މުއިއްޒަށް: ހެޔޮނުވާނެ ދެންފައިބާ!

މުޅި ރާއްޖެ ދުށް އެންމެ މަގުބޫލުކަން ކުޑަ ރައީސް އަކީ މުއިއްޒު ނޫން ދެވަނަ މީހެއް ނޫނެވެ. ބަގާވާތަކުން ވެރިކަން ހޯދި ޑރ. ވަހީދަށް ވުރެވެސް ކުރު މުއްދަތެއްގެ ތެރޭގައި މުއިއްޒުގެ މަގުބޫލުކަން ގެއްލުނުލެއް ބޮޑެވެ.

ރައީސް މުއިއްޒު ވެރިކަމަށް ގެނައުމަށް މަރުދިން މީހުންގެ ގިނަ މީހުންވެސް މުއިއްޒު ދެކެ ފޫހިވެއްޖެއެވެ. އެމީހުންގެ ރުހުމެއް ތާއީދެއް ނެތެވެ. ނަން ހުސްކޮށް އާއިލާތަކަށް ވަޒީފާދީގެން އޮބަހައްޓަން އުޅޭ ގިނަ މީހުންވެސް ތިބީ ވެދާނެ ގޮތަކާމެދު ކަންބޮޑުވެ ގޮތް ހުސްވެފައެވެ.

ސިޔާސީ ބާރުވެރިކަމުގައި ތިބި މަދު މީހަކު ނޫން އެންމެންހެން މަގާމުގައި ތިބި ވަގުތު ހެދުނު އެއްޗެއް ހަދާ ލިބެން އޮތް އެއްޗެއް ލިބެން އޮތްގޮތަކުން ލޫޓުވާލުން ނޫން ކަމެއް ނުކުރެއެވެ. ރައީސަށް ބައިއަޅައިގެން ވުޒާރާތަކާއި ދައުލަތުގެ ކުންފުނިތައް ލޫޓުވާލަނީއެވެ. މޫނަކަށް ކަނދުރާއަކަށް ނުބަލައެވެ. ކޮންމެ ދުވަހަކު އެތައް މިލިޔަން ރުފިޔާގެ ހިޔާނާތާއި ކޮރަޕްޝަންގެ މައްސަލަ ފެންމަތިވަނީއެވެ. 

ނުރައްކާތެރި ބިރުވެރި އަލިފާނުގެ ހާދިސާތައް އެތަންމިތާ ހިނގަނީއެވެ. ސިޔާސީ މަންފާއަށްޓަކާ ޓެރެރިޒަމްގެ ބިރުވެރިކަން ވެސް ފަތުރަނީއެވެ. ބްލެކްމޭލް ކުރުމާ ކިޑްނެޕްކުރުމާއި ސްމަގްލްކުރުމާއި މަކާރާ ހީލަތް ހެދުމާއި ހަށިވިއްކުމާ ނަން ހުސްކޮށް ކުށުގެވެށި ކުށުންވަނީ ފޯވެ ތަތްތެޅިފައެވެ. ހަމަ ރަނގަޅަށްވެސް ދައުލަތެއް ފޭލިވާނެ އެންމެ ދަށު ދަރަޖައިގައި ދިވެހި ދައުލަތް އޮތީ ފޭލިވެފައެވެ. ދޮގުހެދުމާއި ހިޔާނާތުން ފޯވެހުރެ މުއިއްޒަށް ދެން މިގައުމު ހަމަމަގަކަށް ނޭޅުވޭނެއެވެ.  

އާއްމު ރައްޔިތުންގެ ދިރިއުޅުމުގެ ހާލަތު ދަށްވެ ލިބޭ އާމްދަނީން ދެކޮޅުޖެނުޖޭހޭ ވަރަށް ދިރިއުޅުމުގެ ޒަރޫރީ ހަރަދުތަކުގެ އަގު ބޮޑުވެއްޖެއެވެ. ކަރަންޓް ބިލާއި ފެން ބިލަކަށް އަތެއް ނުފޯރައެވެ. ކުރިން ހިލޭ ލިބުނު އެތައް ބޭހެއް މިހާރު ގަންނަންވެސް ނުލިބެއެވެ. އާސަންދަ އޮތީ ސަންދޯކުއަޅާ ހިސާބަށް ގޮއްސައެވެ. ގިނަ މުއައްޒަފުން ތަކެއްގެ މުސާރައިން ބައެއް އުނިކޮށް ލަނީއެވެ. ބަޖެޓް ފޫބެއްދުމުގެ ނަމުގައި އަންނަ ޖެނުއަރީ ފެށިގެން ސަބްސިޑީތައް ކެނޑި ހިދުމަތުމަތުގެ އަގު ބޮޑުވެ ދިރިއުޅުމުގެ ހާލަތު ދަށްވެގެން ދަނީ ފަތުއަަޑުކިޔާފައެވެ. 

