މިނިސްޓަރު އިހުސާން ވަގުތުން މަގާމުން ވަކިކުރަންޖެހޭ: ފައްޔާޒް
ޑީއެންއާރުގެ ޑޭޓާބޭސް ފަޅައިލައި އެތައް ބައެއްގެ މައުލޫމާތު ވަގަށް ނަގަން ފުރުސަތު ފަހިކޮށްދިން މިނިސްޓަރު އިހުސާން ވަގުތުން މަގާމުން ވަކިކުރަން ޖެހޭކަމަށް އެމްޑީޕީގެ ޗެއަރޕާސަން އޮނަރަބަލް ފައްޔާޒް އިސްމާއީލް ވިދާޅުވެއްޖެއެވެ.
އޮނަރަބަލް ފައްޔާޒު މިމޭރުމުން އެކްސްގައި ކުރެއްވި ޕޯސްޓްގައި އިތުރަށް ވިދާޅުވެފައިވާ ގޮތުގައި މިދިޔަ 6 މަސް ދުވަހު އިލެކްޝަންސްއަށް ޕީއެންސީން ހުށަހެޅި ހުރިހާ ފޯމެއް ބާތިލުކޮށް މި މައްސަލަ މިނިވަންކަމާއެކު ބަލައި ފިޔަވަޅު އަޅަން ޖެހެއެވެ.
އެމްޑީޕީގެ ޗެއަރޕާސަން ވިދާޅުވަނީ ޑިޖިޓަލް ކުރިއެރުމަށް އެސްޓޯނިއާގެ އެހީތެރިކަން ހޯދުމަށް އެ ގައުމަށް ރައީސް ވަޑައިގެން ހުންނެވިއިރު މި ފެންނަނީ ރާއްޖޭގައި ޑިޖިޓަލް ކަންކަމާ ހަވާލުވެ ހުންނެވި ވަޒީރު ރޯމާދުވާލު ރައްޔިތުންގެ އައިޑެންޓިޓީއިން ވައްކަން ކުރަމުންދާ ތަންކަމަށެވެ.
ޑީއެންއާރުގެ ޑޭޓާބޭސް ފަޅައިލައި އެތައް ބައެއްގެ މައުލޫމާތު ވަގަށް ނެގުމަކީ ރާއްޖޭގައި ޑިޖިޓަލް އަދި ޓެކު ދާއިރާއިން މިހާތަނަށް ކުރި މަސައްކަތްތައް އެއްކޮށް ފެއިލްވާނެ ކަމުގެ ހެއްކެއް ކަމަށް ފައްޔާޒު ވިދާޅުވެއެވެ. އަދި މިކަމަކީ މި ސަރުކާރުން ކުރަން ރާވފައިވާ ކަންކަންވެސް އެއްކޮށް ފެއިލްވާނެ ކަމުގެ ހެއްކެއް ކަމަށްވެސް ފައްޔާޒު ދެކިވަޑައި ގަންނަވައެވެ.
އައިޑެންޓިޓީއިން ވައްކަން ކުރުމަކީ ނުރައްކާތެރި ކަމެއްކަމަށާއި ޒާތީ މައުލޫމާތު ރައްކާ ނުކުރެވޭ ގައުމަކަށް ޑިޖިޓަލް ވުމެއް ނެތްކަމަށް އެމްޑީޕީގެ ޗެއަރޕާސަން ދެކިވަޑައިގަންނަވައެވެ.
