ވޯޓު ހޯދުމުގެ ބަދަލުގައި އިތުބާރު ހޯދަން ރައްޔިތުންގެ ގާތަށް ދާންޖެހޭ: ރައީސް ސޯލިހު

ގައުމު މިއޮތް ހާލަތުން އަރައިގަތުމަށްޓަކައި އެންމެ ފުރަތަމަ ވެސް ކުރަން ޖެހޭ ކަމަކީ މިސަރުކާރު ބަދަލުކޮށް އެމްޑީޕީގެ ވެރިކަމެއް މި ރާއްޖޭގައި ގާއިމުކުރުން ކަމަށް ރައީސް ސޯލިހު ވިދާޅުވެއްޖެއެވެ. 

ގައުމީ ބޮޑެތި މައްސަލަތަކަކީ ސިޔާސީ ޝިޔާރަކުން ހައްލު ކުރެވޭނެ ކަންތައްތަކެއް ނޫން ކަމަށް ވިދާޅުވަމުން ރައީސް ސޯލިހު ވިދާޅުވީ ބޭނުންވަނީ ޒިންމާދާރު ލީޑަރޝިޕެއް ކަމަށާއި، އިތުބާރު ކުރެވޭ އިގުތިސާދީ ސިޔާސަތުތަކެއްގެ އިތުރުން ގައުމީ މަސްލަހަތުތަކަށްޓަކައި އެއްބާރުލުން ދޭނެ ލީޑަރުންތަކެއް ކަމަށެވެ. 

ކިތަންމެ ބައިވަރު ވައުދުތަކެއް ވެސް ވެވިދާނެ ކަމަށް ވިދާޅުވަމުން ރައީސް ސޯލިހު ވިދާޅުވީ ތަރައްގީ މިންކުރުމުގައި ބަލަން ޖެހޭނީ އެ ޕްރޮޖެކްޓަކުން ރައްޔިތުންނަށް ވަނީ ކޮން ފައިދާއެއްތޯ ކަމަށާއި ގައުމަށް އޭގެން ވަނީ ކީއްތޯ ކަމަށެވެ. 

އެމްޑީޕީގެ ކޮންގްރަސް ހުޅުވުމުގެ ޖަލްސާގައި ވާހަކަ ދައްކަވަމުން ރައީސް ސޯލިހު ވިދާޅުވި ގޮތުގައި އެމްޑީޕީން ވެރިކަން ހޯދުމަށްޓަކައި ރައްޔިތުންގެ އިތުބާރު އިތުރަށް ހޯދަން ޖެހެއެވެ. އެމްޑީޕީން ރައްޔިތުންގެ އިތުބާރު ހޯދަން ރައްޔިތުންގެ އަޑު އަހައި، ކުރިން ހެދިފައި ހުރި ގޯސްތައް ގަބޫލުކޮށް ހަގީގީ ހުށަހެޅުންތަކެއް ހުށަހަޅަން ޖެހޭ ކަމަށްވެސް ރައީސް ސޯލިހު ވިދާޅުވިއެވެ

ފެށުނު އެމްޑީޕީ ކޮންގްރެސްގައި ރައްޔިތުންގެ އިތުބާރު ހޯދޭނެ މަގުތައް ހޯދައި، ބޭނުން ނުވާ ތަފާތުތައް ދޫކޮށްލަން ޖެހޭ ކަމަށް ވިދާޅުވަމުން ރައީސް ސޯލިހު ވިދާޅުވީ ރައްޔިތުން ކައިރިއަށް ވޯޓު ހޯދުމުގެ ބަދަލުގައި އިތުބާރު ހޯދަން ދާން ޖެހޭ ކަމަށެވެ.