދު ނޫން މީހަކަށް އޮވެގެން ވާނެ އެއްޗަކަށް އޭރަކު ނުވެއެވެ. ރައީސް ސޯލިހުގެ ވެރިކަމުގެ ބާރުތައް ފިރުކައި ގަންނަށް ނަޝީދުމެން ނުކުރަނީ ކޮންކަމެއް ހެއްޔެވެ. 

އެމްޑީޕީއަށް އޮތް މަޖިލީހުގެ ސްޕަރ މެޖޯރިޓީ ބޭނުންކޮށްގެން ނަޝީދު އުޅުނީ ވެރިކަމުގެ ބަރުތައް އަތަށް ކަހާލާށެވެ. ބަރުލަމާނީ ނިޒާމަކަށް ވެރިކަން ފުރޮޅާލައިގެން ބޮޑުވަޒީރުކަން ހޯދާށެވެ. އެކަމަށް ރައީސް ސޯލިހު އެއްބަސް ނުވުމުން ކެނބު ކެނޑިގެން ނުއަތަށް އެނބުރެގަންނަ ސަރަކައެއްހެން ނަޝީދު އެނބުރިގަތީ ރައީސް ސޯލިހާ ދެކޮޅަށެވެ. ދެނަކާ ދެނެއްނެތެވެ.

އެމްޑީޕީގެ އިސް ސަފުން ރައީސް ސޯލިހަށް ވާގިވެރިވީ ކޮންމެ މީހެއްގެ އިއްޒަތުންނަފުސު ވެއްޔާ މޮޑެލިއެވެ. އެމްޑީޕީގެ ވެރިކަން ދިފާއު ކުރަން މަސައްކަތްކުރި ކޮންމެ މީހަކީ ބޯވަޔަށް މީދަލަށް ވާލަށް ހެދިއެވެ. ރައީސް ސޯލިހު ސަރުކާރުން ރާއްޖޭގައި ހިންގި ތަރައްގީގެ ކޮންމެ ކަމަކީ ކޮރަޕްޝަން ކަމަށް ސިފަކޮށް ނަޝީދާ ބައިވެރި ނުވި އެމްޑީޕީ ކޮންމެ މީހަކީ ވަގަކަށް ހެދިއެވެ. އެމްޑީޕީގެ ރައީސް ކަމާއި ރައްޔިތުންގެ މަޖިލީހުގެ ރިޔާސަތުގައި ނަޝީދު އިނދެ ރައީސުލްޖުމްހޫރިއްޔާގެ އިސްތަށިފުޅުގައި ވަގު ތުހުމަތު އަޅުވާ ރައްޔިތުންގެ ހިތުގައި ނަފުރަތު އުފެއްދިއެވެ. 

ކޮވިޑްގެ ހާލަތުވެސް ނަޝީދު ބޭނުންކުރީ ރައީސް ސޯލިހުގެ މަގުބޫލުކަން ގެއްލުވާލާ ވެރިކަން އަތްމައްޗަށް ފުރޮޅާލަން ބޭނުންކުރި ހަތިޔާރަކަށެވެ. ދެކުނު ކަނޑުގެ އިގްތިސާދީ ސަރަހައްދުގެ އިމުގެ މައްސަލަ އިޓްލޮސްއިން ހަމަޖެެއްސި ހަމަޖެއްސުން ވެސް ނަޝީދު ރައްޔިތުންނަށް ސިފަކޮށްދިނީ ކަނޑު ވިއްކާލުމުގެ ގޮތުގައެވެ. ރަށްރަށުގެ ބަނދަރާއި ފެނާ ނަރުދަމާ ގާއިމު ކުރުން ނަޝީދު ސިފަކުރީ އިސްރާފާއި ކޮރަޕްޝަނުގެ ގޮތުގައެވެ. އެންމެ ފަހުން ނަޝީދު މަރާލަން އުޅުމުގެ ތުހުމަތުވެސް ސަރުކާރަށާއި ރައީސް ސޯލިހަށް ކުރީއެވެ.

