ދަރަވަންދޫގައި އަލިފާނުގެ ހާދިސާއެއް ހިނގައިފި
ބ. ދަރަވަންދޫ ޖަނަވަރީގޭގައި ބަދިގެއެއްގެ ގޮތުގައި ބޭނުން ކުރަން ރާނާފައިވާ ހުރި އިމާރާތެއް މިއަދު އަލިފާނުގެ ހާދިސާއެއް ހިނގާ ގެއްލުންތަކެއް ވެއްޖެއެވެ. އެ އިމާރާތަކީ މީހުން ދިރިއުޅޭގެއާ ވަކިން އިމާރާތްކޮށް ބޭނުންކުރަން ނުފަށަ ހުރިތަނެކެވެ. ރާނާ ހިޔާކޮށް ކަރަންޓް ވައިރުއަޅާ ހަދާފައި އެތަނަކީ ކަރަންޓް ގުޅާފައިވާ ތަނެއް ނޫނެވެ. އެގޭ މީހުން އެތަން ބޭނުން ކުރަމުން އައީ ވަގުތީ ގުދަނެއްގެ ގޮތުގައެވެ.
ދަރަވަންދޫ ކައުންސިލްގެ ރައީސް އަލީ ޝަމީމު ވިދާޅުވި ގޮތުގައި އެތާނގައި އަލިފާން ރޯވިކަމަށް ބެލެވެނީ މިއަދުގެ 11.45 ހާއިރުއެވެ. އެހާދިސާގައި އެއްވެސް މީހެއްގެ ހަށިގަނޑަށް ގެއްލުމެއް ނުވާކަމަށާއި އަލިފާން ރޯވި އިމާރާތް ބޭނުން ނުކުރެވޭ ވަރަށް ހަލާކުވެފައިވާ ކަމަށް ކައުންސިލްގެ ރައީސް ވިދާޅުވެއެވެ.
ދަރަވަންދޫ ޖަނަވަރީގޭގައި މީހުން ދިރިއުޅޭ އިމާރާތަށް އަލިފާނުގެ އަސަރުކޮށް ގެއްލުމެއް ވެފައި ނުވާކަމަށްވެސް ކައުންސިލްގެ ރައީސް ވިދާޅުވިއެވެ. ރޯވި އަލިފާންގަޑު ނިވާލީ އާއްމުންނާއި އެއަރޕޯޓްގެ ފަޔާރ ލޮރީންް ކަމަށް ކައުންސިލްގެ ރައީސް އަލީ ޝަމީހު ވިދާޅުވިއެވެ.
ރޯވި އަލިފާންގަނޑު މިހާރުވަނީ ނިވާލެވިފައިކަމަށާއި އަލިފާން ރޯވާން ދިމާވި ސަބަބު ދެނެގަތުމާއި އެކަމާ ގުޅިގެން ބަލަންޖެހޭ ކަންކަން ފުލުހުންގެ ފޮރިންސިކް ޓީމަކުން ކުރަމުންދާ ކަމަށްވެސް ކައުންސިލްގެ ރައީސް ވިދާޅުވިއެވެ.
