ހަގީގީ އެމްޑީޕީގެ ވެރިކަމެއް ދިވެހިން އަދި ނުދެކޭ

އެމްޑީޕީގެ ކޮންގްރެސް ހުޅުވުމުގެ ޖަލްސާގައި ރައީސް ސޯލިހު އުފެއްދެވީ ޖަވާބުލިބެން ބޭނުންވާ ބޮޑު ސުވާލެކެވެ. ރާއްޖޭގެ ސިޔާސީ މަސްރަހު އޮތްގޮތުން ސިޔާސީ ޕާޓީތަކާމެދު ވަރަށް ބޮޑަށް ގިނަ ބަޔަކު ތިބީ ނާއުންމީދުވެފައެވެ. އެހެން އޮތް އިރު އެހެން ޕާޓީތަކަށްވުރެ ބޮޑަށް ރައްޔިތުން އެމްޑީޕީއަށް އިތުބާރު ކުރަންވީ ކީއްވެގެން ހެއްޔެވެ.

ދެ ފަހަރު ވެރިކަން ކުރަން ލިބިއްޖެއެވެ. އެމްޑީޕީއަށް ވެރިކަން ލިބުނު އެއްވެސް ފަހަރަކީ މުތުލަގަށް އެމްޑީޕީއަށް ވެރިކަން ކުރަން ލިބުނު ފަހަރު ފަހަރެއް ނޫނެވެ. ކޯލިޝަނަކާ ނުލާ ވެރިކަން ކުރާކަށް އެމްޑީޕީއަކަށް އަދި ނުލިބެއެވެ. 2008 އާއި 2018 ގައި އެމްޑީޕީއަށް ލިބުނީ ކޯލިޝަން ވެރިކަމެކެވެ. އެހެން ކަމުން ސައްތައިން ސައްތަ އެމްޑީޕީ ވެރިކަމެއް އަދި ނުކުރެއެވެ. އޭގެ މާނައަކީ ރައީސް ސޯލިހު ވިދާޅުވާހެން ރައްޔިތުންގެ އިތުބާރު އެމްޑީޕީއަށް ހޯދަން ޖެހޭކަމެވެ. 

އެމްޑީޕީގެ ހުރިހާ ސިޔާސަތުތަކެއް އަކުރުން އަކުރަށް ތަންފީޒުކުރެވޭނީ ސައްތައިން ސައްތަ އެމްޑީޕީ ވެރިކަމެއް ކުރަން ލިބޭ ދުވަހަކުންނެވެ. ސަރުކާރުގެ ފޮތިފޮއްޗަށް ބަހައިގެން ވެރިކަން ކުރަންޖެހުމަކީ އެމްޑިޕީ އޭގެ އަސްލު ސިފައިގައި ވެރިކަމެއް ނުކުރެވޭ ސަބަބެވެ. ނަމުގައި އެމްޑީޕީ ވެރިކަމަކަސްް ކޯޅިޝަންގެ ނުފޫޒު ވެރިކަމުގެ ތެރޭގައި މޫލާފައި ނެތް ވެރިކަމެއް އަދި އެމްޑީޕީއަކަށް ނުލިބެއެވެ. 

2008 ގެ ވެރިކަން ދައުރު ހަމަނުކޮށް ނިންމަންޖެހުނީ ކޯލިޝަން ރޫޅުމުން އުފެދުނު ފިތުނައިގެ ސަބަބުންނެވެ. ރައްޔިތުންނަށް ފައިދާހުރި ކިތަންމެ ކަމެއް ކުރެވުނު ނަމަވެސް އެކަންކަމުގެ އަގު ވަޒަން ކުރަން ނޭގުނީ ކޯލިޝަން ތެރޭގައި އުފެދުނު ދެބަސްވުން ތަކަށް އެއްބަސް ނުވެވުމުންނެވެ. ބަގާވާތަކުން ވިޔަސް ބަސްނޭހުމަކުން ވިޔަސް ވީގޮތެއް ވެގެން ވެރިކަން ވެއްޓުނީ މުތުލަގަށް އެމްޑީޕީ ސަރުކާރަކަށް ނުވުމުންނެވެ. 

