ރިޔާސީ ނިޒާމު ބަލައިގަތީ މަތިވެރި އުއްމީދެއްގައި: ޝާހިދު

ސީދާ ރައްޔިތުން އިންތިހާބުކުރާ ވެރިޔަކު ވެރިކަން ހިންގާ ނިޒާމެއް ދިވެހި ރައްޔިތުން ބަލައިގަތީ މަތިވެރި އުއްމީދެއްގައި ކަމަށް އެމްޑީޕީގެ ރައީސް އޮނަރަބަލް އަބްދުއްލާ ޝާހިދު ވިދާޅުވެއްޖެއެވެ. މާޒީގައި ދިވެހީން ކުރި ތަޖުރިބާގެ އަލީގައި، ހުދްމުހުތާރު ވެރިކަމުގެ ނިޒާމަށް ނޫނެކޭ ބުނުމަށް ރިޔާސީ ނިޒާމު ބަލައިގަތް ކަމަށް ޝާހިދު ވިދާޅުވިއެވެ. 

ދިވެހި ރައްޔިތުން ހުދުމުހުތާރު ވެރިކަމަކަށް ޖާގަ ނުދޭނެކަން ސާފު ސާދާ އިބާރާތުން ދިވެހިން ބުނެފައިވާކަމަށް ޝަހިދު ވިދާޅުވިއެވެ. އެގޮތުން "ދިވެހިދައުލަތުގެ އެންމެހައި ބާރުތައް ފެށިގެން އަންނަނީ ރައްޔިތުންގެ ކިބައިންނެވެ. އަދި މިބާރުތައް ދެމިއޮންނާނީ ރައްޔިތުންގެ ކިބައިގައި" ކަމަށް ގާނޫނުއަސާސީގެ ފުރަތަމަ ބާބުގެ 4 ވަނަ މާއްދާގައި ބަޔާންވެފައިވާކަން ޝާހިދު ރައްޔިތުންނަށް ހަނދާންކޮށް ދެއްވިއެވެ.  

އެހެންނަމަވެސް ހިތާމަޔަކީ ގާނޫނުއަސާސީގެ ރޫހާއި, ބަޔާން ކޮށްފައިވާ އެންމެހާ ހަމަތަކާއި އަސާސްތަކާއި ހިލާފަށް, ވެރިކަމުގެ ބާރުތައް ޖަމާކޮށް ހުދުމުހުތާރު ވެރިކަމެއްގެ ސިފަ މުއިއްޒުގެ ވެރިކަމުގައި އަށަގަންނަމުންދާތަން ފެންނަމުން ދާކަން ހިތާމައާއި އެކު ޝާހިދު ފާހަގަ ކުރައްވައެވެ. ހުދު މުހުތާރު ވެރިކަމުގެ މަގަށް ރާއްޖެ ދިޔަ ނުދިނުމަކީ އެންމެންގެ ވެސް ގައުމީ ވާޖިބެއްކަމަށް ޝާހިދު ވިދާޅުވިއެވެ.

ޖުމްހޫރީ ދުވަހުގެ ތަހުނިޔާ ދިވެހި ރައްޔިތުންނަށް އަރިސްކުރެއްވުމަށް އެކްސްގައި މިއަދު ކުރެއްވި ޕޯޓެއްގައި ޝާހިދު ކަންބޮޑުވުން ފާޅުކުރެއްވީ ރައީސް މުއިއްޒުގެ ވެރިކަން ހުދުމުހުތާރު ކަމާ ދިމާއަށް މިސްރާބު ޖަހާފައިވާތީއެވެ.