އާބާދީގެ ދެބައިކުޅަ އެއްބަޔަށްވުރެ ގިނަ މީހުން ހިފާފައިވާ ދެއްވެއް ހުއްޓުވުމަށް ސިނގިރެޓްގެ އަގު އިންތިހާއަށް ބޮޑުކޮށް މީހުން މޮޔަކޮށްފިއެވެ. ވޭޕް މަނާކޮށް ހާސްހާހުން ޖޫރިމަނާާ ކުރަނީއެވެ. ނަތީޖާއެއްގެ ގޮތުން ދުންފަތުގެ އަދިރި ކަނޑުވަން މީހުން ގަނޑު މޮޔަވެގެން ދުވަން ފަށައިފިއެވެ. ފޭރުމާއި ވައްކަމާއި މާރާމާރީ އިތުރުވެ އަމާންކަން ގެއްލިއްޖެއެވެ. 

ރޯމާ ދުވާލު ފާޅުގައި ރައީސުލްޖުމްހޫރިއްޔާ ދޮގުނޫން އެއްޗެއް ނުހަދައެވެ. ވަޒީރުންނަށް އެ މީހުންގެ މަސައްކަތް އުނބަށް ނުޖާހާ ރާވައިގެން ތަރުތީބުން ހިންގިދާނެ ކަމަށް ގަބޫލެއް ނުކުރެވެއެވެ. ނުފުނޑޭ ސިނާއަތެއް ގައުމަކު ނެތެވެ. އެހީއެއް ލޯނެއް ދޭނެ ޖަމާއަތެއް ގައުމެއް ދުނިޔެއަކު ނެތެވެ. ސަރުކާރު ނުދާރާާ ބެންކެއް ބަނގުރޫޓުނުވާ ވިޔަފާރިއެއް ރާއްޖޭގައި ނެތެވެ. މުއިއްޒު ސަރުކާރުން ހެވެއް ރަނގަޅެއް ވެދާނެ ކަމަކަށް ރައްޔިތުން މިހާރަކު ގަބޫލެއް ނުކުރެއެވެ.

ރައްޔިތުންގެ މަޖިލީހަކީ ގޮނޑިކޮއްކޮއަކަށް ބަދަލުވެ ގާނޫނު ތަންފީޒު ކުރެވެނީ ސިޔާސީ ބޭނުމުގައިކަމަށްވެ ސަދޫމަށްވުރެ އަދުލުވެރިކަން ނެތިއްޖެއެވެ. ޖުޑީޝަރީއާއި މިނިވަން މުއައްސަސާތަކަށް އިތުބާރު ކުރާ މީހަކު ނެތެވެ. އެކަކު އަނެކަކަށް އިތުބާރުކުރެވޭ މީހަކު ނެތެވެ. ސޯސަލް މީޑިއާގެ ގޮތްނޭގޭ "ހަސަން ކުރުސީ" އެކައުންޓަށް ރައްޔިތުން އިތުބާރުކުރާ ވަރަށްވެސް ދައުލަތުގައި އިތުބާރު ހިފޭ މީހެއް މުއައްސާސާއެއް ނެތެވެ.

މުއިއްޒު ވެރިކަމުގައި ހުރެގެން ގައުމަށް ދެން ލިބޭނެ މޮޅެއް ވާނެ ރަނގަޅެއް ނެތެވެ. ހަފަރާތުގައިވެސް ވަނީ ހާސްކަމާއި ނުތަނަވަސް ކަމެވެ. މާދަން ދެންވާނީ ކިހިނެތްކަމެއް ނޭނގޭ ވަރަށް މުޅި ގައުމުގައި އޮތީ ނުތަނަވަސްކަމެވެ. ހާސްކަމެވެ. ކަންބޮޑުވުމެވެ. ކޮންމެ މީހަކުމެ ހުރީ ހަދާނެ ގޮތް ހުސްވެ ވާނުވާގައެވެ. ކުރީ ސަރުކާރޭ ކިޔައިގެން ވާނެ މޮޅެއް ކުރެވޭނެ ކަމެއް ނެތެވެ. ހެޔޮނުވާނެއެވެ. ރައީސް މުއިއްޒެވެ. ދެން ފައިބާށެވެ.