2008 ގައި އުފެދުނީ ހަގީގީ އެމްޑީޕީ ސަރުކާރެއްނަމަ އޭރުހުންނެވި ރައީސް ނަޝީދު އިއްތިއުފާ ދެއްވިޔަސް ދައުރު ނިމެންދެން އޮތީހީ އެމްޑީޕީވެރިކަމެކެވެ. އެކަމަކު ކަންވީ އެހެނަކުން ނޫނެވެ. އޭރު ހުރި ނައިބު ރައީސް ވެރިކަމާ ހަވާލުވެ އެކީ އެކައްޗަކަށް އެމްޑީޕީ ސަރުކާރުން ފައްސާ ނަގާލީއެވެ. އެމްޑީޕީ މަގުމަތިކޮށްލީއެވެ. އެބަދަލު ބަގާވާތެއްކަމަށް ބުނަންޖެހެނީ އެހެންވެއެވެ. ރައީސްސްކަމުގައި ހުރި މީހަކު އިސްތިއުފާ ދިނުމުން ނައިބު ރައީސްކަމުގައި ހުރި މީހާ ގާނޫނީ ގޮތުން ވެރިކަމާ ހަވާލުވިޔަސް އެމްޑީޕީ ވެރިކަމެއްނަމަ މުޅި ވަޒީރުންގެ މަޖިލީހާއި ހުރިހާ ސިޔާސީ މަގާމެއްގައި ތިބިހާ އެންމެން ބަދަލުކޮށް ސަރުކާރު އެފުށް މިފުށަކަށް ނުޖެހީހެވެ. އެހެން ކަމުން 2008ގައި އުފެދުނީ އެމްޑީޕީގެ ވެރިކަމެއް ކަމަށް ބުނެވޭކަށް ނެތެވެ. 

2018 ގެ ވެރިކަން އައީ ވެސް ކޯލިޝަނެއްގެ ތެރެއިންނެވެ. ރައީސްއަކީ އެމްޑީޕީގެ ޓިކެޓްގައި ހޮވިވަޑައިގެން ބޭފުޅެއް ނަމަވެސް އެމްޑީޕީ ހިއްސާކުރީ މުޅި ސަރުކާރުގެ އެންމެ %40 އެވެ. %60 ގެ ކޮންޓްރޯލު އޮތީ ތަފާތު އެހެން ޕާޓީތަކުގައެވެ. ނަތީޖާއަކަށްވީ އެމްޑީޕީގެ މުޅި މެނިފެސްޓޯ އެގޮތުގައި ތަންފީޒުނުވުމެވެ. އެންމެ ފަހުން ކޯލިޝަން ޕާޓްނަރުން ތިބީ އެމްޑީޕީ ސަރުކާރު ފޭލިކޮށްލަން އެތެރޭގައި ތިބެ ކަމަރު ބަނދެގެންނެވެ. އެމްޑީޕީގެ ޓިކެޓްގައި ރައީސްކަން ކުރެއްވި ރައީސް ސޯލިހަށް އާއްމު ރައްޔިތުންގެ ގިނަ ބައެއްގެ އިހުތިރާމާއި ލޯބި އޮތަސް 2 ވަނަ ދައުރު ގެއްލުމުގެ މައިގަނޑު ސަބަބަކީ އެމްޑީޕީއާއި ކޯލިޝަންގެ މެދުގައި އޮތް ދެބަސްވުމާއި ނުތަނަވަސްކަމެވެ. 

ތަޖުރިބާގެ އަލީގައި ރައީސް ސޯލިހު އެ ވިދާޅުވަނީ އެވާހަކައެވެ. ކޯލިޝަނަކާ ނުލާ ވެރިކަމެއް އުފެއްދޭ ވަރަށް ރައްޔިތުންގެ އިތުބާރު އެމްޑީޕީ ހޯދަން ޖެހެއެވެ. ކާމިޔާބު ވެރިކަމެއް ކުރެވޭނީ ރައްޔިތުންގެ ފުރިހަމަ އިތުބާރު ހޯދައިގެންނެވެ. އެހެން ބަޔަކާ ބައިވެރިނުވެ ވެރިކަމެއް އުފެއްދޭ ވަރަށް ރައްޔިތުންގެ އިތުބާރު ހޯދަން އެމްޑީޕީން މަސައްކަތް ކުރަންޖެހެއެވެ.