ސަރުކާރާ ދެކޮޅަށް ޕެޓިޝަނާއި ގަރާރުތައް ހުށަހަލުވައިގެން މަޖިލީހުގެ ތެރޭގައި ނަޝީދު ކުރުވި ކަމަކީ ރައީސް ސޯލިހުގެ ވަރަ ކޮށާލުމެވެ. އިދިކޮޅަށްވުރެ އިދިކޮޅުވެގެން އިދިކޮޅާ ގުޅިގެން އައުވާނުންނާއެކު އެމްޑީޕީން ނިކުމެ ދިމާކުރީ އެމްޑީޕީ ރޫޅާލާށެވެ. އިބޫ ނޫން ގޮތެއް ހޯދާށެވެ. 

ރިޔާސީ އިންތިހާބުގައި ހުރީ މުއިއްޒު އަތުގައި ހިފައިގެން އިބޫނޫން ގޮތެއް ހޯދަން ނިކުމެއެވެ. ހުތުރު ބައްޔަކުން ފުރަތަމަ ބުރުގައި ދަ ޑިމޮކްރެޓްސް ބަލިވުމުން ވެސް ހޭނާރާ ދެވަނަ ބުރުގައިވެސް ނިކުމެތިބީ އެމްޑީޕީ ނޫން ގޮތެއް ހޯދާށެވެ. ނަޝީދު ނެގިނެގިފައި ޖެހުމުންވެސް ރިޔާސީ އިންތިހާބުގައި އެއްލައްކަ ނުހާހަށްވުރެ ގިނަ ވޯޓު އެމްޑީޕީ ހޯދީ ނަޝީދަށް އެމްޑީޕީ ރޫޅާ ނުލެވުނީމައެވެ. 

ނިމިދިޔަ މަޖިލިސް އިންތިހާބުގައިވެސް ވެރިކަމުގެ ހައްދެއް ނެތް ނުފޫޒާއި މިލިޔަނުން އެޅިހާ ފައިސާއާއި ދެކޮޅަށް އެމްޑީޕީން 59000 ވޯޓު ހޯދީ އެމްޑީޕީ ގަދަކޮށް އޮތީމައެވެ. އެހާލަތުގައި ވެސް. ނަޝީދު ދިމާކުރީ އެމްޑީޕީއާއެވެ. ފާރަވެރި މަޖިލިސް ބޮލަށް ލައިގެން ދަ ޑިމޮކްރެޓްސްއަށް އެންމެ ގޮނޑިއެއްވެސް ނުލިބި ވީބައްޔެވެ. ޑެމްސަށް ގޮނޑިއެއް ނުލިބި އެމްޑީޕީއަށް މަޖިލީހުން ބާރަ ގޮނޑި ލިބުމުންވެސް ނަޝީދުގެ މަގުބޫލުކަން ގައުމުގައި ނެތް މިންވަރު ސާފުވެއެވެ. 

ދާއިރާގައި ރަސްކަން ކުރަމުން އައި އިންތިއާއި އަލީ އާޒިމާއި އީވާމެން ބަލި ބުޅާގަޑަކަށްވުރެ ބަލިވީމާ ނަޝީދޭ ސޯލިހޭ އެއްގަލޭ އެމްޑީޕީއޭ މިހާރަކު ކިޔާނެކަމެއް ނެތެވެ. ވެރިކަމުގައި އެމްޑީޕީ އޮތްއިރު ރައީސް ސޯލިހާއެކު ކުރާނެ ސިޔާސީ މަސައްކަތެއް ނެތް ނަޝީދަކަށް މިހާރަކު ރައީސް ސޯލިހާއެކު ކުރާނެ ސިޔާސީ މަސަކަތެއް ނޯންނާނެއެވެ. .